މާލޭ ރައްޔިތުންނަށް ގޯތި ދޭން ކުރީގެ ރައީސް އިބްރާހީމް މުހައްމަދު ސޯލިހުގެ ސަރުކާރުން ކުރިއަށް ގެންދިޔަ ބިންވެރިޔާ ސްކީމުން ގޯތި ލިބޭނެ ކަަމަށް ކަނޑައެޅި މީހުންނާ ގޯތި ހަވާލުކުރުން އަވަސްކުރުުމަށް ބިމާ ބެހޭ ގާނޫނަށް މާއްދާއެއް އިތުރުކުރަން ރައްޔިތުންގެ މަޖިލީހަށް ބިލެއް ހުށަހަޅައިފި އެވެ.
މަޖިލީހުގެ ގަލޮޅު ދެކުނު ދާއިރާގެ އެމްޑީޕީ މެމްބަރު މީކާއީލް އަހުމަދު ނަސީމު ހުށަހެޅުއްވި ބިލުގައި އޮތީ ބިމާ ބެހޭ ގާނޫނުގެ 12 މާއްދާއަށް އިތުރުކުރާ ނަމްބަރުތަކެކެވެ.
ބިމާ ބެހޭ ގާނޫނުގެ 12 ވަނަ މާއްދާގައި އޮތީ ބަންޑާރަގޯއްޗަށް އެދެވޭނެ އުސޫލުތަކެވެ. އެ މާއްދާގެ ފަހަތަށް އިތުރުކުރަން މީކާއީލްގެ ބިލުގައި ހިމަނުއްވާފައިވާ އެއް ވަނަ ނަންބަރުގެ ހ. ގައި އޮތީ "ގޯތި ލިބޭ ފަރާތްތައް ކަނޑައަޅައި ގެޒެޓްކުރާ ތާރީހުން ފެށިގެން ހަ މަސްދުވަހުގެ ތެރޭގައި އެފަރާތްތަކާ ގޯތި ހަވާލުކުރަން ޖެހޭނެ" ކަމަށެވެ.
އެ ނަންބަރުގެ ށ. ގައި ވާ ގޮތުން އެ ބިލު ގާނޫނަކަށްވެ، އަމަލުކުރަން ފަށާ އިރު ގޯތި ލިބޭނެ ކަމަށް ގެޒެޓްކުރުމަށް ފަހު ގޯތި ހަވާލުނުކޮށް ތިބޭ މީހުންނަށް، އެ ގާނޫނަށް އަމަލުކުރަން ފަށާތާ ތިން މަސްދުވަހުގެ ތެރޭގައި ގޯތި ހަވާލުކުރަންޖެހޭނެ އެވެ.
ބިލު ހުށަހެޅުއްވި މަގުސަދެއް ކަމަށް، ބިލުގައި މީކާއީލް ވިދާޅުވެފައި އޮތީ (ކުރީގެ) ސަރުކާރުން ހިންގި "ބިންވެރިޔާ ސްކީމުން ގޯތި ލިބޭނެ ކަމަށް ލިސްޓްކޮށްފައިވާ މީހުންނާ ގޯތިތައް ހަވާލުނުކޮށްގެން ފާޅުކުރަމުން އަންނަ ކަންބޮޑުވުންތަކަށް ގާނޫނީ ހައްލެއް ހޯދައި ދިނުމެވެ. އެފަދަ ކަމެއް، ( ގޯތި ހަވާލުކުރުން ލަސްކުރުން ފަދަ ކަމެއް) ތަކުރާރު ވިޔަ ނުދިނުމަކީ ވެސް ބިލުގައިވާ ގޮތުން، ބިލުގެ މަގުސަދެކެވެ.
ކުރީގެ ރަައީސް އިބްރާހީމް މުހައްމަދު ސޯލިހުގެ ދައުރުގެ ފަހުކޮޅު ފެށި "ބިންވެރިޔާ ސްކީމް"ގެ މަސައްކަތް މަޑުޖެހުނީ ރިޔާސީ އިންތިހާބު އެމަނިކުފާނަށް ނާކާމިޔާބުވެ، ސަރުކާރު ބަދަލުވި ފަހުންނެވެ.
