ދަ ޑިމޮކްރެޓްސްގެ ފުރަތަމަ އެތެރޭގެ އިންތިހާބު މިއަދު ރާއްޖޭގެ އެކި ހިސާބުތަކުގައި ފަށައިގެން އެބަ ކުރިއަށްދެ އެވެ.
ޕާޓީގެ އެކި މަގާމްތަކަށް މީހުން އިންތިހާބު ކުރުމަށް ބާއްވާ އިންތިހާބު މިއަދު ހެނދުނު 10:00 އިން ހަވީރު 4:00 އާ ހަމައަށް ކުރިއަށް ދާނެ އެވެ.
ހަތަރެއް ޖެހުމުގެ ކުރިން ވޯޓު ލާ ނިމުނު ކަމުގައި ވިޔަސް، ވޯޓު ފޮށި ގުނަން ފަށާނީ ހަތަރެއް ޖެހުމުން ކަމަށް އެ ޕާޓީއިން ބުނެ އެވެ.
ޕާޓީގެ ރައީސް ކަމަށް ވާދަކުރައްވަނީ ނިމިދިޔަ ސަރުކާރުގައި އެސްޓީއޯގެ މެނޭޖިން ޑިރެކްޓަރުކަން ކުރެއްވި ހުސެއިން އަމްރު އާއި ހެންވޭރު ހުޅަނގު ދާއިރާގެ މެމްބަރު އަދި މިވަގުތު ޑިމޮކްރެޓްސްގެ އިންޓެރިމް ޗެއާޕާސަން ހަސަން ލަތީފެވެ.
ޑިމޮކްރެކްޓްސްގެ ފުރަތަމަ އެތެރޭގެ އިންތިހާބުގައި ވޯޓު ލަނީ ރައީސް، ނައިބް ރައީސް (އާންމު)، ނައިބް ރައީސް (އަންހެން)، ނައިބް ރައީސް (ޒުވާން)، ވިމެން ޑިމޮކްރެޓްސް ލީޑަރު، ވިމެން ޑިމޮކްރެޓްސް ޑެޕިއުޓީ ލީޑަރު، ޔަންގް ޑިމޮކްރެކްޓްސް ލީޑަރު އަދި ޔަންގް ޑިމޮކްރެޓްސް ޑެޕިއުޓީ ލީޑަރު ހޮވުމަށެވެ.
ޕާޓީގެ އެތެރޭގެ އިންތިހާބަށް ވެސް ވާދަވެރި ކެމްޕެއިނެއް ކޮށްފައިވެ އެވެ. މަގާމްތަކަށް ވާދަކުރައްވާ ބޭފުޅުން އެކި ރަށްތަކަށް ޒިޔާރަތްކުރައްވާ ކެމްޕެއިން ކުރައްވާފައިވެ އެވެ.
ޑިމޮކްރެޓްސް ޕާޓީން ވަނީ މިދިޔަ ރިޔާސީ އިންތިހާބުގައި ވެސް ވާދަ ކޮށްފަ އެވެ. ރިޔާސީ ކެންޑިޑޭޓުގެ ގޮތުގައި އިލްޔާސް ލަބީބް ވާދަކުރައްވާ، އެ ޕާޓީއަށް ލިބުނީ ހަތް ޕަސެންޓު ވޯޓު ލިބުނެވެ. ވާދަ ކުރި އަށް ކެންޑިޑޭޓުންގެ ތެރެއިން އިލްޔާސް ވަޑައިގަތީ ތިންވަނައަށެވެ. ދެވަނަ ބުރުގައި އެއްވެސް ކެންޑިޑޭޓަކަށް އެ ޕާޓީން ތާއީދުކޮށްފައެއް ނުވެ އެވެ.
