ފުލުހުންގެ ވަޒީފާއިން ވަކިކޮށްފައިވާ އޮފިސަރުންނާއި ވަކިކުރަން ނިންމާފައިވާ ސީނިއާ އޮފިސަރުންނަށް ވަޒީފާ ދިނުން މަޑުޖައްސާލުމަށް ހައިކޯޓުން ނެރުނު އަމުރު މުރާޖާކުރަން ޖެހޭ ސަބަބެއް ނެތް ކަމަށް އެ ކޯޓުން މިއަދު ނިންމައިފި އެވެ.
މިދިޔަ އޯގަސްޓު 9، ގައި ފުލުހުންގެ ބޯޑުން ވަކި ކުރަން ނިންމި ހަތް އޮފިސަރުންނަކީ އެސިސްޓެންޓް ކޮމިޝަނާ ފަރުހާދު ފިކުރީ އާއި އެސިސްޓެންޓް ޕޮލިސް ކޮމިޝަނަރުންގެ މަގާމުގައި ތިއްބެވި މުހައްމަދު ޖަމްޝީދާއި އަހްމަދު މުހައްމަދު (ޓޫފޯ) އާއި ޗީފް ސުޕްރިންޓެންޑެންޓް އޮފް ޕޮލިސްގެ މަގާމުގައި ތިއްބެވި އަހްމަދު ޝުހާދާއި އަބްދުﷲ ޝަރީފާއި ސުޕްރިންޓެންޑެންޓް އޮފް ޕޮލިސްގެ މަގާމުގައި ތިއްބެވި މުހައްމަދު ދާއޫދު އަދި އިސްމާއިލް ޝަމީމެވެ.
އެ އޮފިސަރުން ވަކިކުރަން ނިންމި ނިންމުން ބާތިލްކުރުމަށް ސިވިލް ކޯޓުން މީގެ ކުރިން ނިންމި އެވެ. އެ މައްސަލަ ދައުލަތުން ވަނީ ސިވިލް ކޯޓުގައި އިސްތިއުނާފްކޮށްފަ އެވެ.
ހައިކޯޓުން މިއަދު ނިންމީ ޖަމްޝީދާއި އަހުމަދު މުހައްމަދު ފިޔަވައި ހުރިހާ އޮފިސަރުން މިވަގުތު ތިބީ ވަޒީފާގައި ކަމަށްވުމާއެކު އަދިވެސް އޮތީ އަމުރު ނެރުނު އިރު އޮތް ހާލަތު ކަމުން، އަމުރު މުރާޖާ ކުރަން ޖެހޭ އެއްވެސް ސަބަބެެއް ނެތް ކަމަށެވެ.
ޕޮލިސް ބޯޑުން މި މައްސަލަ އިސްތިއުނާފްކުރުމަށް ނިންމި ނިންމުން އަނބުރާ ގެންގޮސްފައިވީ ނަމަވެސް، ދައުލަތުން މި މައްސަލާގައި ސްޓޭންޑު ބަދަލުކޮށްފައިނުވާ ކަމަށް ހައި ކޯޓުން ފާހަގަ ކުރި އެވެ.
ފުލުހުންގެ ސީނިއާ އޮފިސަރުންތަކެއް ވަކި ކުރުމަށް ނިންމީ ކޮރަޕްޝަނާއި ލާއިންސާނީ އަނިޔާ ފަދަ ޖަރީމާތަކުގެ ތުހުމަތު ކުރެވޭ އޮފިސަރުންގެ މައްސަލަތައް ބަލައި، ވަކި މުއްދަތެއްގެ ތެރޭގައި އެ މައްސަލަތަކާމެދު ގޮތެއް ނިންމަންޖެހޭނެ ކަމަށް އަލަށް ތައާރަފްކޮށްފައިވާ ފުލުހުންގެ ހިދުމަތުގެ ގާނޫނުން ލާޒިމުކޮށްފައި އޮތުމުންނެވެ.
