ރާއްޖޭގެ ވެރިކަން ކުރެއްވި ފަސް އަހަރުގެ ތެރޭގައި ކުރީގެ ރައީސް އިބްރާހިމް މުހައްމަދު ސޯލިހު ދެއްކެވީ ލާމަސީލު ލީޑާޝިޕެއް ކަމަށާއި އެކަން ރާއްޖޭގެ ތާރީހުގައި ރަން އަކުރުން ލިޔެވިގެންދާނެ ކަމަށް ރައްޔިތުންގެ މަޖިލީހުގެ ރައީސް މުހައްމަދު އަސްލަމް ވިދާޅުވެއްޖެ އެވެ.
މިއަދު ހަވީރު ޖުމްހޫރީ މައިދާނުގައި ބޭއްވި ރަސްމިއްޔާތެއްގައި ޑރ. މުހައްމަދު މުއިއްޒު ވަނި ވެރިކަމުގެ ހުވާ ކުރައްވައި މަގާމާ ހަވާލުވެވަޑައިގަނެފަ އެވެ. އެ ރަސްމިއްޔާތަށް ރައީސް ސޯލިހުގެ ދެކަނބަލުން ވެސް ވަޑައިގަތެވެ. އެ ރަސްމިއްޔާތުގައި އަސްލަމް ވަނީ ރައީސް ސޯލިހުގެ ހިދުމަތްތައް ފާހަގަކުރައްވައި ޝުކުރު އަދާކުރައްވާފަ އެވެ.
"ހާއްސަ ގޮތެއްގައި ދިވެހި ރައްޔިތުން ކުރިން ތަޖުރިބާކުރި ބިރުވެރިކަމާއި ތަހައްމަލު ކުރި ހަމަނުޖެހުމުން މިންޖުކޮށް، ދިވެހި ރައްޔިތުންނަށް ހަމަޖެހުން ގެނެސް ދެއްވި. އަދި ކޮވިޑުގެ ހާލަތުން އަރައިގަތުމުގައި ރައީސް އިބްރާހިމް މުހައްމަދު ސޯލިހު ދެއްކެވި ލާމަސީލު ލީޑަޝިޕް ވަކިން ހާއްސަ ގޮތެއްގައި ފާހަގަކުރަން," އަސްލަމް ވިދާޅުވި އެވެ.
"ރާއްޖޭގެ އިގުތިސާދަށާއި އުމްރީ ތަރައްގީއަށް އެ ސަރުކާރުން ގެނެސްދިން ބޮޑު ބަދަލު، ދިވެހި ތާރީހުގައި ރަން އަކުރުން ލިޔެވިގެންދާނެ ކަމާއިމެދު އަޅުގަނޑު ޝައްކެއް ނުކުރަން,"
ވެރިކަން ބަދަލުވުމުގެ މަރުހަލާ މިހާ އޮމާން ކަމާއެކު ކުރިއަށްދިޔުމާ ގުޅިގެން އެކަން ވެސް އަސްލަމް ފާހަގަކުރެއްވި އެވެ. އަސްލަމް ވިދާޅުވި ގޮތުގައި މިއީ ޑިމޮކްރަސީ ފުރިހަމަވެ ފައްކާވަމުން އަންނަ ކަމުގެ ނިޝާނެއް ކަމަށް ވެސް އަސްލަމް ވިދާޅުވި އެވެ.
"ފެހި ގާނޫނު އަސާސީއާއެކު ގެނެސްދިން ފޮނިމީރުކަން މިރޭ އިހުސާސް ވެގެން މިދަނީ، ހަލަބޮލިކަމުން މިންޖުވެ، ހަމަޖެހުމުގެ ފަސް އަހަރުގެ ދައުރަކަށް ފަހު، ވެރިކަމުގެ ބާރުތައް ވެސް ހަލަބޮލިކަމެއް ނެތި އޮމާންކަމާއެކު ބަދަލުވެގެން ދާތީ," އަސްލަމް ވިދާޅުވި އެވެ.
އެއް ވެރިކަމަކަށް ފަހު އަނެއް ވެރިކަމެއް އައިސް ބަދަލުވެ ދިޔުމަކީ ޑިމޮކްރަސީ އާއި ޖުމްހޫރިއްޔަތުގެ ތަބީއަތް ކަމަށާއި ބަދަލު ނުވާންވީ ކަމަކީ ޑިމޮކްރަސީގެ ރީތި ސިފަތަކާއި ރައްޔިތުންގެ ލާބައަށް ދައުލަތުގެ ބާރުތައް ގުޅިގެން ކުރަންޖެހޭ މަސައްކަތް ކުރުން ކަމަށް އޭނާ ވިދާޅުވި އެވެ.
އަސްލަމްއަކީ ރައީސް ސޯލިހުއާ އެކު ވަރަށް ގާތުން މަސައްކަތް ކުރެއްވި ބޭފުޅެކެވެ. އެމްޑީޕީގެ ތެރޭގައި އުފެދުނު ހިޔާލު ތަފާތުވުންތަކުގައި ރައީސް ސޯލިހުގެ ފަޅީގައި ގަދަކޮށް ހުންނެވި ބޭފުޅެކެވެ. އަދި, ސެޕްޓެމްބަރުގައި ބޭއްވި އިންތިހާބުގައި އެމަނިކުފާނުގެ ރަނިން މޭޓަކަށް ވެސް ހުންނެވީ އަސްލަމް އެވެ.
