ސީލައިފް ފްލެޓްތަކުގެ މައްސަލައިގައި ހިޔާނާތުގެ ދައުވާ އުފުލާފައިވާ އެ ކުންފުނީގެ ވެރިޔާ އަޙްމަދު މޫސާ މުޙައްމަދު (އަންމަޓީ)ގެ ޕާސްޕޯޓު ހިފެހެއްޓުމުގެ އަމުރެއް ނެރެދިނުމަށް ޕްރޮސެކިޔުޓަރ ޖެނެރަލް އޮފީހުން ހައި ކޯޓުގައި އެެދިއްޖެ އެވެ.
އަންމަޓީ ބޭސްފަރުވާއަށް ރާއްޖެއިން ބޭރަށް ދާން ކްރިމިނަލް ކޯޓުން ހުއްދަ ދިނީ މިއަދު އެވެ.
ކްރިމިނަލް ކޯޓަށް ހުށަހަޅަފައިވާ ހިޔާނާތްތެރިވުމުގެ ކުށުގެ 42 ދައުވާއާ ގުޅިގެން ކްރިމިނަލް ކޯޓުން ޖޫން 16، 2021 ވަނަ ދުވަހު އަންމަޓީގެ ޝަރީއަތް ނިމެންދެން ފުރުން މަނާކޮށް ޕާސްޕޯޓު ހިފެހެއްޓުމަށް މޯލްޑިވްސް އިމިގްރޭޝަން އަށް އަމުރު ކޮށްފައިވެ އެވެ.
އަދި, އެ އަމުރު މުރާޖައާ ކުރުމަށް އެދި އަންމަޓީގެ ފަރާތުން ނޮވެންބަރު 29، 2023 ގައި އެދުމުން، މި އަހަރުގެ ޑިސެމްބަރު މަހުގެ ހަވަނަ ދުވަހު ދުވަހު ޕާސްޕޯޓު ދޫކޮށްދިނުމަށް އަމުރެއް ނެރެފައިވެ އެވެ.
އެ އަމުރު ރާއްޖޭގެ ހައިކޯޓުގައި އިސްތިއުނާފު ކުރުމަށް ނިންމައި، ޕާސްޕޯޓް ހިފެހެއްޓުމުގެ ވަގުތީ އަމުރެއް ނެރެދިނުމަށް ހައި ކޯޓުގައި ޕީޖީ އޮފީހުން އެދިފައިވާ ކަމަށް އެ އޮފީހުން ބުނެފައިވެ އެވެ.
ރާއްޖޭން ބޭރަށް ފުރުމުގެ ހުއްދަ ދިނުމަށް އަހުމަދުގެ ފަރާތުން ހުށަހެޅީ މައިބަދައިގެ އޮޕަރޭޝަނެއް ކުރަންޖެހޭތީ ކަމަށް ބުނެ އެވެ. އެ ހުށަހެޅުން ބެލުމަށް ފަހުން ކޯޓުން ނިންމީ، ބޭސްފަރުވާ އަށް ރާއްޖޭން ބޭރަށް ދިޔުމަށް 20 ދުވަހުގެ ހުއްދަ ދިނުމަށެވެ. އެއީ މި މަހު ހަވަނަ ދުވަހުން ފެށިގެން 26 ވަނަ ދުވަހުގެ ނިޔަލަށެވެ.
ކޯޓުން ބުނީ އަހުމަދުގެ ފަރާތުން ހުށަހަޅާފައިވާ މެޑިކަލް ލިޔެކިޔުންތަކަށް ބަލާއިރު އޭނާގެ މައިބަދައިގެ އޮޕަރޭޝަނެއް ކުރުމަށް ޑޮކްޓަރު ލަފާދީފައިވާ ކަމަށެވެ.
އަންމަޓީގެ މައްޗަށް 42 ދައުވާއެއް އުފުލީ، ކުރީގެ ރައީސް އަބްދުﷲ ޔާމީންގެ ވެރިކަމުގެ ކުރީކޮޅުގައި އޭރުގެ އެޗްޑީސީ (މިހާރު އާބަންކޯ) އާއި ސީލައިފްއާ ދެމެދު ވެފައިވާ އެއްބަސްވުމެއްގެ ދަށުން ހުޅުމާލޭގައި 3000 ހައުސިން ޔުނިޓް އެޅުމުގެ މަޝްރޫއުގެ އަމަލީ މަސައްކަތް ފުރިހަމަނުކޮށް، މަކަރާއި ހީލަތުން އެކި މީހުން އަތުން ބޮޑެތި އަދަދުތަކުން ފައިސާ ނަގައި، އެ ފައިސާއަށް ހިޔާނާތްތެރިވެފައިވާ ކަމުގެ ތުހުމަތުގަ އެވެ.
މި މައްސަލައިގައި އޭނާގެ ޝަރީއަތް ކުރިޔަށް ދާއިރު އޭނާ ހުރީ ޝަރުތުތަކާއެކު ބަންދުން ދޫކޮށްލައިފަ އެވެ.
އަހުމަދުގެ މައްޗަށް ކުރި ތުހުމަތުތަކުގެ މައްސަލައިގައި ހޯދުމަށް ރެޑް ނޯޓިސް ނެރެފައިވަނިކޮށް އޭނާ ހައްޔަރުކުރީ ލަންކާގައި އުޅެނިކޮށެވެ.
