މަނީލޯންޑަރިންގެ ކުށް ސާބިތުވެ 11 އަހަރުގެ ޖަލު ހުކުމެއް ތަންފީޒުކުރައްވަމުން ގެންދަވާ ކުރީގެ ރައީސް އަބްދުﷲ ޔާމީނު، އެމަނިކުފާނު އިސްވެ ހުންނަވާ އުފެއްދެވި ޕީޕަލްސް ނެޝަނަލް ފްރޮންޓު (ޕީއެންއެފް) އޮފީހަށް ވަޑައިގަތް މައްސަލަ ކަރެކްޝަންސް އިން ބަލަން ފަށައިފި އެވެ.
ކަރެކްޝަނުގެ މީޑިއާ އޮފިޝަލް އާމިނަތު ޔުސްރީން އަހުމަދު ވިދާޅުވީ ޔާމީނު ޕީއެންއެފް އޮފީހަށް ރޭ ވަޑައިގަތް މައްސަލަ ބަލަމުން އަންނަ ކަމަށެވެ. ނަމަވެސް އޭގެ އިތުރު ތަފުސީލެއް ނުދެއްވަ އެވެ.
ރައީސް ޔާމީން ޕީއެންއެފްގެ އޮފީހަށް ވަޑައިގަތީ އެ ޕާޓީއަށް ސޮއިކުރުމަށެވެ. އެކަމަށްޓަކާ ހާއްސަ ރަސްމިއްޔާތެއް ބާއްވައި، މީޑިއާ ކަވަރޭޖަށް ވެސް ޕާޓީން ދައުވަތު ދިނެވެ.
މިއީ ޔާމީނު ގެއަށް ބަދަލުކުރެއްވި ފަހުން ޕާޓީއެއްގެ އޮފީހަކަށް ވަޑައިގަތް މައްސަލަ ބަލާ ދެވަނަ ފަހަރެވެ. މީގެ ކުރިން އެމަނިކުފާނު ޕީޕީއެމްގެ އޮފީހަށް ވަޑައިގަތް މައްސަލައެއް ވެސް ބެލި އެވެ. އޭރު ފިޔަވަޅެއް އެޅިކަމެއް ނުވަތަ ނޫން ކަމެއް ވެސް ކަރެކްޝަނުން ހާމައެއް ނުކުރެ އެވެ.
ޔުސްރީން ވިދާޅުވީ ޖަލުތަކާ ޕެރޯލްގެ ގާނޫނުގައި ބުނާ ގޮތުން ގައިދީއަކަށް ސިޔާސީ ޕާޓީއަކަށް ސޮއިކުރުމަށް ހުރަހެއް ނެތް ކަމަށެވެ. ނަމަވެސް ހުކުމެއް ތަންފީޒުކުރަމުން ގެންދާ މީހަކު އެއްވެސް ސިޔާސީ ހަރަކާތެއްގައި ބައިވެރިވުން ގާނޫނާ ހިލާފު ކަމަށް ވިދާޅުވި އެވެ.
ރައީސް ޔާމީނު މާފުށީ ޖަލުގައި ހުންނެވުމަށް ފަހު ގެއަށް ބަދަލުކުރީ މިދިޔަ ރިޔާސީ އިންތިހާބުގައި އޭރުގެ ރައީސް އިބްރާހިމް މުހައްމަދު ސޯލިހުގެ މައްޗަށް ރައީސް ޑރ. މުހައްމަދު މުއިއްޒު ކުރި ހޯއްދެވުމާއެކު އެވެ. އިންތިހާބަށް ފަހު ބޭއްވި ފުރަތަމަ ޖަލްސާގައި ވެސް ރައީސް މުއިއްޒު ގޮވާލެއްވީ ޔާމީނު ގެއަށް ބަދަލުކުރުމަށެވެ.
އެމަނިކުފާނު ގެއަށް ބަދަލުކުރީ ގައުމުގެ މަސްލަހަތައްޓަކައި ކަމަށް ރައީސް ސޯލިހު އޭރު ވިދާޅުވި އެވެ.
ޔާމީން 11 އަހަރުގެ ހުކުމެއް ތަންފީޒުކުރައްވަމުން ގެންދަވަނީ އެމަނިކުފާނުގެ ވެރިކަމުގައި ހިނގި އެމްއެމްޕީއާރުސީގެ ބޮޑު ހިޔާނާތުގެ ތެރެއިން ވ. އާރަށް ކުއްޔަށް ދޫކުރުމުގެ ތެރެއިން އެމަނިކުފާނު 1.1 މިލިއަން ޑޮލަރު ރިޝްވަތުގެ ގޮތުގައި ނަންގަވައި އެ ފައިސާ ލޯންޑަކުރެއްވި މައްސަލަ ސާބިތުވެގެންނެވެ.
އޭގެ އިތުރުން، ރ. ފުއްގިރި ކުއްޔަށް ދޫކުރުމުގެ ތެރެއިން ވެސް ރިޝްވަތު ނަންގަވައި އެ ފައިސާ ލޯންޑަ ކުރެއްވި ކަމުގެ ތުހުމަތުގައި ޔާމީނުގެ މައްޗަށް ރިޝްވަތާއި މަނީ ލޯންޑަރިންގެ ކުށުގެ ދައުވާ އުފުލާފައި ވެ އެވެ. އެ މައްސަލަ އޮތީ ކްރިމިނަލް ކޯޓުގަ އެވެ.
