ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ކެބިނެޓުގައި އެންމެ ތިން އަންހެން ވަޒީރުން ހިމަނާފައިވާތީ އިދިކޮޅު އެމްޑީޕީގެ އަންހެނުންގެ ރޫހުން ކަންބޮޑުވުން ފާޅުކޮށްފި އެވެ.
އެމްޑީޕީ އަންހެނުންގެ ރޫހުން މިއަދު ނެރުނު ބަޔާނެއްގައި ރާއްޖޭގައި އަންހެނުން ބާރުވެރި ކުރުވާ، ސިޔާސީ ދާއިރާގައި އަންހެނުންގެ ދައުރު ފުޅާ ކުރުމަށް ކުރަމުންދާ މަސައްކަތުގައި މިދިޔަ އެމްޑީޕީ ސަރުކާރުން ބޮޑެތި ކުރިއެރުންތަކެއް ހޯދާފައިވާ ކަމަށެވެ.
އެގޮތުން ރާއްޖޭގެ ތާރީހުގައި ފުރަތަމަ ފަހަރަށް ކެބިނެޓްގެ 33 ޕަސެންޓު އަންހެން ވަޒީރުން ތަމްސީލުކުރައްވަމުން ގެންދެވީ ރައީސް އިބްރާހިމް މުހައްމަދު ސޯލިހުގެ ވެރިކަމުގައި ކަމަށް ބުނެފައިވެ އެވެ.
އެއީ ކެބިނެޓުގައި ތިއްބެވި 18 ވަޒީރުންގެ ތެރެއިން 6 ވަޒީރުންނެވެ. އާ ރައީސް މުއިއްޒު އެކުލަވާލެއްވި ކެބިނެޓުގައި 22 ވަޒީރުން ތިއްބެވި އިރު ކެބިނެޓުގައި ހިމެނުނީ އެންމެ 3 އަންހެން ވަޒީރުންނެވެ. އެއީ ކެބިނެޓުގެ 13 ޕަސެންޓެވެ.
"ހިތާމަޔާއެކު ފާހަގަ ކުރެވުނުކަމަކީ، ހުވާކުރެއްވުމަށް ވަޒީރުން ތަރުތީބު ކުރައްވާފައި ތިއްބެވިއިރު ތިން އަންހެން ބޭފުޅުންވެސް ތިއްބެވީ ފަހަތުބަރިއަށް ލާފައިކަމެވެ. ސީނިއޯރިޓީ އަށް ބެލިކަމުގައި ވިޔަސް އެތަނުން އެއް އަންހެން ވަޒީރަކީ ދެ ވަނަ ދައުރަކަށް ވަޒީރުކަމާ ހަވާލުވެވަޑައިންނެވި، ކުރީބަރީގައި ތިއްބެވި ގިނަ ބޭފުޅުންނަށް ވުރެ ސީނިއާ ބޭފުޅެއްކަންވެ ސް ފާހަގަކުރަމެވެ." އެ ބަޔާނުގައި ބުނެފައިވެ އެވެ.
ރައީސް އޮފީހުގެ އިސް މަގާމުތަކަށް ބޭފުޅުން އައްޔަނު ކުރެއްވިއިރު ވެސް އެންމެ އަންހެން ބޭފުޅަކު އައްޔަންކޮށްފައިވާތީ އެކަން ވެސް ފާހަގަކޮށްފައިވެ އެވެ. ބަޔާނުގައި އިތުރަށް ބުނެފައިވަނީ ވަޒީރުންގެ މަޖިލީހަކީ ގައުމެއްގެ ހައިސިއްޔަތުން ބަސްކިޔުމުގައި ސަރުކާރުގެ އެންމެ މަތީ ފަޑިކަމުގައި ވާހިނދު، ވަޒީރުންގެ މަޖިލީހުގައި އަންހެނުންގެ އަދަދު 13 ޕަސެންޓަށްް ވެއްޓުމަކީ އަންހެނުން ސިޔާސީ ދާއިރާގައި ބާރުވެރި ކުރުމަށް ކުރެވޭ މަސައްކަތުގައި ވަރަށް ބޮޑަށް ފަހަތަށް އެޅުނު ފިޔަވަޅެއް ކަމަށެވެ.
"ރައްޔިތުންގެ މަޖިލީހަށް 20 ޕަސެންޓު އަންހެނުން ގެނައުމަށް ރައިސުލްޖުމްހޫރިއްޔާ ޑރ. މުހައްމަދު މުއިއްޒު މަސައްކަތް ކުރައްވާނެ ވާހަކަ ވިދާޅުވެފައިވާއިރު، އިތުރު އެއްވެސް ފަރާތެއްގެ ބައިވެރިވުމަކާނުލާ، ސަރުކަަރުގެ ސިޔާސަތު ކަނޑައެޅުމުގެ އެންމެމަތީ ބާރުކަމުގައިވާ ކެބިނެޓަށް، ސީދާ އެމަނިކުފާނަށް، އަންހެން ބޭފުޅުން އައްޔަނުކުރެއްވެން އޮތް ފުރުސަތުގައި، އެކަންނުކުރެއްވުމަަކީ އެމަނިކުފާނު ދެއްކެވި ވާހަކަފުޅުގައި އެއްވެސް އިހުލާސްތެރިކަމެއް ނެތްކަމުގެ ހެއްކެކެވެ،" އެ ބަޔާނުގައި ބުންޏެވެ.
އެމްޑީޕީގެ އަންހެނުންގެ ރޫހުން އިތުރަށް ބުނީ ވަޒީރުންގެ މަޖިލިސް އަތުރާލެވޭއިރު އަންހެން ވަޒީރުން ފަހަތަށް ޖެއްސުމަކީ، އޭގެން ވަރަށް ގޯސްމާނައެއް ދޭހަވާ ކަމެއްކަމުގައި ދެކޭ ކަމަށެވެ. އެއީ އަންހެނުންނަކީ ރައީސް އިއްޔެ ޖުމްހޫރީ މައިދާނުގައި ދެއްކެވި ވާހަކަފުޅާ އެއްގޮތަކަށް ވެސް ދިމާނުވާކަމަށް ވެސް ބުނެފައިވެ އެވެ.
