ކަރެކްޝަނަލް ސާވިސްއިން ކުރީގެ ރައީސް އަބްދުﷲ ޔާމީން އަށް ދިން އިންޒާރާއެކު އެ މަނިކުފާނު ހިމޭން ވެއްޖެ އެވެ.
އެގާރަ އަހަރުގެ ޖަލު ހުކުމެއް ތަންފީޒު ކުރައްވަމުން ގެންދަވަނިކޮށް ޔާމީން ގޭ ބަންދަށް ބަދަލުކުރީ އޮކްޓޯބަރު 1 ގަ އެވެ. އެއަށް ފަހު މާލޭ ސަރަހައްދުގައި ހަރަކާތްތެރިވެ އުޅެވޭ ގޮތަށް ލުއިތައް އޮކްޓޯބަރު 28 ވަނަ ދުވަހު ދިނެވެ.
ނަމަވެސް ސިޔާސީ ހަރަކާތްތައް ފެށްޓެވުމާއެކު އެ ލުއިތައް ނަގާނެކަމުގެ އިންޒާރު އޮކްޓޯބަރު 31 ގައި ކަރެކްޝަނަލް ސާވިސްއިން އެ މަނިކުފާނަށް ދިނެވެ. އެއީ ޕީޕީއެމް އޮފީހުގައި ޖަލްސާތައް ބާއްވަން ފެށްޓެވުމާއެކު އެވެ. ނަމަވެސް ޕީޕީއެމް/ޕީއެންސީ ކޯލިޝަނުން މިފަހަރު މިކަމުގައި ކަންބޮޑުވެ ބަހެއް ބުނެފައެއް ނެތެވެ.
ކޮމިޝަނާ އޮފް ޕްރިޒަންސް އަހުމަދު މުހައްމަދުފުޅު "އަދަދު" ނޫހަށް އޭރު ވިދާޅުވީ ޔާމީނަށް ދީފައިވާ ލުއިތަކުގެ ތެރޭގައި ސިޔާސީ ހަރަކާތްތައް ހިންގުން ނުހިމެނޭނެ ކަމާއި އެއީ ޕެރޯލް ގާނޫނާއި އެ މަނިކުފާނު އެއްބަސްވެވަޑައިގެންނެވި އިގުރާރާ ހިލާފަށް ކުރެއްވި ކަމެއް ކަމަށެވެ.
ޖަލު ހުކުމެއް އިއްވާފައިވާ ފަރާތަކަށް ސިޔާސީ ގޮތުން ހަރަކާތްތެރިވުން މަނާކުރާ ގޮތަށް ޖަލުތަކާއި ޕެރޯލް ގާނޫނު ބަދަލުކުރީ ޔާމީންގެ ވެރިކަމުގަ އެވެ. އެ ބަދަލު އޭރު ގެނައީ އިދިކޮޅު ލީޑަރުންގެ ސިޔާސީ މައިދާނުން އެކަހެރި ކުރުމުގެ ބޭނުމުގަ އެވެ.
އެ ގާނޫނުގެ 62 ވަނަ މާއްދާގައި ވަނީ ސިޔާސީ ޕާޓީއަކުން ހިންގާ ހަރަކާތްތަކުގައި ބައިވެރިވުމުގެ ހައްގު، ހުކުމެއް ތަންފީޒުކުރުމަށްޓަކައި ޖަލުގައި ބަންދުކުރެވިފައި ހުންނަ މުއްދަތުގައި ލިބިގެން ނުވާކަމަށެވެ.
ކަރެކްޝަނަލް ސާވިސްއިން ޔާމީނަށް އިންޒާރު ދިންތާ ހަފުތާއެއް ފާއިތުވެގެން ދިޔައިރު، ސިޔާސީ އެއްވެސް ހަރަކާތެއް ހިންގަވާފައެެއް ނެތެވެ. ސޯޝަލް މީޑިއާގައި ވެސް ބަހެއް ވިދާޅުވެފައި ނުވާއިރު، އެ މަނިކުފާނު ދިރިއުޅުއްވަމުން ގެންދަވާ ހ.ދޫވެހި ގޭގެ ކިޑިކީން ވެސް މެމްބަރުންނާ މިހާރު ވާހަކަ ދައްކަވާ ނުހައްދަވަ އެވެ.
