ޕީއެންސީ/ޕީޕީއެމްގެ ލީޑަޝިޕާއި ރައީސް ޔާމީންއާއި ހިޔާލުތަފާތުވެ އެ ކޯލިޝަން ދެފަޅިވެފައި ވަނިކޮށް ޕީއެންސީގެ ރަސްމީ އެކްސް އެކައުންޓު ސަސްޕެންޑުކޮށްފި އެވެ.
ޕީއެންސީގެ ރަސްމީ އެކްސް އެކައުންޓު، @congress_mv ސަސްޕެންޑު ކޮށްފައި ވަނީ ސީދާ ކޮން ސަބަބަކާ ގުޅިގެން ކަމެއް މިހައިތަނަށް ސާފެއް ނުވެ އެވެ. އެކްސްއިން އެ އެކައުންޓަށް ޒިޔާރަތް ކުރުމުން ފެންނަން ހުންނަ މެސެޖުގައި އޮންނަނީ އެކައުންޓު ސަސްޕެންޑު ކޮށްފައި ވަނީ އެކްސްގެ ގަވާއިދުތަކާ ހިލާފުވުމުން ކަމަށެވެ. އެކަމާ ގުޅޭގޮތުން ޕީއެންސީގެ ބަހެއް ވަނީ އަދި ލިބޭ ގޮތް ނުވެފަ އެވެ.
ޕީއެންސީގެ ރަސްމީ އެކްސް އެކައުންޓަށް ޒިޔާރަތް ކުރުމުން ފެންނަން ހުންނަ މެސެޖު
ޕީއެންސީގެ ރަސްމީ އެކްސް އެކައުންޓު މިއަދު ސަސްޕެންޑު ކުރިއިރު، އެ ޕާޓީގެ އެކްސް އެކައުންޓުން މިދިޔަ ދެތިން ދުވަހު ގެންދިޔައީ ޕާޓީއަށް އަލަށް ސޮއި ކުރާ މެންބަރުންގެ ފޯމުތަކުގެ އަދަދާއި މެންބަރުން ފެންނަ ޕޯސްޓުތައް ހިއްސާ ކުރަމުންނެވެ. އެ ޕާޓީން ރޭގައި ބުނެފައި ވަނީ މިހައިތަނަށް 10،000 އަށްވުރެ ގިނަ ފޯމު އިލެކްޝަނަށް ހުށަހަޅައިފައި ވާނެ ކަމަށެވެ. އަދި ޕްރޮސެސިންގައި ހުރި ފޯމުގެ އަދަދު 6000 އަށްވުރެ މަތިވާނެ ކަމަށް ވެސް އެ ޕާޓީން ބުންޏެވެ.
ރައީސް ޔާމީން އެ ކޯލިޝަނާ ދުރަށް ވަޑައިގެންނެވުމާއެކު މިދިޔަ ހުކުރު ދުވަހު ދުވަހު ވަނީ ހ. ހުރަފާގައި ހުންނަ ޕީޕީއެމްގެ އޮފީސް ވެސް ހުސް ކުރަން އަންގައިފަ އެވެ. އެތަނުގައި މިހާރު ހިންގަމުން ގެންދަނީ ޒޭން އަބްދުﷲ ޔާމީންގެ މުއައްސިސު ކަމުގެ ދަށުން އުފެއްދުމަށް މަސައްކަތް ކުރަމުން ގެންދާ ޕީޕަލްސް ނެޝަނަލް ފުރަންޓުގެ ބޭނުމަށެވެ.
ޕްރޮގުރެސިވް ކޯލިޝަނުގެ ތެރޭގައި މައްސަލަ ޖެހި ޕީޕަލްސް ނެޝަނަލް ފުރަންޓުގެ ނަމުގައި އައު ސިޔާސީ ޕާޓީއެއް ހެދުމުގެ މަސައްކަތް ރައީސް ޔާމީން އިސްކޮށް ހުންނަވައި ފެށްޓެވީ މި ސަރުކާރުން އެމަނިކުފާނާ ގުޅުން ކަނޑާލައިފައި ވާކަމަށް ބުނެ އެވެ. ރައީސް ޔާމީންގެ އިސް ގާނޫނީ ވަކީލު ވަނީ ރައީސް ޔާމީން ގެއަށް ބަދަލު ކުރި ދުވަހުން ފެށިގެން ކުރި އެއްވެސް ކޯލަކަށް ނުވަތަ މެސެޖަކަށް ވެސް ރައީސް މުއިއްޒު ޖަވާބު ނުދެއްވާ ކަމަށް ތުހުމަތުކޮށްފަ އެވެ. ނަމަވެސް އެ ތުހުމަތުތައް ވަނީ ސަރުކާރުން ދޮގު ކޮށްފަ އެވެ.