އޮފިސަރުންގެ މައްޗަށް ކުރެވޭ ތުހުމަތު
އެސިސްޓެންޓް ޕޮލިސް ކޮމިޝަނަރު މުހައްމަދު ޖަމްޝީދު އާއި އެސިސްޓެންޓް ކޮމިޝަނާ އަހުމަދު މުހައްމަދު (ޓޫފޯ) މަގާމުން ވަކިކުރީ، ފުލުހުންގެ ލޯންޗުފަހަރު ރާއްޖޭން ބޭރުން މަރާމާތުކުރުމުގައި މަގާމުގެ ނުފޫޒު ބޭނުންކޮށްގެން ނާޖާއިޒު ފައިދާ ހޯދައިދިނުމުގެ ތުހުމަތުކުރެވި އެ މައްސަލަ އެންޓި ކޮރަޕްޝަން ކޮމިޝަނުން ބަލަމުންދާތީ އެވެ.
ސުޕްރިންޓެންޑެންޓް އިސްމާއިލް ޝަމީމް މަގާމުން ވަކިކުރަނީ އެމްއެމްޕީއާރުސީގެ ހިޔާނާތުގެ ފައިސާ ލިބިފައިވާ ކަމަށް ތުހަމަތުކުރެވި އެ މައްސަލަ ނެޝަނަލް އިންޓެގްރިޓީ ކޮމިޝަނާއި އެސެޓް ރިކަވަރީ ކޮމިޝަނުން ތަހުގީގުކުރާތީ އެވެ.
އެސިސްޓެންޓް ކޮމިޝަނާ ފަރުހާދު ފިކުރީ މަގާމުން ވަކިކުރަން ނިންމީ ތަހުގީގުކުރަމުން ދިޔަ ސީރިއަސް މައްސަލައެއްގެ ހެކި ނައްތާލި ކަމުގެ ތުހުމަތުގަ އެވެ. އެއީ ފުލުހުންގެ ތަހުގީގަށް އަތުލާފައި އޮތް ފޯނެއްގައި ހުރި ފޮޓޯތަކެއް ނައްތާލުމާ ގުޅިގެންނެވެ. މިކަން އޭނާ ކޮށްފައި ވަނީ ކުރީގެ ޕޮލިސް ކޮމިޝަނަރު ހަމީދު މަގާމާ ހަވާލުވެވަޑައިގެންނެވުމުގެ ކުރިންނެވެ.
މި މައްސަލައިގައި ފަރުހާދާމެދު ފިޔަވަޅު އެޅުމަށް ޕްރޮސިކިއުޓާ ޖެނެރަލްގެ އޮފީހުން އޭރު އަންގާފައި އޮތް ނަމަވެސް، ހަމައެކަނި ނިންމާފައި ވަނީ އޭނާ އަށް ނަސޭހަތް ދިނުމަށެވެ. ނަމަވެސް، އަލަށް އެކުލަވާލި ޕޮލިސް ބޯޑުން މި މައްސަލަ ނިއުޅައި އޭނާ ވަކިކުރަން ޖެހޭ ކަމަށް ނިންމިއެވެ.
ޗީފް ސުޕްރިންޓެންޑެންޓް އަބްދުﷲ ޝަރީފު މަގާމުން ވަކިކުރަން ނިންމީ، ސިޔާސީ ފަރާތެއް ބުނެގެން ކުށްވެރިޔަކު ދޫކޮށްލި ކަމަށް ކުރެވޭ ތުހުމަތުގަ އެވެ. އެ މައްސަލަ ނެޝަނަލް އިންޓެގްރިޓީ ކޮމިޝަނުން އަންނަނީ ބަލަމުންނެވެ.
ޗީފް ސުޕްރިންޓެންޑެންޓް އަހްމަދު ޝުހާދު ވަކިކުރަނީ ވެސް އެމްއެމްޕީއާރުސީގެ ހިޔާނާތުގެ ފައިސާ ލިބިފައިވާ ކަމަށް ތުހަމަތުކުރެވި އެ މައްސަލަ ނެޝަނަލް އިންޓެގްރިޓީ ކޮމިޝަނާއި އެސެޓް ރިކަވަރީ ކޮމިޝަނުން ތަހުގީގުކުރަމުންދާތީ އެވެ.
