ކުރީގެ ރައީސް އަބްދުﷲ ޔާމީނަށް ދިން ލުއިތަކާއެކު، ޕެރޯލް ގާނޫނާއި އެމަނިކުފާނު އެއްބަސްވެވަޑައިގެންނެވި އިގުރާރާ ހިލާފަށް ސިޔާސީ ހަރަކާތްތައް ހިންގަމުންދާތީ، ލުއިތައް އުވާލާނެ ކަމަށް ކަރެކްޝަންސްއިން އިންޒާރު ދީފައިވާއިރު އެ މައްސަލާގައި ޕީޕީއެމް/ޕީއެންސީގެ ލީޑަރުން އެހެން މައްސަލަތަކާ ހިލާފަށް ހިމޭނުންނެވެ.
ހުކުމުގެ ދަށުން ތަންފީޒުކުރައްވަމުން ގެންދެވި ގެ ބަންދަށް އޮކްޓޯބަރު 28, ގައި ދިން ލުއިތަކާ އެކު ޖެހިގެން އައި ދުވަހުގެ ރޭ އެމަނިކުފާނުގެ ގެކޮޅު, ހ. ދޫވެހި ކައިރީގައި ހުންނަ ޕީޕީއެމްގެ އޮފީހަށް ވަޑައިގެން ސަޕޯޓަރުންނާ ބައްދަލުކުރެއްވި އެވެ. އެއަށްފަހު އޮކްޓޯބަރު 30 ވަނަ ދުވަހުގެ ރޭ ޔާމީނު ވަނީ ޕީޕީއެމް އޮފީހުގައި ބޭއްވި ޖަލްސާއެއްގައި ބައިވެރިވެވަޑައިގަނެ ވާހަކަފުޅު ދައްކަވާފަ އެވެ.
ވަރަށް މުއުތަބަރު ގޮތަކަށް "އަދަދު" އަށް ކަށަވަރުވެފައި ވާގޮތުގައި ރައީސް ޔާމީނުގެ ބަންދަށް ކަރެކްޝަންސްއިން ލުއި ދީފައި ވަނީ އެ ސާވިސްއާއި ޔާމީންއާ ދެމެދު އިގުރާރެއް އެކުލަވައިލުމަށްފަހު އެވެ.
އެ އިގުރާރުގައި ޔާމީން ވަނީ ދިވެހިރާއްޖޭގެ ޖަލުތަކާއި ޕެރޯލްގެ ގާނޫނުގެ ދަށުން ހަދާފައިވާ ގަވާއިދުތަކާއި އުސޫލުތަކާ ހިލާފު އެއްވެސް އަމަލެއް ނުހިންގުމަށް އެއްބަސްވެފަ އެވެ.
ނަމަވެސް, އެ އިގުރާރާ ހިލާފުވެފައިވާތީ އެމަނިކުފާނަށް އިއްޔެގެ ވަގުތެއްގައި ވަނީ އިންޒާރު ފޮނުވާފަ އެވެ.
އޭގެ ފަހުން އެއް ދުވަސް ފާއިތުވެގެންދާއިރު ވެސް މިހާތަނަށް ޕީޕީއެމް/ޕީއެންސީ ލީޑާޝިޕްގައި ހިމެނޭ ބޭފުޅުން އެކަމާ މެދު އެއްޗެއް ވިދާޅު ނުވެ ތިއްބެވީ ހިމޭނުންނެވެ.
ޔާމީންގެ މައްޗަށް އިއްވާފައިވާ 11 އަހަރުގެ ޖަލު ހުކުމަކީ "ހަރާން ހުކުމް" އެއްގެ ގޮތުގައި ޕީޕީއެމް/ޕީއެންސީން ކަނޑައަޅާފައިވާއިރު އެއީ އެ ޕާޓީތަކުން ބަލައިގަންނަ ހުކުމެއް ނޫނެވެ. އަދި, ޔާމީން ޖަލުގައި ހުންނެވި ދުވަސްވަރު ތަކުރާރުކޮށް އެ ހުކުމާ ދެކޮޅަށާއި އެމަނިކުފާނުގެ ބަންދާ މެދު ނުރުހުން ފާޅުކޮށް އިދިކޮޅުން އަޑު އުފުލި އެވެ.
އޭގެ އިތުރުން, ކަރެކްޝަންސްއަކީ ވެސް އިދިކޮޅުގެ އެންމެ ގިނަ ފާޑުކިޔުން އަމާޒުވި އެއް މުއައްސަސާ އެވެ. ނަމަވެސް, އިއްޔެ ކަރެކްޝަންސްއިން ޔާމީނަށް އެފަދަ އިންޒާރެއް ދީފައިވާތީ މި ހާލަތުގައި ވެރިކަމާ ހަވާލުވާން ތައްޔާރުވަމުންދާ ޕާޓީގެ ލީޑަޝިޕްގެ ކަންބޮޑުވުން އޮތްކަން ވެސް ހާމަކޮށްފައި ނުވެ އެވެ. އެމަނިކުފާނުގެ ގާނޫނީ ޓީމުން ވެސް މިހާތަނަށް އެކަމާ ގުޅިގެން އެއްވެސް އެއްޗެއް ބުނެފައި ނުވެ އެވެ.
ބަންދަށް ލުއި ދިނުމަށް އެކުލަވާލި އިގުރާރުގެ ދަށުން ޔާމީންއަށް ހުއްދަ ދީފައި ވަނީ ޑޮކްޓަރީ ފަރުވާގެ އެކިއެކި ބޭނުންތަކަށާއި ކަސްރަތު ކުރުމުގެ އެކިއެކި ބޭނުންތަކުގެ އިތުރުން މުހިންމު އެކި ބޭނުންތަކަށް ގުރޭޓާ މާލެ ސަރަހައްދުގެ ކޮންމެ ތަނަކަށް ވެސް ކަރެކްޝަންސްއަށް އެންގުމަށްފަހު ދިއުމަށެވެ.
އަދި, މުހިންމު ކަންކަމުގައި ބައްދަލު ކުރަން ބޭނުންވާ މީހުންނާއި ކަރެކްޝަންސްއަށް އެންގުމަކާ ނުލައި ބައްދަލު ކުރުމުގެ ހުއްދަ ދީފައިވެ އެވެ. އެކަމަކު ޖަލުތަކާއި ޕެރޯލްގެ ގާނޫނުގެ 62 ގެ ދަށުން ސިޔާސީ ހަރަކާތެއްގައި ބައިވެރިވުމަކީ ގާނޫނީ ކުށެކެވެ.
