އައިޖީއެމްއެޗްގައި ވަޒީފާ އަދާކުރަމުން ދިޔަ ފިލިޕީންސްގެ ނަރުސް މޭރީ ގްރޭސް މަރާލި މައްސަލާގައި ދައުވާކުރާ ހަލީމަތު ލަމްހާގެ ފައިގައި ޓެގު އެޅުވުމަށް ފަހު އޭނާ ދޫކޮށްލަން ވަކީލުން އެދިއްޖެ އެވެ.
މޭރީ މަރުވީ ބޮލަށާއި ކަރަށް ހަމަލާދީ ނޭވާ ހާސްކޮށްލައިގެން ކަމަށް އޮޓޮޕްސީ ރިޕޯޓުން ދައްކަ އެވެ. ފުލުހުންގެ ތަހުގީގު ނިންމުމަށް ފަހު އޭނާ މަރާލުމުގެ ދައުވާ އުފުލީ ފިރިމީހާ މާވިން އެސްވައި ވާގަސްގެ މައްޗަށެވެ. މަރާލުމުގައި ބައިވެރިވުމުގެ ދައުވާ އުފުލާފައިވާ ލަމްހާއަކީ މާވިންގެ ލޯބިވެރިޔާ އެވެ.
ޖިނާއީ އިޖުރާއަތުގެ ގާނޫނުގައި އޮންނަ ގޮތުގެ މަތީން، ބަންދު މުރާޖައާ ކޮށްދިނުމަށް ލަމްހާގެ ފަރާތުން ވަނީ ހުށަހަޅައިފަ އެވެ. މީގެ ކުރިން ވެސް ޝަރުތުތަކެއް ކުރުމަށް ފަހު ލަމްހާ ދޫކޮށްލަން އެދުމުން، ޝަރީއަތުން ނިންމާފައިވަނީ ލަމްހާގެ ބަންދު ދެމެހެއްޓުމަށެވެ.
ބަންދާ މެދު އެންމެ ފަހުން ގޮތެއް ނިންމިތާ ފަސް މަސް ދުވަސް ފަހުން ބަންދު މުރާޖައާ ކުރުމަށް ހުށަހަޅާފައި އޮތުމުން، އެ ކަމާ ގުޅޭ ގޮތުން ވާހަކަ ދައްކަން ދިން ފުރުސަތުގައި ލަމްހާގެ ވަކީލު އަހުމަދު ޔާމީން އެދިވަޑައިގަތީ ޓެގު އެޅުމަށް ފަހު އޭނާ ދޫކޮށްލުމަށެވެ.
ލަމްހާއަކީ ކުށުގެ ރެކޯޑެއް މީގެ ކުރިން އޮތް މީހަކަށް ނުވެފައި، ނަމަވެސް މީހަކު މަރާލުމުގައި ބައިވެރިވުމުގެ ތުހުމަތު އޮތް މީހަކަށް ވާތީވެ، މުޖުތަމައަށް ނުރައްކާ އޮތް ކަމަށް ބެލެވޭނަމަ، ޓެގު އަޅުވާފައި އޭނާ ހުންނަ ތަން ބެލޭނެ ގޮތަށް ދޫކޮށްލެވެން ވާނެ ކަމަށް ދިފާއީ ވަކީލު ވިދާޅުވި އެވެ.
ބަންދާ މެދު ގާޒީ މިއަދު ގޮތެއް ނުނިންމަވަ އެވެ. ދެން އަންނަ އަޑުއެހުމެއްގެ ކުރިއަށް، ގޮތެއް ނިންމަވާނެ ކަމަށް މައްސަލަ ބައްލަވާ ގާޒީ ހުސައިން ފާއިޒު ރަޝާދު ވިދާޅުވި އެވެ.
ކްރައިމް ސީންގެ ފޮޓޯ ނެގުމުގެ ކުރިން ބޭސްތައް ނެގި މައްސަލައެއް
ޝަރީއަތުގައި މިހާރު ކުރިއަށް ދަނީ ދައުލަތުން ހުށަހެޅި ހެކިންގެ ހެކިބަސް ނެގުމެވެ. ދައުލަތުން ހެކިބަސް ނެގުމަށް، ޝަފައީ ހެކިންގެ ގޮތުގައި 74 ހެއްކެއް ހުށަހަޅާފައިވެ އެވެ. އަދިވެސް ބާކީ 40 އެއްހާ ހެކިންގެ ހެކިބަސް ނުނެގި އެބަވެ އެވެ.
ިމިއަދު ޝަރީއަށް ހާޒިރުކޮށް ހެކިބަސް ނެގީ ތިން ހެކިވެރިޔެއްގެ ހެކިބަހެވެ. އެއިން ދެ ހެކިވެރިންނަކީ ފުލުހުންގެ ހިދުމަތުގައި "ސީން އޮފް ކްރައިމް އޮފިސަރު" ގެ ގޮތުގައި މަސައްކަތް ކުރާ ދެ މީހުނެވެ.
