ދިވެހިރާއްޖެއާއި ތުރުކީވިލާތާ ދެމެދޮ އޮތް ޒަމާންވީ ގާތް ގުޅުން އިތުރަށް ވަރުގަދަ ކުރުމަށް ދެގައުމުގެ ދެމެދުގައި ކުރެވުނު މަޝްވަރާއާ އެއްގޮތަށް އެ ގައުމުގެ ވެރިރަށް، އަންކާރާގައި ދިވެހިރާއްޖޭގެ އެމްބަސީއެއް ގާއިމު ކުރުމަށް ރައީސް ޑރ. މުހައްމަދު މުއިއްޒު މިއަދު ނިންމަވައިފި އެވެ.
ތުރުކީވިލާތުގައި ދިވެހި އެމްބަސީއެއް ގާއިމު ކުރަން ރައީސް ނިންމެވީ މިއަދު ކުރިއަށް ގެންދިޔަ ވަޒީރުންގެ ބައްދަލުވުމުގައި މަޝްވަރާ ކުރެއްވުމަށްފަހު އެވެ.
ވަޒީރުންގެ ބައްދަލުވުމަށްފަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ރައީސް އޮފީހުގެ އަންޑާ ސެކެޓެރަރީ، މުހައްމަދު ފިރުޒުލް އަބްދުﷲ ހަލީލް ވިދާޅުވީ ތުރުކީވިލާތުގައި އެމްބަސީއެއް ގާއިމު ކުރުމުގެ މައިގަނޑު ބޭނުމަކީ ދެގައުމުގެ ދެމެދު އޮތް ގުޅުން ވަރުގަދަ ކުރުމުގެ އިތުރުން އެގައުމުގައި ދިރިއުޅޭ ދިވެހިންގެ ކަންކަން އިތުރަށް ފަސޭހަކޮށްދިނުމެވެ.
"މިއަދުގެ ތަފާސް ހިސާބުތަކަށް ބަލާއިރު، ފަތުރުވެރިކަމުގެ މަންޒިލެއްގެ ގޮތުގައި ވަރަށް ގިނަ އަދަދަކަށް ތުރުކީވިލާތަށް ދިވެހިން ޒިޔާރަތްކޮށް ދަތުރުކޮށް ހަދާ، އަދި ހަމައެހެންމެ، ވިޔަފާރީގެ އެކި ބޭނުންތަކާއި ތައުލީމުގެ އެކި ބޭނުންތަކަށް ވެސް ތުރުކީވިލާތުގައި ދިރިއުޅޭ ދިވެހިންގެ އަދަދު އަންނަނީ ދުވަހެއް ދުވަހަކަށް އިތުރުވަމުން،" ކުރިއަށް އޮތް ދުވަސްތަކުގައި އެ އަދަދު އިތުރުވަމުން ދާނެ ކަމަށް ބެލެވޭކަން ފާހަގަ ކުރައްވައި ފިރުޒުލް ވިދާޅުވި އެވެ.
އެ ނިންމުމާއެކު ތުރުކީވިލާތަށް ދަތުރު ކުރާ ދިވެހިންގެ ކަންކަން އިތުރަށް ފަސޭހަ ވާނެކަން ފާހަގަ ކުރައްވައި ފިރުޒުލް ވިދާޅުވީ ކުރިއަށް އޮތް ދުވަސްތަކުގެ ތެެރޭގައި އެކަމާ ގުޅޭގޮތުން ގާނޫނީ އަދި ހާރިޖީ ގޮތުން ފުރިހަމަ ކުރަންޖެހޭ ކަންކަން ފުރިހަމަ ކުރުމުގެ މަސައްކަތް ކުރަމުން ގެންދާނެ ކަމަށް ފިރިޒުލް ވިދާޅުވި އެވެ.
ރައީސް މުއިއްޒު ވެރިކަމާ ހަވާލުވެވަޑައިގެން ކުރެެއްވި ރަސްމީ ފުރަތަމަ ދަތުރުފުޅުގައި ތުރުކީއަށް ވަޑައިގެން އެގައުމުގައި ދިރިއުޅޭ ދިވެހިންނާ ކުރެއްވި ބައްދަލުވުމުގައި ދިވެހިން ވަނީ ތުރުކީގައި ދިވެހި އެމްބަސީއެއް ނެތުމުން ދިމާވާ ގޮންޖެހުންތަކުގެ ޝަކުވާ ހުށަހަޅައިފަ އެވެ. އެ ޝަކުވާތަކަށް ހައްލެއް ހޯދައިދެއްވާނެ ކަމަށް އެދުވަހު ރައީސް ވައުދުވެވަޑައިގެންނެވި އެވެ.
