އެމްޑީޕީގެ ވަގުތީ ރައީސް އަދި ރާއްޖޭގެ ކުރީގެ ރައީސް އިބްރާހިމް މުހައްމަދު ސޯލިހު އެ ޕާޓީގެ ރައްޔިތުންގެ މަޖިލީހުގެ މެންބަރުންނާ ބައްދަލުކުރައްވައިފި އެވެ.
އެމްޑީޕީގެ ރަސްމީ އެކްސް އެކައުންޓުގައި ކުރި ޕޯސްޓެއްގައި މި ބައްދަލުވުން ބޭއްވިކަން އިއުލާނުކުރި ނަމަވެސް އިތުރު ތަފުސީލެއް ނުދެ އެވެ.
ސޯލިހުގެ އިތުރުން އެ ޕާޓީގެ ޗެއާޕާސަން ފައްޔާޒު އިސްމާއިލް އަދި ތަރުޖަމާނު އަނަސް އަބްދުލްސައްތާރު ވެސް އެ ބައްދަލުވުމުގައި ބައިވެރިވި އެވެ. އެމްޑީޕީގެ ޕީޖީ ގްރޫޕުގައި މިވަގުތު ހިމެނެނީ މަޖިލީހުގެ 56 މެންބަރުންނެވެ.
އޭގެ ތެރޭގައި މަޖިލީހުގެ ރައީސް، ހިތަދޫ އުތުރު ދާއިރާގެ މެންބަރު މުހައްމަދު އަސްލަމް އަދި ނައިބު ރައީސް ހޯރަފުށީ ދާއިރާގެ މެންބަރު އަހުމަދު ސަލީމްވެސް ހިމެނެ އެވެ.
އެމްޑީޕީ ޕީޖީ އާއެކު ސޯލިހު މި ބައްދަލުވުން ބާއްވާފައި މިވަނީ އެ ޕާޓީގެ މެޖޯރިޓީ އޮންނަ މަޖިލީހުން މުހިންމު މަސައްކަތްތަކެއް ކުރަމުންދާ ދަނޑިވަޅެއްގަ އެވެ. އެގޮތުން މަޖިލީހުގެ ދައުރު މި މަހުގެ 18 އަށް ދިގުކޮށް މިވަގުތު ދަނީ އަންނަ އަހަރަށް ދައުލަތުން ލަފާކުރާ ބަޖެޓުގެ މަސައްކަތް ކުރަމުންނެވެ.
އާ ސަރުކާރުގެ ކެބިނެޓަށް ރައީސް ޑރ. މުހައްމަދު މުއިއްޒު އައްޔަންކުރެއްވި 22 ވަޒީރުންނަށް ރުހުން ދިނުމުގެ މަސައްކަތްވެސް އަދި އޮތީ މަޖިލީހުގަ އެވެ.
