ދިވެހިރާއްޖޭން އެންމެ މޮޅަށް ސިޓީ ލިޔާ މީހާ ހޮވުމަށްޓަކައި، ޕްރޮސެކިއުޓާ ޖެނެރަލްގެ ވާދައިގެ ތައްޓަށް ދިވެހި ބަހުން ސިޓީ ލިޔުމުގެ މުބާރާތެއް ބާއްވަން އެ އޮފީހުން ނިންމައި ބައިވެރިވާން ހުޅުވާލައިފި އެވެ.
އަދަބީ ފަންނެއް ކަމަށްވާ ސިޓީ ލިޔުމުގެ މުބާރާތްތައް ބައެއް ސްކޫލްތަކުގެ އަދަބީ ދުވަސްތަކުގައި ބޭއްވި ނަމަވެސް ގައުމީ ފެންވަރުގައި މިފަދަ މުބާރާތެއް ބާއްވާފައެއް ނުވެ އެވެ.
ކުރީގައި ރަސްމީ ކަންކަމުގައި ވެރިންނަށާއި، އަމިއްލަ ކަންކަމުގައި ދަންނަ މީހުންނަށް އަދި ނޫސްތަކަށް ހިޔާލުފާލުކުރުމުގެ ގޮތުން، ފަށުވި އިބާރާތްތަކުން ސިޓީ ލިޔުމަކީ އާއްމު ކަމެކެވެ. އޭރު އަގަށް ސިޓީ ލިޔެދޭ މީހުން އުޅެ އެވެ.
ޕްރޮސެކިއުޓާ ޖެނެރަލްގެ އޮފީހުން ބުނީ މި މުބާރާތުގެ މަގުސަދަކީ، ދިވެހި ބަހުން ސާފުކޮށް މޮޅަށް ސިޓީ އިބާރާތްކޮށް ލިޔެ ހެދުމަށް ހިތްވަރުދީ، ސިޓީ ލިޔުމުގެ ސަގާފަތެއް އުފެއްދުން ކަމަށެވެ.
އެ އޮފީހުން މިއަދު ކުރި އިއުލާނެއްގައި ބުނީ އި އިދާރާގެ ރިކްރިއޭޝަން ކްލަބުން އިންތިޒާމުކުރާ މި މުބާރާތުގައި ބައިވެރިވުމުގެ ފުރުސަތު ކޮންމެ ދިވެއްސަކަށް ވެސް އޮންނާނެ ކަމަށެވެ. އެގޮތުން އީފާސް މެދުވެރިކޮށް އެ އޮފީހުގެ އޮންލައިން ޕޯޓަލަށް ވަދެ، މުބާރާތަށް ހާއްސަ ޓެބަށް ފިތާލުމުން ރަޖިސްޓަރީވެވޭނެ ކަމަށް ވެސް ބުންޏެވެ.
"މުބާރާތުގައި ރަޖިސްޓަރީވުމުގެ މުއްދަތު ހަމަވާއިރު ރަޖިސްޓަރީވެފައިވާ މީހުންނަށް، ސިޓީ ނޯޓެއް ފޮނުވާނަމެވެ. އެސިޓީ ނޯޓުގައި އޮތް ސިޓީ (އަތުން ކަރުދާސް ގަނޑެއްގައި) ލިޔެ، ފޮޓޯއެއް ނަގައި، ޕޯޓަލަށް އަޕްލޯޑުކުރުމުން މުބާރާތަށް ސިޓީ ހުށަހެޅުނީ އެވެ،"
ސިޓީ ނޯޓުގައި ސިޓީ ލިޔަން ޖެހޭ މައުލޫ އޮންނާނެ އެވެ. މައުލޫތަކުގެ ތެރޭގައި "ޝަރީއަތް ނުނިމިގެން ހިތްހަމަނުޖެހުން ފާޅުކުރުން" އަދި "ހަފުތާއަކު ހަތަރު ދުވަހު މަސައްކަތްކުރާ ގޮތަށް އޮފީހުގެ ހިންގުން ބަދަލުކުރަން ވެރިޔާ އަށް އެދުން" ފަދަ ތަފާތު މައުލޫތައް ހިމެނޭނެ އެވެ.
މުބާރާތަށް ސާޅީހަކަށް މައުލޫ ކަނޑައަޅާފައިވާއިރު، އެ މީހަކު ލިޔަން ޖެހޭ މައުލޫ ކަނޑައެޅިގެންދާނީ އޮޓޯ ޕްރޮސެސްއަކުންނެވެ.
"މިއީ އެންމެ މޮޅަށް ސިޓީ ލިޔާ މީހާ ހޯދަން ބާއްވާ މުބާރާތެއް،" ޕްރޮސެކިއުޓާ ޖެނެރަލް އަލްއުސްތާޒް ހުސެއިމް ޝަމީމް "އަދަދު" އަށް ވިދާޅުވި އެވެ. "އޮފީހަށް ވެސް ބޭނުންވޭ އެފަދަ މީހުން."
މުބާރާތުގައި ވަކިވަކި ފަރުދުންގެ ގޮތުން ބައިވެރިވި ނަމަވެސ. އެމީހަކު ތަމްސީލުކުރާ އޮފީހެއްގެ ނަމާ އެކު ރަޖިސްޓަރީވުމުގެ ފުރުސަތު ވެސް އޮންނާނެ އެވެ. ވަނަ ވަނަ އަށް އަންނަ އޮފީސްތައް ހޮވާނީ، އެ އޮފީހަކުން ބައިވެރިކުރި ސިޓީތަކުގެ ތެރެއިން އެންމެ މޮޅު ފަސް ސިޓީގެ މާކްސްއަށް ބަލައިގެންނެވެ.
މުބާރާތުގެ ތަށި މިލްކުވާނީ ތިން އަހަރު ކާމިޔާބުކުރުމުންނެވެ.
މުބާރާތަށް ހުށަހަޅާފައިވާ އިނާމުތަކަކީ:
- 1 ވަނަ: 3000 ރުފިޔާ، ހަނދާނީ ލިޔުން އަދި ޕްރޮސެކިއުޓާ ޖެނެރަލްގެ ވާދައިގެ ތަށި
- 2 ވަނަ: 1500 ރުފިޔާ އަދި ހަނދާނީ ލިޔުން
- 3 ވަނަ: 1000 ރުފިޔާ އަދި ހަނދާނީ ލިޔުން
- 1 ވަމަ އޮފީސް: ހަނދާނީ ލިޔުން އަދި ޕްރޮސެކިއުޓާ ޖެނެރަލްގެ ވާދައިގެ ތަށި
- 2 ވަނަ އޮފީސް: ހަނދާނީ ލިޔުން
- 3 ވަނަ އޮފީސް: ހަނދާނީ ލިޔުން
މީގެ އިތުރުން އެންމެ ގިނަ ސިޓީ ބައިވެރިކުރި އޮފީހަކަށް ހަނދާނީ ލިޔުމާއި ޕްރޮސެކިއުޓާ ޖެނެރަލްގެ ވާދައިގެ ތަށި ދޭނެ އެވެ.
