ރައީސް ޑރ. މުހައްމަދު މުއިއްޒު ހުންނެވީ "ޖާހިލެއްގެ އަތްދަށު ވެފައި" ކަމަށް ކުރީގެ ރައީސް އަބްދުﷲ ޔާމީނު އަބްދުލް ގައްޔޫމުގެ އިސް ވަކީލު ޑރ. މުހައްމަދު ޖަމީލު އަހުމަދު ސިފަކުރެއްވުމުން، އިކޮނޮމިކް މިނިސްޓަރު މުހައްމަދު ސަަައީދު އޭނާއަށް ނުސީދާކޮށް މިއަދު ރައްދު ދެއްވައިފި އެވެ.
"އަދަދު" ނޫހުގެ "އެތެރެފުށް" ޕްރޮގުރާމުގައި ވާހަކަ ދައްކަވަމުން ޖަމީލު ވިދާޅުވީ އިލްމާއި ހިލްމަކީ ދެ އެއްޗެއް ކަމަށާއި ކިޔަވައިގެން ހުރި މީހަކު ވިޔަސް ނުވަތަ ނުކިޔަވާ ހުރި މީހަކުވިޔަސް ޖާހިލެއްގެ އަތްދަށުވުން އެއީ ހެދޭނެ އެންމެ ބޮޑު ގޯސް ކަމަށެވެ.
"ކިޔަވައިގެން ހުރި މީހަކަށްވިޔަސް ހެދޭނެ އެންމެ ބޮޑު މިސްޓޭކަކީ ޖާހިލެއްގެ އަތް ދަށުވުން، އިނގޭތޯ، ޖާހިލެއްގެ އަތްދަށުވުން، ޖާހިލެއްގެ އަތްދަށުވުމަށްވުރެ ބޮޑު ގޯހެއް އިންސާނެއް ނުކުރާނެ،" ޖަމީލު ވިދާޅުވި އެވެ.
އަބްދުއްރަހީމްއަކީ ރައީސް މުއިއްޒުގެ "ޒައީމު" ގެ ގޮތުގައި ސިފަ ކުރައްވައި ފާޑުވިދާޅުވަމުން ޖަމީލު ވިދާޅުވީ ރައީސް މުއިއްޒު ވެރިކަމަށް ވަޑައިގެންނެވީ ރައީސް ޔާމީންގެ ފޮޓޯ އާއި ނަން ބޭނުން ކުރައްވައިގެން ނަމަވެސް ވެރިކަން ލިބިވަޑައިގެންނެވުމާއެކު ރައީސް ޔާމީންއަކީ ނެތް ބޭފުޅަކަށް ހައްދަވައި ބޭވަފާތެރިވެވަޑައިގެންފައިވާ ކަމަށެވެ.
ޖަމީލު މިމޭރުމުން ވާހަކަ ދައްކަވާފައި ވަނިކޮށް, ސޯޝަލް މީޑިއާގައި ސައީދު މިއަދު ލިޔުއްވި ލިޔުއްވުމެއްގައި ވިދާޅުވީ ﷲގެ ވާގިފުޅާ އެކު، ރަައީސުލް ޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރު ދާނީ ކުރިއަށް ކަމަށާއި ރާއްޖެއަށް ކުރިމަތިވެފައިވާ މައްސަލަތަކަށް ބިނާކުރަނިވި ހައްލު ހޯދުމުގެ ހިތްވަރު އެމަނިކުފާނުގެ އެބަހުރި ކަމަށެވެ.
"... އަދި އެތައް ގޮންޖެހުމެއްގެ ތެރެއިން ޕީޕީއެމް/ޕީއެންސީ މިހިސާބަށް ގެނެސްދެއްވުމުގައި އަބްދުއް ރަހީމް އަބްދުﷲގެ ލީޑަޝިޕް ފާހަގަކުރަން،" ސައީދު ވިދާޅުވި އެވެ.
ސައީދާއި ސަރުކާރުގެ އެހެން ބައެއް އިސް ބޭފުޅުން ރައީސް މުއިއްޒުގެ ދިފާއުގައި ތެދުވެވަޑައިގެންނެވީ ޕީޕީއެމް/ޕީއެންސީގެ ކުރީގެ ލީޑަރު އަބްދުﷲ ޔާމީނު އެމަނިކުފާނާ ދެކޮޅަށް ފާޅުގައި ނުކުމެވަަޑައިގެން އާ ޕާޓީއެއް ހެއްދެވުމުގެ މަސައްކަތް ފެށްޓެވުމުންނެވެ.
ޔާމީނު އެ ހަރަކާތް ފެށްޓެވުމާ އެކު ރައީސްގެ ސްޕެޝަލް އެޑްވައިޒަރް އަދި ޕީއެންސީގެ ޗެއާޕާސަން އަބްދުއްރަހީމް އަބްދުﷲ ވެސް ވަނީ ރައީސް މުއިއްޒުގެ ދިފާއުގައި ވާހަކަ ދައްކަވައިފަ އެވެ.
މި ސަރުކާރުގެ އެންމެ ބާރުގަދަ ބޭފުޅާގެ ގޮތުގައި ފާހަގަކުރެވޭ އަބްދުއްރަހީމް ވިދާޅުވީ ޕީޕީއެމް/ޕީއެންސީއަކީ ގައުމު އިސްކުރާ ދެ ޕާޓީ ކަމަށެވެ.
"އަޅުގަނޑުމެން މިތިބީ ދިވެހި ރައްޔިތުންގެ ނިންމުމާ އެއްގޮތަށް ޑރ. މުއިއްޒުއާ އެކު ފިސާރި ސާބިތުވެ. މާތް الله ގެ ވާގިފުޅާ އެކު ރައީސް މުއިއްޒުގެ ސަރުކާރުގެ ވެގެންދާނީ ދިވެހި ގައުމީ ރައްޔިތުންނަށް އުފާ ފާގަތިކަން ގެނެސްދޭނެ ސަރުކާރަކަށް. ފަސްއެނބުރި ބެލުމެއް ނެތި އަޅުގަނޑުމެން ދާނީ ކުރިއަށް," އަބްދުއްރަހީމް ވިދާޅުވި އެވެ.
ރައްޔިތުންނަށް ވެސް އެންމެ ރަނގަޅު ގޮތަކީ ރައީސް މުއިއްޒުގެ ސަރުކާރާ އެކު ސާބިތުވެ ތިބުން ކަމަށް ވެސް އަބްދުއްރަހީމް ވިދާޅުވި އެވެ.
