މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) ގެ މެރިޓް އެވޯޑް ސީއެޗްއެސްއީ ގެ ހަތަރު ދަރިވަރަކަށް ދީފި އެވެ.
މިއީ އޭ ލެވެލް އަށް ކިޔަވައިދޭ އެ ސްކޫލުގެ ގްރޭޑް 11 ނިންމާ ދަރިވަރުންގެ ތެރެއިން އެންމެ މަތީ މާކްސް ހޯދާ އަންހެން ދެ ދަރިވަރުންނާއި، ފިރިހެން ދެ ދަރިވަރުންނަށް ދޭ އެވޯޑެކެވެ.
މި އަހަރު އެވޯޑް ލިބުނު ދަރިވަރުންނަކީ އިބްރާހީމް ރިފާއު، ހަސަން ލާޔާން މުހައްމަދު، އަފާފް އަހުމަދު މުސްތަފާ އަދި އައިޝަތު އީޝަލް އަހުމަދު އަސްލަމް އެވެ.
މި އެވޯޑާ އެކު، އެ ދަރިވަރުންނަށް ލެޕްޓޮޕް، އިންޓަނެޓް ޑާޓާ ޕެކޭޖް، އަދި އެއް އަހަރު ވަންދެން ކޮންމެ މަހަކު 2000 ރުފިޔާގެ އިނާޔަތެއް ދެ އެވެ.
މީގެ އިތުރުން އެމްއޭސީއެލް އިން ހިންގަމުން އަންނަ ވެލާނާ އިންޓަނޭޝަނަލް އެއާޕޯޓުގައި ދެ ދަރިވަރަކު ޝައުގުވެރިކަން ހުރި ދާއިރާއަކުން މަސައްކަތުގެ ތަޖުރިބާ އާއި ތަމްރީނު ހޯދުމުގެ ފުރުސަތު ފަހިކޮށްދެ އެވެ.
އެމްއޭސީއެލްގެ އިޖްތިމާއީ ޒިންމާގެ ދަށުން ދޭ މި އެވޯޑް އެ ދަރިވަރުންނަށް ހަވާލުކޮށްދެއްވީ އެ ކުންފުނީގެ އާ ސީއީއޯ އަދި މެނޭޖިން ޑިރެކްޓަރު އިބްރާހީމް ޝަރީފް މުހައްމަދެވެ.
މި ރަސްމިއްޔާތުގައި ޝަރީފް ވިދާޅުވީ މި އެވޯޑުގެ ސަބަބުން ދަރިވަރުންނަށް ކިޔެވުމުގައި އާ ހިތްވަރެއް ލިބިގެންދާނެކަމަށް އުއްމީދު ކުރާ ކަމަށެވެ. އަދި އެއާޕޯޓުގައި މިހާރު ހިންގަމުން އަންނަ މަޝްރޫއުތަކާ އެކު ގިނަ މުވައްޒަފުން ބޭނުންވާ ކަމަށާއި ކުރިމަގުގައި އެ މަގާމުތަކަށް ސީއެޗްއެސްއީ ނިންމާ ދަރިވަރުން ކުރިމަތިލާނެ ކަމަށް އުއްމީދުކުރާ ކަމަށް އޭނާ ވިދާޅުވި އެވެ.
މީގެ އިތުރުން ޝަރީފް ވަނީ ކުރިއަށް އޮތްތަނުގައި ކުންފުނީގައި ހުރި ވަޒީފާތަކަށް މުވައްޒަފުން ހޯދުމުގެ ގޮތުން ސްކޫލް ނިންމާ ދަރިވަރުންނަށް ހާއްސަކުރެވޭ އިންޓާންޝިޕް ޕްރޮގްރާމެއް ތައާރަފްކުރައްވާނެ ކަމަށް ވިދާޅުވެފަ އެވެ.
މިއީ އެ ސްކޫލުގެ ދަރިވަރުންނަށް ކުންފުންޏަކުން އިސްނަގައިގެން އެވޯޑެއް ދެވޭ ފުރަތަމަ ފަހަރުކަން ފާހަގަކުރައްވައި ސީއެޗްއެސްއީގެ ޕްރިންސިޕަލް އާއިޝަތު ސަފޫރާ ވިދާޅުވީ މީގެ ސަބަބުން ދަރިވަރުންނަށް ކިޔެވުމައިގެން ކުރިއަށް ދިއުމަށް އިތުރު ހިތްވަރެއް ލިބިގެންދާނެ ކަމަށެވެ.
