އަންނަ އަހަރަށް 49.5 ބިލިއަން ރުފިޔާގެ ބަޖެޓެއް ފިނޭންސް މިނިސްޓްރީން ރައްޔިތުންގެ މަޖިލީހަށް އިއްޔެ ހުށަހެޅި އެވެ.
ދައުލަތުގެ މާލިއްޔަތާ ބެހޭ ގާނޫނުގެ 32 ވަނަ މާއްދާގައިވާ ގޮތުން އަހަރަކަށް ލަފާކުރާ ދައުލަތުގެ ބަޖެޓް އެ އަހަރެެއް ފެށުމުގެ ދެ މަސްދުވަސް ކުރިން މަޖިލީހަށް ހުށަހަޅަން ޖެހެ އެވެ. ގާނޫނުގެ އެ މާއްދާއާ އެއްގޮތަށް އިއްޔެގެ ޖަލްސާގައި ބަޖެޓު ހުށަހެޅުމަށް ތާވަލު ކުރި ނަމަވެސް ފިނޭންސް މިނިސްޓަރު އިބްރާހިމް އަމީރު ޖަލްސާއަށް ވަޑައިނުގަތެވެ.
ސަބަބަކީ ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވަކި ކުރަން އެމްޑީޕީ ހުށަހަޅުއްވާފައިވާ މައްސަލަ އެޖެންޑާއިން ނަގާފައި އޮތުމެވެ. ބަޖެޓު ޖަލްސާގެ އިތުރުން މަޖިލީހުގައި އެހެން މަސައްކަތެއް ވެސް ކުރިޔަށް ގެންދެވޭނީ ނަޝީދު ވަކިކުރުމުގެ މައްސަލަ އަށް ގޮތެއް ނިންމުމަށް ފަހު ކަމަށް އެޓާނީ ޖެނެރަލް އިބްރާހިމް ރިފްއަތު ވަނީ ލަފާ ވެސް ދެއްވައިފަ އެވެ.
އަންނަ އަހަރަށް ލަފާކުރާ ބަޖެޓުން ދަރަންޏާއި ލޯނު އަދާކުރަން ދައްކާ ފައިސާ އުނިކުރުމަށް ފަހު، ބަޖެޓުގެ ޖުމުލަ ހަރަދަކީ 47.3 ބިލިއަން ރުފިޔާ އެވެ. އޭގެ ތެރެއިން ރިކަރަންޓު ހަރަދަށް 34.8 ބިލިއަން ރުފިޔާ ހޭދަވާއިރު، ޕީއެސްއައިޕީ އަށް 8.6 ބިލިއަން ރުފިޔާ އަދި އެހެނިހެން ކެޕިޓަލް ހަރަދަށް 6 ބިލިއަން ރުފިޔާ ހަރަދުވާނެ ކަމަށް ލަފާކުރެ އެވެ.
މައިގަނޑު ހަރަދު
- ސިއްހީ ދާއިރާ: 7.4 ބިލިއަން ރުފިޔާ
- ތައުލީމީ ދާއިރާ: 5.3 ބިލިއަން ރުފިޔާ
- އިގުތިސާދީ އަދި ސިނާއީ ކުރިއެރުމަށް: 8.9 ބިލިއަން ރުފިޔާ
- ގެދޮރު އިމާރާތް ކުރުމާއި ޖަމާއަތުގެ ފައިދާއަށް: 4.5 ބިލިއަން ރުފިޔާ
- އިޖުތިމާއީ ރައްކާތެރިކަން: 3.5 ބިލިއަން ރުފިޔާ
- ތިމާވެށި ރައްކާތެރި ކުރަން: 1.8 ބިލިއަން ރުފިޔާ
- ދިފާއީ، އަދުލް އިންސާފު އަދި އަމަން ގާއިމުކުރަން: 5.6 ބިލިއަން ރުފިޔާ
އަންނަ އަހަރު ވެސް ކުރާ ހަރަދު ފޫބެއްދޭނެ އާމްދަނީއެއް ނުލިބެ އެވެ.
ބަޖެޓު ފޮތުގައި ބަޔާންކޮށްފައިވާ ގޮތުގައި އަންނަ އަހަރު ޖުމުލަ 33.5 ބިލިއަން ރުފިޔާ ލިބޭނެ ކަމަށް ލަފާކުރާއިރު، 25.6 ބިލިއަން ރުފިޔާއަކީ ޓެކުހުގެ އާމްދަނީ އެވެ. އެހެނިހެން އާމްދަނީގެ ގޮތުގައި 6.6 ބިލިއަން ރުފިޔާ ލިބޭނެ ކަމަށް ބަލާއިރު، ހިލޭ އެހީގައި ލިބޭނެ ކަމަށް ފޮތުގައި ލިޔެފައި އޮތީ 1.3 ބިލިއަން ރުފިޔާ އެވެ.
އަންނަ އަހަރަށް ލަފާކޮށް ފިނޭންސުން ބަޖެޓު ހުށަހެޅިއިރު އިންތިހާބީ ރައީސް ޑރ. މުހައްމަދު މުއިއްޒުގެ އޮފީހުގެ ލަފާ ވެސް ވަނީ ހޯދާފަ އެވެ. އަދި, އެމަނިކުފާނު އެދިލެއްވި ކަންކަން ވެސް ބަޖެޓުގައި ހިމަނާނެ ކަމަށް ފިނޭންސް މިނިސްޓްރީން ބުނެފައިވެ އެވެ.
މުހިންމު ބަހެއް ހަބަރު
ދުވަހުގެ ފޮޓޯ
ގަޑިބުރު ކުރިން ހެދުމުގެ މަސައްކަތް ކުރަނީ. މިފަހަރު ގަޑިބުރު ހަދަނީ. މި މަޝްރޫއުގެ ތަފްސީލެއް ސިޓީ ކައުންސިލުން ހާމައެެއް ނުކުރޭ. -- ފޮޓޯ: އަބްދުﷲ އިޔާން/ އަދަދު
