އިދިކޮޅު ޕާޓީ، އެމްޑީޕީގެ ޓިކެޓްގައި މާލޭގެ މޭޔަރުކަމަށް ވަޑައިގެންނެވުނަސް، ރައްޔިތުންނަށް ފަސޭހަވާ ގޮތަށް ސަރުކާރުން ކުރާ އެއްވެސް ކަމަކާ ދެކޮޅު ނުހައްދަވާނެ ކަމަށް އާދަމް އާޒިމް ވިދާޅުވެއްޖެ އެވެ.
"އަދަދު" ނޫހުގެ ހުސައިން ފިޔާޒު މޫސާ ހޯސްޓުކުރާ "އެތެރެފުށް" ޕްރޮގްރާމްގައި އާޒިމް ވިދާޅުވީ މާލޭގައި ދިރިއުޅޭ އެންމެނަށް އުފާވެރި ދިރިއުޅުމެއް ހޯދައިދިނުމަކީ މޭޔަރުގެ ޒިންމާއެއް ކަމަށާއި އެއީ ގާނޫނު ލާޒިމުކުރާ ކަމެއް ކަމަށެވެ. އެކަމަށް ޓަކައި ކަށަވަރުކުރަން ޖެހޭ ކަންތައްތަކެއްގެ ލިސްޓެއް އޭނާ ގެންގުޅުއްވަ އެވެ.
"[މޭޔަރަކަށް ވެއްޖެ ނަމަ] އަޅުގަނޑު އެންޝުއާކުރަން ޖެހޭނެ އެމީހުންނަށް ރަނގަޅު ބޯހިޔާވަހިކަމެއް ލިބޭތޯ، އެމީހުންނަށް މަގުތަކަކީ އަމާންތަނަކަށް ހަދައިދެވޭތޯ، އެމީހުން އުޅޭ މާހައުލަކީ ހިތްފަސޭހަ މާހައުލަކަށް ހަދައިދެވޭތޯ،" ކުރިން ސަރުކާރުގެ ބޮޑެތި ކުންފުނިތައް ހިންގަވާފައިވާ އާޒިމް ވިދާޅުވި އެވެ.
އޭނާ ވިދާޅުވި ގޮތުގައި މާލޭގެ މީހުންނަށް ރަނގަޅު ސިއްހީ ނިޒާމެއް ކަށަވަރުކުރުމާއި ލަފާފުރުމުގެ އިންތިޒާމު ރަނގަޅުކަން ކަށަވަރުކުރުމަކީ ވެސް މޭޔަރުގެ ޒިންމާ އެކެވެ. އެކަންތައްތައް ކަަށަވަރުކުރުމަށް ޓަކައި ގާނޫނީ އިމުގެ ތެރެއިން ކުރަން ޖެހޭ މަސައްކަތްތައް އޭނާ ކުރައްވާނެ އެވެ.
"ރައްޔިތުންނަށް ފަސޭހަވާ އެއްވެސް ކަމެއް [ސަރުކާރުން ކުރާ ކަންތައްތަކުގެ ތެރޭގައި] އޮވެއްޖެއްޔާ އަޅުގަނޑު އެކަމަކާ ދެކޮޅެއް ނުހަދާނަން. އެކަމަކު އަޅުގަނޑެއް ބައިވެރިއެއް ނުވާނަން ފައިސާ އިސްރާފުކުރާ އެއްވެސް ކަމެއްގައެއް،" އާޒިމް ވިދާޅުވި އެވެ.
ފުށިދިއްގަރު ފަޅުގެ މަޝްރޫއަކީ އިސްރާފެއް، ހުއްޓުވަންޖެހޭ!
ރައްޔިތުންގެ ފައިސާ އިސްރާފުކުރުމުގައި ބައިވެރިވެވަޑައިނުގަންނަވާނެ ކަމަށް ވިދާޅުވުމާ އެކު އާޒިމް ސިފަކުރެއްވި ގޮތުގައި، މާލެ އަތޮޅު ފުށިދިއްގަރު ފަޅު ހިއްކައި އެތަނުގައި މީހުން އާބާދުކުރައްވަން ރައީސް ޑރ.މުހައްމަދު މުއިއްޒުގެ ސަރުކާރުން ހިންގަން އުޅޭ މަޝްރޫއަކީ "ފައިސާ އިސްރާފުކުރުމުގެ" މަޝްރޫއެކެވެ. އެއީ ހުއްޓުވަން ޖެހޭ މަޝްރޫއެއް ކަމަށް ވެސް އޭނާ ވިދާޅުވި އެވެ.
"އެެއީ، އެބޭފުޅުން ބުނާ ގޮތުގައި ވެއްޖެއްޔާ މި ގައުމު މިއޮތީ ދަރައި ވިކިފައި. އެހެންވެެއްޖެއްޔާ ހުރި ފައިސާއަކުން އަޅުގަނޑުމެން އެބަ ޖެހޭ ވީހާ ވެސް އަވަހަކަށް އެންމެ އުނދަގޫ ކަންތައްތައް ހައްލުކުރުމަށް ޓަކައި އަވަސް ހައްލުތަކެއް ހޯދައިދޭން،" އާޒިމް ވިދާޅުވި އެވެ.
އަވަސް ހައްލު ހޯދައިދެވޭނީ އާޒިމް ވިދާޅުވި ގޮތުގައި މާލޭ މީހުންނަށް ބޯހިޔާވަހިކަން ހޯދައިދޭން އެމްޑީޕީ ސަރުކާރުން ފަށާފައިވާ މަޝްރޫއުތައް އަވަސްކޮށްގެންނެވެ.
އެ މަޝްރޫއުތަކަކީ ގިރާވަރާއި ގުޅިފަޅާއި ހުޅުމާލޭގެ މަޝްރޫއު އެވެ. އެތަންތަނުން 9000 އަށް ވުރެ ގިނަ ގޯތި މިހާރު ވަނީ ދޫކޮށްފަ އެވެ. އާޒިމް ފާހަގަ ކުރެއްވި ގޮތުގައި މިވަގުތަށް މުހިއްމީ ގިނަ އަދަދެއްގެ ފައިސާ ހަރަދުކޮށްގެން ފުށިދިއްގަރުފަޅު ހިއްކުމުގެ ބަދަލުގައި ދޫކޮށްފައިވާ ގޯތިތައް ތަރައްގީކޮށް މީހުން އާބާދުކުރުމެވެ.
ރައީސް މުއިއްޒުގެ ހުވަފެނީ ޕްރޮޖެކްޓަށް ފުށިދިއްގަރުފަޅު ހިއްކައި ގޮނޑުދޮށް ހިމާޔަތްކުރަން މަދުވެގެން 500 މިލިއަން ޑޮލަރު ހަރަދުވާނެ ކަމަށް ލަފާ ކުރެއްވޭ ކަމަށް އާޒިމް ވިދާޅުވި އެވެ. އެ ސަހަރުގެ ތަރައްގީ އަށް އެވަރު ހަރަދުކުރާއިރު، އެއީ ފެރީގައި ދެ ގަޑިއިރުން ދެވޭހާ ދުރުގައި އޮތް ތަނަކަށް ވުމާއެކު އާބާދުކުރުމަކީ ފަސޭހަ ކަމަކަށް ނުވާނެ ކަމަށް އާޒިމް ވިދާޅުވި އެވެ.
