އަންނަ އަހަރަށް ލަފާކުރާ ދައުލަތުގެ ބަޖެޓާއި މިއަހަރުގެ ބާކީ ބަޔަށް ހުށަހަޅާ ސަޕްލިމެންޓްރީ ބަޖެޓް އެޖެންޑާކުރި ޖަލްސާ ފަށަން ނިންމާފައި އޮތް ގަޑިއަށް މެމްބަރުން ތަޅުމަށް ވަޑައިނުގެންނެވުމުން ވަގުތީ ގޮތުން މެދުކަނޑާލައިފި އެވެ.
މިއަދުގެ ޖަލްސާގެ ރިޔާސަތު ބަލަހައްޓަވަން ވަޑައިގެން އިންނެވި، މަޖިލީހުގެ ނައިބުރައީސް އީވާ އަބްދުﷲ ވިދާޅުވީ ތަޅުމަށް ވަޑައިނުގެންނެވި ނަމަވެސް މެމްބަރުން މަޖިލީހުގެ ގޯތިތެތޭގައި އެބަ ތިއްބެވި ކަމަށެވެ. އެހެންވެ ކޯރަމް ހަމަކޮށް، ޖަލްސާ ފެށޭތޯ މަސައްކަތްކުރައްވާނެ ކަމަށް އޭނާ ވިދާޅުވި އެވެ.
"އަޅުގަނޑު ހަމަ މަޑުކުރާނަން. ކޯރަމް ހަމަވޭތޯ އަޅުގަނޑު ހަމަ މަޑުކުރާނަން. އިރުއިރުކޮޅާ ކޯރަމް ބެލް ޖަހައިގެން ކޯރަމް ހަމަކުރެވޭތޯ އަޅުގަނޑު ހަމަ މަޑުކުރާނަން،" އީވާ ވިދާޅުވި އެވެ.
ބަޖެޓް މަޖިލީހަށް ހުށަހަޅައިގެން ކުރިއަށް ގެންދިއުމަކީ ގާނޫނު އަސާސީއާއި މާލިއްޔަތު ގާނޫނުން ލާޒިމުކުރާ ކަމެއް ކަން މެމްބަރުންނަށް އެނގިވަޑައިގަންނަވާނެ ކަން އޭނާ ފާހަގަކުރެއްވި އެވެ.
"އަދި ބަޖެޓް ހުށަހަޅުއްވަން އޮތް މިއަދުގެ ސަރުކާރުގެ މާލީ ވަޒީރަށް ވެސް އެނގިވަޑައިގަންނަވާނެ ރައްޔިތުން މަޖިލީހުން ބަޖެޓްގެ މަސައްކަތް ކުރިއަށް ގެންގޮސް ނުނިންމިއްޖެއްޔާ ކުރިއަށް އޮތް ސަރުކާރަށް އެތައް ދަތިތަކެއް ކުރިމަތިވާނެ،" އީވާ ވިދާޅުވި އެވެ.
އެ ދަތިކަން ދިމާވާނީ ސަރުކާރަށް އެކަންޏެއް ނޫން ކަމަށް ވެސް އޭނާ ވިދާޅުވި އެވެ.
ބަޖެޓްގެ މަސައްކަތް އެކަނި އެެޖެންޑާކޮށް މަޖިލީހުގެ ޖަލްސާއެއް ބާއްވަން މިއަދު ތާވަލުކުރި އިރު މަޖިލިސް އޮތީ ބޮޑު މައްސަލަގަނޑެއްގެ ތެރޭގަ އެވެ. ރައްޔިތުންގެ މަޖިލީހުގެ ރައީސް މުހައްމަދު ނަޝީދު މަގާމުން ވަކިކުރަން އެމްޑީޕީން ހުށަހަޅާފައި އޮތް މައްސަލަ އެޖެންޑާކޮށް އިއްޔެ ބާއްވަން އުޅުނު ދެ ޖަލްސާ ވެސް އޮތީ ކުރިއަށް ނުގެންދެވިފަ އެވެ.
އިއްޔެގެ ފުރަތަމަ ޖަލްސާ ކުރިއަށް ނުގެންދެވުނީ ނަޝީދު ވަކިކުރަން ހުށަހަޅާފައި އޮތް ގަރާރަކީ ގަވައިދާ ހިލާފު ގަރާރެއް ކަމަށް ވިދާޅުވެ، އޭރު ރިޔާސަތުގައި އިންނެވި ވިލުފުށި ދާއިރާގެ ދަ ޑިމޮކްރެޓްސް މެމްބަރު ހަސަން އަފީފު އެ ޖަލްސާ ހުއްޓަވައިލެއްވުމުންނެވެ.
ދެވަނަ ޖަލްސާގެ ރިޔާސަތަށް ވަޑައިގެންނެވީ ފުރަތަމަ ޖަލްސާ ފެށި އިރު މަޖިލީހަށް ސަލާމުގައި ހުންނެވި ނައިބުރައީސް އީވާ އެވެ. އޭނާ ވިދާޅުވީ ގަރާރާ މެދު އަފީފު ނިންމެވި ނިންމެވުން ރަނގަޅު ކަމަށެވެ. އެހެން ވިދާޅު އެ ޖަލްސާ ވެސް ނިންމަވައިލެއްވީ އެވެ.
ނަޝީދު ވަކިކުރުމުގެ ގަރާރުގެ މަސައްކަތް ކުރިއަށް ނުގޮސް އޮތް އޮތުމަށް ރިއާޔަތްކުރައްވައި މިއަދުގެ ޖަލްސާގައި އީވާ ވިދާޅުވީ އެ މައްސަލަ ކުރިއަށް ނުގެންދެވި އޮތަސް ބަޖެޓްގެ މަސައްކަތް ކުރިއަށް ގެންދަން ޖެހޭނެ ކަން ސުޕްރީމްކޯޓުގެ ހުކުމުން އެނގޭ ކަމަށެވެ.
މިއަދުގެ ޖަލްސާ ނުފެށުނު އިރު، ބަޖެޓް ހުށަހަޅުއްވަން ވަޑައިނުގެންނެވޭނެ ކަން ފިނޭންސް މިނިސްޓަރު އިބްރާހީމް އަމީރު އޮތީ މަޖިލީހުގެ އިދާރާއަށް އަންގަވައިފަ އެވެ. ވަޑައިނުގެންނެވޭނެ ކަން އެންގެވި ސިޓީގައި އަމީރު ވިދާޅުވީ ސިއްހީ ހާލަތު ހުރި ގޮތުން ވަޑައިގެންނެވެން ނެތީ ކަމަށެވެ.
