މާލޭގެ މޭޔަރާއި ކައުންސިލްގެ ބައެއް ދާއިރާތަކަށް މެމްބަރުން ހޮވަން ބާއްވާ ބައި-އިލެކްޝަނުގައި އެމްޑީޕީގެ ފަރާތުން ވާދަކުރާ ކެންޑިޑޭޓުން ހޮވަން، ބާއްވަން އުޅުނު ޕްރަައިމަރީއަށް، ދާއިރާއަކުން އެކަކު ފިޔަވައި ފޯމު ހުށަހަޅާފައި ނުވާތީ ވޯޓަކާ ނުލައި ޓިކެޓު ދޭން އެޕާޓީން ނިންމައިފި އެވެ.
އެމްޑީޕީގެ ސެކްރެޓޭރިއަޓުން މައުލޫމާތު ދިން ގޮތުގައި މާލޭގެ މޭޔަރުކަމަށް އެޕާޓީން ނެރޭނެ ކެންޑިޑޭޓަކަށް ވެވަޑައިގަންނަވަން ފޯމު ހުށަހެޅުއްވީ އެމްޓީސީސީގެ މެނޭޖިން ޑިރެކްޓަރް އާދަމް އާޒިމް އެކަންޏެވެ. މާލޭ ސިޓީ ކައުންސިލުގައި މިހާރު މެމްބަރަކު ނެތް ދާއިރާތައް ކަމަށްވާ، މެދު ހެންވޭރު ދާއިރާ، ހެންވޭރު ދެކުނު ދާއިރާ އަދި މާފަންނު ދެކުނު ދާއިރާއަށް ވާދަކުރައްވަން ވެސް ހުށަހެޅުއްވީ ކޮންމެ ދާއިރާއަކަށް ބޭފުޅެކެވެ.
އެމްޑީޕީގެ ޕްރަައިމަރީގައި ވާދަކުރަން ހުށަހެޅުއްވި ބޭފުޅުން
- މާލޭގެ މޭޔަރު ކަމަށް ވާދަކުރަން: އާދަމް އާޒިމް/ސީނުކަރަންކާގެ، މާލެ.
- މެދު ހެންވޭރު ދާއިރާ: އަޙްމަދު ރިޝްވާން ރަޝީދު – ހ. ވޭމައުތު / މާލެ
- ހެންވޭރު ދެކުނު ދާއިރާ: ޙައްވާ ނިޙްލާ – ހ. ތަރަބޫޒުގެ / މާލެ
- މާފަންނު ދެކުނު ދާއިރާ: އަޙްމަދު ޢިމްރާން – މ. ފަޅުމަތީގެ / މާލެ
އެމްޑީޕީން ބުނީ ކޮންމެ ދާއިރާއަކަށް ޝައުގުވެރިކަން ފާޅުކުރެއްވީ އެއް ކެންޑިޑޭޓް ކަމަށް ވާތީ ޕްރައިމަރީއަކާ ނުލައި ޓިކެޓު ދޭން ނިންމާފައިވާ ކަމަށެވެ.
