ރާއްޖޭގެ ކަނޑުގެ ސަރަހައްދުގައި ގަވާއިދާ ހިލާފަށް މަސްވެރިކަން ކުރަމުންދަނިކޮށް ރާއްޖޭން ހައްޔަރުކުރި އިންޑިއާގެ ޓެމިލް ނާޑޫއަށް ނިސްބަތްވާ މަސްވެރިންތަކެއް ދޫކޮށްލުމަށް އެ ސްޓޭޓުގެ ޗީފް މިނިސްޓަރު އެމްކޭ ސްޓާލިން ގޮވާލައިފި އެވެ.
މިދިޔަ މަހު 23 ގައި އަތުލައިގަތް މި އުޅަނދުން ހައްޔަރުކޮށްފައިވަނީ 12 މަސްވެރިއެކެވެ. ނަމަވެސް ސްޓާލިން ބުނީ މިދިޔަ މަހު ފުރަތަމަ ދުވަހު މަހަށް ފުރި އެ ބޯޓުން މަސްވެރިކަން ކުރަމުން ދިޔައީ ގަވާއިދާ އެއްގޮތަށް ކަމަށާއި އެ އުޅަނދުން ރާއްޖޭގެ ބޯޑަރު ތެރެއަށް ނުވަންނަ ކަމަށެވެ.
"ރާއްޖޭގެ ސިފައިން އެ މީހުން ހައްޔަރުކުރީ ރާއްޖޭގެ ސަރަހައްދަށް ނުވަދެ މައި ކަނޑުގައި މަސްވެރިކަން ކުރަމުން ދަނިކޮށް،" އޭނާ ބުންޏެވެ.
މިއީ މި މައްސަލައިގައި ސްޓާލިން ކަންބޮޑުވުން ފާޅުކުރި ފުރަތަމަ ފަހަރެއް ނޫނެވެ. އެގޮތުން މިދިޔަ މަހު 28 ގައި އޭނާ ވަނީ ރާއްޖޭގެ ސަރުކާރާ ގާތް ގުޅުމެއް އޮންނަ އިންޑިއާގެ އެކްސްޓާނަލް މިނިސްޓަރު ޑރ. އެސް ޖައިޝަންކަރަށް އަށް ވެސް މައްސަލަ ހުށަހަޅުއްވައި އެ މީހުން މިނިވަން ކުރުމަށް މަސައްކަތް ކުރައްވައިފަ އެވެ.
"މަނިކުފާނު މި ކަމުގައި މަސައްކަތް ކުރައްވައިފި ނަމަ އެ މަސްވެރިން މިނިވަން ވާނެ ކަމަށް އަޅުގަނޑު ގަބޫލުކުރަން، އެ ކަމަށް މަސައްކަތް ކޮށްދެއްވުމަށް ދަންނަވަން،" އޭނާ ފޮނުއްވި ސިޓީފައިވެ އެވެ.
އެ ސިޓީގައި ބުނެފައިވާ ގޮތުގައި ރާއްޖޭން އެ މަސްވެރިންގެ މައްޗަށް 420،000 ދިވެހި ރުފިޔާގެ ޖޫރިމަނާއެއް އިއްވާ މި މަހުގެ ނިޔަލަށް އެ ފައިސާ ދައްކަން ވަނީ އަންގައިފަ އެވެ. އަދި އެ ނުދައްކާނަމަ މަސް ބޯޓު އަދި މަސްވެރިން ދޫކޮށްނުލާނެ ކަމަށް އަންގާފައިވާ ކަމަށް ސްޓާލިން ޖައިޝަންކަރަށް ލިޔުއްވި ސިޓީގައި ބުނެފައިވެ އެވެ.