އެއިން އެއް ހެކިވެރިޔަކީ، ލަމްހާގެ ގެއިން ފެނުނު ބޭސްތަކުގެ ފޮޓޯ ނެގި އޮފިސަރެވެ. ފުލުހުން ތުހުމަތު ކުރާ ގޮތުގައި އެއީ އައިޖީއެމްއެޗުން "ވަގަށް" ގެންގޮސްފައިވާ ތަކެއްޗެވެ.
ހެކިވެރިޔާ ޝަރީއަތަށް ކިޔައިދިން ގޮތުގައި، އޭނާ ކުށުގެ ވެއްޓަށް ދިޔަ ވަގުތު އެ ތަނަށް ހާޒިރުވެ ތިބި ފުލުހުން ވަނީ މޭޒުމަތިން ބައެއް ބޭސްތައް ނަގައި "އެވިޑެންސް ބޭގް" އަށް ލައިފަ އެވެ.
ދެން ފަހުން ދަބަހުން ބޭސްތައް ނަގައި މޭޒު މަތީގައި ބެހެއްޓި ކަމަށް ހެކިވެރިޔާ ބުންޏެވެ.
ގާތްގަނޑަކަށް 70 އެއްހާ ފޮޓޯ ކްރައިމް ސީންގެ ރިޕޯޓުގައި ހިމަނާފައިވާ އިރު "އެވިޑެންސް ބޭގް" ގެ ފޮޓޯއެއް އޭގައި ނެތެވެ. އެކަމާ ގުޅިގެން ޝަރީއަތުން ވެސް ވަނީ ހެކިވެރިޔާއާ ސުވާލުކޮށްފަ އެވެ.
އޭނާ ބުނި ގޮތުގައި ފޮޓޯތައް ނެގީ ދަބަހުން ބޭސްތައް ނެގުމަށް ފަހު، މޭޒު މަތީގައި އެ ބޭސްތައް ބެހެއްޓުމަށް ފަހު އެވެ. ފޮޓޯ ނަގަން އެއިރު ވިސްނާފައި އޮތީ އެ ގޮތަށް ކަމަށް އޮފިސަރު ބުންޏެވެ.
މައްސަލައިގެ ފަސްފަހަތް؛
މޭރީ ގްރޭސް އަކީ އައިޖީއެމްއެޗްގެ ޑައިލެސިސް ޑިޕާޓްމެންޓްގެ ނަރުހެކެވެ. އޭނާގެ ފިރިމީހާ މާވިންއާއި ލަމްހާއަކީ ކެޝުއަލްޓީގައި މަސައްކަތް ކުރާ ނަރުހުންނެވެ. ފިލިޕީންސްގައި ވަރިކުރުމަކީ މަނާކަމެއް ގޮތުގައި އޮތް އިރު، ލަމްހާއާއި މާވިން އުޅުނީ ސިއްރު ލޯބީގެ ގުޅުމެއް ބާއްވައިގެން ކަމަށް ތުހުމަތު ކުރެ އެވެ.
އޮކްޓޯބަރު 19, 2021 ގައި ގްރޭސް ދަންޖެހިގެން މަރުވި ކަމަށް ބުނެ މާވިން ރިޕޯޓް ކުރިޔަސް ތުހުމަތު ކުރެވޭ ކަންކަން ހުރުމުން ފުލުހުން ތަހުގީގު އިތުރަށް ހިންގަމުން ދިޔައީ އެވެ.
އަދި ގްރޭސް މަރާލި ކަމުގެ ތުހުމަތުގައި މާވިން ހައްޔަރު ކުރީ އެ އަހަރުގެ އޮކްޓޯބަރު 27 ގަ އެވެ. ލަމްހާ ހައްޔަރު ކުރީ އޭގެ 50 ދުވަސް ފަހުން އެ އަހަރުގެ ޑިސެމްބަރު 16 ގަ އެވެ.
މާވިންގެ މައްޗަށް އެނގި ހުރެ މީހަކު މަރާލުމުގެ ކުށުގެ ދައުވާ އުފުލާފައިވާއިރު، ލަމްހާގެ މައްޗަށް ކުރަނީ އެނގި ހުރެ މީހަކު މަރާލުމުގައި ބައިވެރިވުމުގެ ކުށުގެ ދައުވާ އެވެ.
އޭގެ އިތުރަށް އެހެން މީހެއްގެ މުދަލެއްގެ މައްޗަށް ހުއްދަ ނޫން ގޮތެއްގައި ބާރު ހިންގުމުގެ ދައުވާއާއި ހުއްދަ ނަގައިގެން ކުރަން ޖެހޭ ކަމެއް ހުއްދަ ނުނަގާ ކުރުމުގެ ދައުވާ ވެސް ލަމްހާގެ މައްޗަށް ކުރެ އެވެ.
އެ ދައުވާތައް ލަމްހާގެ މައްޗަށް ކުރަނީ އައިޖީއެމްއެޗުން ހުއްދަ ނުނަގައި، ނުރައްކާތެރި ބައެއް ބޭސްތަކެއް ލަމްހާ ނެގި ކަމަށް ތުހުމަތުކޮށެވެ.
