ކުރީގެ ރައީސް އަބްދުالله ޔާމީންގެ ބަންދަށް ލުއިދިނުމަށް ކަރެކްޝަންސްއާ އެކު އެކުލަވާލާފައިވާ ގަރާރާ ހިލާފުވެއްޖެނަމަ ފިިޔަވަޅު އަޅާނެ ކަމުގެ އިންޒާރު ދީފައި އޮއްވައި އެމަނިކުފާނު އިސްވެ އުފައްދަވާ ޕީޕަލްސް ނޭޝަނަލް ފްރޮންޓް (ޕީއެންއެފް) ގެ އޮފީހުގައި މިރޭ ބޭއްވި ސިޔާސީ ހަރަކާތެއްގައި އެ ޕާޓީއަށް ރަސްމީކޮށް އެމަނިކުފާނު ސޮއިކުރައްވައިފި އެވެ.
މިވަގުތު ވެސް ގެބަންދުގައި ހުންނެވި ޔާމީން ޕީއެންއެފްއަށް ސޮއިކުރެއްވީ މިރޭ އެ ޕާޓީގެ އޮފީހުގައި ބޭއްވި ރަސްމިއްޔާތެއްގަ އެވެ. ސޮއިކުރެއްވުމަށް ފަހު ޔާމީން ފޯމު ހަވާލުކުރެއްވީ ޕީއެންއެފްގައި އެންމެ އިސްކޮށް ހަރަކާތްތެރިވާ އެމަނިކުފާނުގެ ކެބިނެޓުގައި ޔޫތު މިނިސްޓަރުގެ މަގާމު ފުރުއްވި މަލީހު ޖަމާލްއާ އެވެ.
މިރޭގެ ރަސްމިއްޔާތުގައި އެމަނިކުފާނު ވާހަކަ ނުދައްކަވަ އެވެ. އޭގެ ބަދަލުގައި ވާހަކަ ދެއްކެވީ މަލީހުގެ އިތުރުން ޕީއެންއެފްގެ ތާއިދާ އެކު މާލެ ސިޓީގެ މޭޔަރުގެ މަގާމަށް ވާދަކުރައްވާ ކުރީގެ ޕޮލިސް ކޮމިޝަނަރު ހުސައިން ވަހީދު އެވެ.
ޔާމީނަށް ދިން ލުއިތަކާއެކު، ޕެރޯލް ގާނޫނާއި އެމަނިކުފާނު އެއްބަސްވެވަޑައިގެންނެވި އިގުރާރާ ހިލާފަށް ސިޔާސީ ހަރަކާތްތައް ހިންގަމުންދާތީ، ލުއިތައް އުވާލާނެ ކަމަށް ކަރެކްޝަންސްއިން އިންޒާރު ދީފައިވެ އެވެ.
ޕީއެންއެފްގެ ރެޖިސްޓްރީ ކުރުމަށް ހުށަހެޅުމުގެ ކުރިން އެ ޕާޓީގެ އޮފީހަށް ޔާމީން ވަޑައިގަތުމުން އެމަނިކުފާނުގެ މައްސަލަ ބަލާނެ ކަމަށް ކަރެކްޝަނުން މީގެކުރިން ބުނެފައިވެ އެވެ.
އެ ޕާޓީއަށް 3,000 މެމްބަރުން ހަމަކުރުމުގެ މަސައްކަތް ކުރިއަށްދާއިރު މިރޭ ވެސް އެ ޕާޓީއާ ގުޅުނު ބައެއް މީހުން ވަނީ މެމްބާޝިޕް ފޯމު ޔާމީންއާ ހަވާލުކޮށްފަ އެވެ.
ޕީއެންއެފްގެ މުއައްސިސެއްގެ ގޮތުގައި ހުންނަވާނީ އެމަނިކުފާނުގެ ދަރިކަލުން ޒެއިން ޔާމީން އަބްދުލްގައްޔޫމް އެވެ. އީސީގެ ގަވާއިދު ބުނާ ގޮތުން ޕާޓީއެއްގެ މުއައްސިސެއްގެ ގޮތުގައި ހުންނެވެނީ އެންމެ މީހަކަށެވެ.
ޒެއިންގެ އިތުރުން އެ ޕާޓީގެ މުއައްސިސުންގެ ގޮތުގައި ޔާމީން އާއި އެމަނިކުފާނުގެ ވެރިކަމުގައި ނައިބު ރައީސަކަށް ހުންނެވި ޑރ. މުހައްމަދު ޖަމީލު އަހުމަދާއި ކުރީގެ ސީޕީ ހުސައިން ވަހީދާއި މުލިއާގޭގެ ޗީފް އޮފް ސްޓާފް އަހުމަދު މުސްތަފާގެ އިތުރުން އަދްލީ އިސްމާއީލް އާއި ޑރ. ޖިހާދު ހަސަން އަދި ކަކާގޭ އަލީ އާދަމް ތިއްބަވާނެ ކަމަށް މީގެކުރިން ހާމަކޮށްފައިވެ އެވެ. މިއީ ޕީއެންއެފް އުފެއްދުމަށް އެންމެ އިސްކޮށް ހަރަކާތްތެރިވަމުންދާ ޔާމީނުގެ ވަފާތެރި ސަޕޯޓަރުންނެވެ.
