ރިޔާސީ އިންތިހާބުގެ އެންމެ ފަހު ދުވަސްކޮޅު ޕީޕީއެމް ދޫކޮށް އެމްޑީޕީއާ ގުޅުނު ރައީސް ޔާމީންގެ ކުރީގެ ލޯޔަރު، އާދަމް އާސިފް އެޕްޑީޕީ ދޫކޮށް ޕީޕަލްސް ނެޝަނަލް ފްރޮންޓްއަށް ސޮއިކޮށްފި އެވެ.
އާދަމް އާސިފް ޕީއެންއެފްއަށް ސޮއިކޮށްފައި ވަނީ އެ ޕާޓީ އުފެއްދުމުގެ މަސައްކަތް ކުރަމުން އަންނަ ކުރީގެ ޕީޕީއެމް އޮފީހުގައި، ރޭގަ އެވެ.
ލޯޔަރު އާސިފް ވަނީ ރައީސް ޔާމީން މިނިވަން ކުރުމަށް ގޮވާލައި ޕީޕީއެމުން ކުރި މުޒާހަރާތަކާއި އިންޑިއާ ސިފައިން ރާއްޖޭގައި ތިބުމާ ދެކޮޅަށް ހިންގި ހަރަކާތްތަކުގައި އިސްކޮށް ހަރަކާތްތެރިވެފަ އެވެ.
ނަމަވެސް, ރައީސް ޔާމީނަށް ނިމިދިޔަ ރިޔާސީ އިންތިހާބުގައި ވާދަ ނުކުރެއްވޭނެ ކަމަށް ސުޕްރީމް ކޯޓުން ހުކުމް ކުރުމާ ގުޅިގެން މިހާރު ރައީސް، ޑރ. މުހައްމަދު މުއިއްޒުއަށް ކެންޑިޑެސީ ދިނުމާ ހަމައިން އާސިފް ވަނީ އެ ކޯލިޝަނުގެ ހަރަކާތްތަކުން ފެޔަށް ޖެހިފަ އެވެ. އެކަމާ ގުޅިގެން ޕީއެންސީ/ޕީޕީއެމްގެ އާންމު މެންބަރުންގެ ނުރުހުން ވެސް އާސިފްއަށް އަމާޒުވި އެވެ.
ސްކޫލު ދައުރު ނިންމުމަށް ފަހު އާސިފު ފުރަތަމަ ގުޅުނީ މޯލްޑިވްސް ޕޮލިސް ސާވިސްއާ އެވެ. ގިނަ ދުވަސްތަކެއް ވަންދެން ހިދުމަތް ކުރުމަށްފަހު ފުލުހުންގެ ވަޒީފާއިން ވަކިވެ މިހާރު މަސައްކަތް ކުރަނީ ގާނޫނީ ވަކީލެއްގެ ގޮތުގަ އެވެ.
