ވިއްސާރަވެ, މޫސުން ގޯށްވާނެ ކަމަށް ލަފާކޮށް އުތުރުން ފެށިގެން ގއ އަތޮޅާ ހަމައަށް ހުދު ސަމާލު ނެރެފި އެވެ.
މޯލްޑިވްސް މީޓިއިރޮލޮޖީ ސާވިސް (މެޓް އޮފީހުން) ލަފާ ކޮށްފައިވާ ގޮތުގައި, މިއަދު މެންދުރު 2:30 ވަންދެން ހއ އަތޮޅުން ފެށިގެން ގއ އަތޮޅާ ދެމެދުގެ އަތޮޅުތަކަށް ބޯކޮށް ވާރޭވެހުމާއެކު ގުގުރާނެ އެވެ. މިއަދު ހަވީރު 6:00 އާ ހަމައަށް ރާއްޖޭގެ ހުރިހާ ހިސާބަކަށް ވެސް މިއަދު ވިއްސާރަ ކުރާނެ ކަމަށް ވެސް އެ އިދާރާއިން ލަފާކުރެ އެވެ.
އެންމެ ދެކުނުގެ އަތޮޅުތަަށް ކެރީގެ އަސަރު ފޯރާނެ ކަމަށާއި, އެހެން ހިސާބުތަކަށް ގުގުރުމާއެކު ވިއްސާރަކޮށް, ބައެއް ރަށްތަކަށް ބޯކޮށް ވާރޭވެހުން އެކަށީގެންވާ ކަމަށް ލަފާ ކޮށްފައި ވެއެވެ.
ވަޔަށް ބަލާއިރު, އިރާއި އިރުދެކުނު, ދެކުނުގެ އަތޮޅުތަކަށް ގަޑިއަކު އަށް މޭލާއި 18 މޭލާ ދެމެދުގެ ބާރުމިނުގައި ވައިޖެހޭއިރު, އެހެން ހިސާބުތަކަށް ގަޑިއަކު ތިން މޭލާއި 13 މޭލާ ދެމެދުގެ ބާރު މިނުގައި ވައި ޖެހޭނެ އެވެ.
އަދި ދެކުނުގެ ކަނޑުތައް އާދައިގެ ވަރަކަށް ގަދައިރު, އުތުރާއި މެދުރާއްޖެތެރޭގެ ކަނޑުތައް އާދައިގެ ވަރަކަށް މަޑުވާނެ އެވެ. ދެކުނުގެ އަތޮޅުތަކަށް ރާޅުގެ އުސްމިން ތިން ފޫޓާއި ހަ ފޫޓާ ދެމެދު ހުރިއިރު, އުތުރާއި މެދުރާއްޖެތެރޭގެ އަތޮޅުތަކަށް ރާޅުގެ އުސްމިން ލަފާކޮށްފައި ވަނީ ދެ ފޫޓާއި ހަތަރު ފޫޓާ ދެމެދަށެވެ.
ރާއްޖެއަށް ކުރަމުންދާ ވިއްސާރާގައި އިއްޔެ ވަނީ މާލެ ސަރަހައްދަށް ބޯކޮށް ވާރޭވެހި ފެންބޮޑުވެފަ އެވެ. އިއްޔެ ހެނދުނު 8:00 އިން ފެށިގެން 24 ގަޑިއިރަށް ވާރޭވެހުނު މިންވަރަށް ބަލާއިރު, އެންމެ ގިނައިން ވެހުނީ ހުޅުލެއާއި މާލޭގެ އިތުރުން ލ. ކައްދުއަށެވެ. ހުޅުލެއަށް 73.4 މިލިމީޓަރުގެ ވާރޭވެހުނުއިރު މާލެއަށް 67.7 މިލިމީޓަރުގެ އަދި ކައްދުއަށް 62.9 މިލިމީޓަރުގެ ވާރޭވެހުނެވެ.
