އެމްޑީޕީން ސުޕްރީމް ކޯޓަށް ހުށަހަޅާފައިވާ މައްސަލަ ނުނިމި އޮތަސް ޖަލްސާތައް ކުރިއަށް ގެންދެވޭނެ ކަން އަމީން އާއްމު ފާތިމަތު ނިއުޝާ، ރައްޔިތުންގެ މަޖިލީހުގެ ނައިބުރައީސް އީވާ އަބްދުﷲ އަށް އަންގަވާފައިވާ ކަން އެނގިއްޖެ އެވެ.
އެނގިފައިވާ ގޮތުގައި އެމްޑީޕީން ސުޕްރީމްކޯޓަށް ހުށަހަޅާފައިވާ މައްސަލަ ނުނިމެނީސް މަޖިލީހުގެ ޖަލްސާތައް ބޭއްވޭނެ ކަމަށް ދެކެވަޑައި ނުގަންނަވާ ކަން މަޖިލީހުގެ އިދާރާއަށް މިދިޔަ ހަފުތާގައި އީވާ އެންގެވި އެވެ. އެ މައްސަލަ ނުނިމި އޮތަސް ޖަލްސާތައް ބޭއްވޭނެކަމަށް ލަފާ ދެއްވައި މިދިޔަ ބުދަ ދުވަހަށް ތާވަލުކުރި ޖަލްސާއަށް ވަޑައިގެން ދެއްވުން އެދި އަމީން އާއްމު ސިޓީއެއް ވެސް ފޮނުއްވި އެވެ.
އެ ސިޓީ ފޮނުއްވުމުން އެ ދުވަހުގެ ޖަލްސާއަށް ވަޑައިނުގެން އީވާ އަނެއްކާވެސް ހުންނެވީ ސަލާމުގަ އެވެ. ސުޕްރީމްކޯޓަށް ހުށަހަޅާފައިވާ މައްސަަލަ ނުނިމެނީސް ޖަލްސާއެއްގެ ރިޔާސަތު ބަލަހައްޓަވަން އުޒުރުވެރިވަޑައިގަންނަވާ ކަަމަށް ވިދާޅުވެ ސިޓީއެއް ފޮނުއްވީ އެެއަށް ފަހުގަ އެވެ.
އެމްޑީޕީން ސުޕްރީމްކޯޓަށް މައްސަލައެއް ހުށަހެޅީ ރައްޔިތުންގެ މަޖިލީހުގެ ރައީސް މަގާމުން ވަކިކުރުމުގެ ގަރާރުގެ މަސައްކަތްކުރާ ޖަލްސާއެއްގެ ރިޔާސަތު މަޖިލީހުގެ ނައިބުރައީސް ނޫން މެމްބަރަކަށް ވެސް ބެލެހެއްޓެވޭ ގޮތަށް މަޖިލީހުގެ ގަވައިދު މާނަކޮށްދިނުން އެދި އެވެ. މަޖިލީހުގެ ރައީސް މަގާމުން ވަކިކުރުމުގެ ގަރާރުގެ މަސައްކަތް ނުނިމެނީސް މަޖިލީހުގެ އެހެން މަސައްކަތެއް ނުކުރެވޭ ގޮތަށް ގަވައިދު މާނަކޮށްދޭން ވެސް އެ މައްސަލާގައި އެދުނެވެ.
އެ މައްސަލަ ނުނިމެނީސް ޖަލްސާތައް ކުރިއަށް ގެންދެވޭނެ ކަމަށް ގަބޫލުނުކުރައްވާ ކަމަށް ވިދާޅުވެ، އީވާ ފޮނުއްވި ސިޓީއަށް ޖަވާބު ދެއްވަމުން އަމީން އާއްމު ވިދާޅުވީ ކޯޓަށް ހުށަހަޅާފައިވާ މައްސަލައާއި މަޖިލީހުގެ ގަވައިދުގެ 205 ވަނަ މާއްދާގެ ދަށުން ޖަލްސާއެއް ކުރިއަށް ގެންދިއުމަކީ މުޅިން ދެކަމެއް ކަމަށެވެ. އެހެންވެ އެކެއް ނޮވެމްބަރުގެ ޖަލްސާއަށް ވަޑައިގެން ދެއްވަން އެދިވަޑައިގަންނަވާ ކަމަށް އަމީން އާއްމު ވިދާޅުވިކަން ވެސް ވަނީ އެނގިފަ އެވެ.
އެމްޑީޕީން ދެކެނީ ގަސްދުގައި މަޖިލިސް ހުއްޓުވާ ކަމަށް
ރައްޔިތުންގެ މަޖިލީހުގެ ރައީސް މުހައްމަދު ނަަޝީދު މަގާމުން ވަކިކުރުމުގެ ގަރާރު އެޖެންޑާކުރި ޖަލްސާތަކަށް ވަޑައި ނުގެން ސަލާމުގައި އުޅުއްވުމަށް ފަހު މިފަހަރު ދެއްކެވި އުޒުރަކީ އެމްޑީޕީން ސިފަކުރާ ގޮތުގައި "ގަސްދުގައި މަޖިލިސް ހުއްޓުވާފައި ބާއްވަން" އީވާ ދެއްކެވި އުޒުރެކެވެެ.
ހުޅުމާލެ ދާއިރާގެ އެމްޑީޕީ މެމްބަރު އަލީ ނިޔާޒު ވިދާޅުވީ މަޖިލިސް މިވަގުތު ހުއްޓުވާފައި ބޭއްވުމަކީ ދަ ޑިމޮކްރެޓްސް އިން ބޭނުންވާ ގޮތް ކަމަށް މައުލޫމާތު ލިބިވަޑައިގެންފައިވާ ކަމަށެވެ.
"އަޑުއިވޭ ގޮތުގައި ޕީޕީއެމްއާއި ދަ ޑިމޮކްރެޓްސްގެ ރޭވުމެއް އެބަ އޮތް ނޮވެމްބަރު 17 އާ ހިސާބަށް މަޖިލިސް ހުއްޓުވާފައި ބާއްވަން. އެއީ އެބޭފުޅުން ބޭނުން ވަނީ އާ ރައީސް ހުވާކުރައްވާ ޖަލްސާގެ ރިޔާސަތުގައި ރައީސް ނަޝީދު އިންނަވަން. އެހެންވީމާ ކޮންމެ ފަދަ އުޒުރެއް ވެސް ދައްކަވައިފާނެ،" އަލީ ނިޔާޒު ވިދާޅުވި އެވެ.
ނަޝީދުގެ އިތުބާރު ނެތް ކަމުގެ މައްސަލަ އެޖެންޑާކުރި ޖަލްސާ ނުބޭއްވީ ގަވާއިދާ ހިލާފަށް ކަމަށް ބުނެ ސުޕްރީމް ކޯޓަށް ހުށަހަޅާފައިވާ މައްސަލައިގެ އަޑުއެހުންތައް މާދަމާ ހެނދުނު 9:45 ގައި ފެށުމަށް ވަނީ ތާވަލުކޮށްފަ އެވެ.
