މި ސަރުކާރުން މާލެ ސަރަހައްދުގެ ބޯހިޔާވަހިކަމުގެ މަޝްރޫއު ހިންގަން ހިއްކުމަށް ނިންމާފައިވާ ފުށިދިއްގަރުފަޅަކީ، މިވަގުތަށް ބޭނުންވާ ތަނެއް ނޫން ކަމަށް، އިދިކޮޅު އެމްޑީޕީގެ ފަރާތުން މާލޭގެ މޭޔަރުކަމަށް ވާދަކުރައްވަން ޓިކެޓް ހޯއްދަވަން މަސައްކަތްކުރައްވާ އާދަމް އާޒިމް ވިދާޅުވެއްޖެ އެވެ.
އެމްޑީޕީ ސަރުކާރުން ބޯހިޔާވަހިކަމުގެ ޕްރޮޖެކްޓް ހިންގަން ރާވާފައި އޮތީ ގުޅިފަޅާއި، ގިރާވަރުފަޅާއި، އުތުރުތިލަފަޅުގަ އެވެ.
މާލޭގެ މޭޔަރު ކަމަށް ހޮވިއްޖެ ނަމަ އެންމެ އިސްކަން ދެއްވާނެ ކަމަކީ މާލޭ ރައްޔިތުން ދަތި ހާލުން ސަލާމަތްކުރަން އެހެން ދިމާލަކުން ހައްލެއް ހޯދުން ކަމަށް ވިދާޅުވެ އާޒިމް ފާހަގަކުރެއްވި ގޮތުގައި މިހާރު ވެސް، އެންމެ އިސްކަމެއް ދީގެން ކުރަންވީ ކަމަކީ، ކުރީ ސަރުކާރުން އެކަމަށް ރާވާފައި އޮތް ފަޅުތަކާއި، ރަށްތަކުގައި އެ ޕްރޮޖެކްޓް ހިންގުން ކަމަށެވެ.
"ފުށިދިއްގަރުފަޅު އެއީ މިވަގުތަށް ބޭނުންވާ ތަނެއް ނޫން. އެއީ ހަމަ ސީދާ ރައްޔިތުންގެ ފައިސާ ބޭކާރުކުރުން،" އާޒިމް ވިދާޅުވި އެވެ.
"ކުރަންވީ ގުޅިފަޅު، ގިރާވަރު އަދި އުތުރުތިލަފަޅު ތަރައްގީކޮށް އަވަހަށް އެތަންތަނަށް މީހުން ގެންދިޔުމަށް މަސައްކަތް."
އާޒިމް ވިދާޅުވީ ދައުލަތުގެ ފައިސާއިން ކުރަންޖެހޭ އެންމެ މުހިންމު ކަމަކީ އާންމުންނަށް ފަސޭހައިން ދިރި އުޅެވޭނެ ގޮތެއް ހަދައިދިނުން ކަމަށެވެ. އެކަަމަށް، އެންމެ އަވަހަށް ކުރެވެން އޮތް ކަމަކީ އެމްޑީޕީގެ ސިޔާސަތާ އެއްގޮތަށް ގުޅިފަޅު، ގިރާވަރު އަދި އުތުރު ތިލަފަޅު ތަރައްގީކޮށް، އަސާސީ ހިދުމަތް ގާއިމްކުރުމާއެކު އެތަންތަން އާބާދުކުރުން ކަމަށެވެ.
އެ ތިން ރަށް ގުޅާލަން ބުރިޖު ވެސް އެޅޭނެ ކަމަށާއި އެހެންނަމަވެސް، ފުށިދިއްގަރުފަޅަށް ބުރިޖު އެޅުމަކީ ކުރެވޭނެ ކަމެއް ނޫންކަމަށް އާޒިމް ވިދާޅުވި އެވެ.
އާޒިމް ވިދާޅުވީ އެމްޑީޕީގެ ސިޔާސަތުތަކަކީ އެހެން ސަރުކާރުތަކުން އެކަން ކުރުން މަޖުބޫރުވާ ފަދަ ރަނގަޅު ސިޔާސަތުތަކެއް ކަމަށެވެ. މިސާލެއްގެ ގޮތުގައި އާސަންދަ، ދަތުރުފަތުރުގެ ނިޒާމް، އަދި ބޯހިޔާވަހިކަމުގެ ސިޔާސަތު އާޒިމް ފާހަގަކުރެއްވި އެވެ.
އާޒިމަކީ ރައީސް އިބްރާހިމް މުހައްމަދު ސޯލިހުގެ ވެރިކަމުގައި އެންމެ ފުރަތަމަ އެމްޑަބްލިޔުއެސްސީ ގެ މެނޭޖިން ޑިރެކްޓަރެވެ. ނަމަވެސް 2020 ވަނަ އަހަރު އެމްޓީސީސީ އޭނާއާ ހަވާލުކުރެއްވީ އެވެ.
އެމްޓީސީސީގެ މެނޭޖިން ޑިރެކްޓަރު ކަމުގެ މަގާމުގައި ފާހަގަކޮށްލެވޭ ކުރިއެރުންތަކެއް އާޒިމް ހޯއްދަވާފައިވެ އެވެ. އެގޮތުން މާލެ ސިޓީގެ ބަހުގެ ހިދުމަތް ފުޅާކޮށް، މިނީ ބަހުގެ ހިދުމަތް ތައާރަފްކޮށް، އާރްޓީއެލްގެ ހިދުމަތް ފައްޓަވައި ދެއްވާފައިވެ އެވެ.
އާ ސަރުކާރާއެކު ހުސްވި ކައުންސިލް ގޮނޑިތަކަށް ވާދަ ކުރާނެކަން އިއުލާންކޮށް، ވާދަކުރައްވަން ބޭނުންފުޅުވާ ބޭފުޅުން ޝައުގުވެރިކަން ފާޅުކުރުމަށް އެމްޑީޕީން ހުޅުވާލީ މި މަހުގެ 28 ވަނަ ދުވަހު އެވެ. އެ ފުރުސަތު މާދަމާގެ ހަވީރު 4:00 އާ ހަމައަށް އޮތީ ހުޅުވާލާފަ އެވެ. މިހާތަނަށް މާލެ ސިޓީގެ މޭޔަރުކަމަގެ ޓިކެޓަށް ވާދަ ކުރެއްވުމަށް އެމްޑީޕީން ހުށަހެޅީ އާޒިމް އެކަންޏެވެ.
