ރައްޔިތުންގެ މަޖިލީހުގެ ރައީސްގެ އިތުބާރު ނެތްކަމުގެ މައްސަލަ މިއަދު ކުރިއަށް ނުގެންދެވުމުން, އެމްޑީޕީގެ މެންބަރުން އިދާރީ މޭޒު ކައިރީގައި ކުރި އިހުތިޖާޖުގެ ތެރެއިން މަޖިލީހުގެ ކައުންސެލް ޖެނެރަލް ފާތިމަތު ފިލްޒާގެ ބައެއް ތަކެއްޗަށް ގެއްލުންދިން ކަމަށް ބުނެ އެ މައްސަލަ ދަ ޑިމޮކްރެޓްސްއިން ކުށްވެރިކޮށްފި އެވެ.
މަޖިލިސް ތަޅުމުގެ ތެރޭގައި ނަގާފައިވާ ވީޑިއޯއެއްގައު އެމްޑީޕީ ބައެއް މެންބަރުން ވަނީ އިދާރީ މޭޒު ކައިރިއަށް އެއްވެ, އެ މޭޒުމަތީގައި ހުރި ބައެއް ތަކެއްޗަށް ގެއްލުންދޭ މަންޒަރު ފެނެ އެވެ.
މިކަމާ ގުޅިގެން ޑިމޮކްރެޓުން ނެރުނު ބަޔާނުގައި ބުނީ, އެމްޑީޕީ މެންބަރުން ވަނީ ފިލްޒާގެ ކޮމްޕިއުޓާ ސިސްޓަމް ވައްޓާލާ, މޯބައިލް ފޯނަށާއި އަތްދަބަހަށް އަމާޒުކޮށް އެތަކެއްޗަށް ގެއްލުންދީފައި ކަމަށެވެ. އަދި މަޖިލީހުގެ ނައިބު ރައީސް މިއަދު ސަލާމް ވިދާޅުވެފައިވާކަން އަމީން އާންމު ހިއްސާކުރެއްވުމުން އިދާރީ މޭޒު ކައިރިއަށް އެއްވެ, އިދާރީ މުވައްޒަފުންނާ ދިމާކޮށް ހަޑިހުތުރު އެއްޗެހި ކިޔާފައިވާ ކަމަށް ވެސް ބުނެފައިވެ އެވެ.
ހަމައެއާއެކު, މަރަދޫ ދާއިރާގެ މެންބަރު އިބްރާހިމް ޝަރީފް ރިޔާސަތުގެ ސަރަހައްދަށް ވަންނަވައި ރިޔާސަތުގެ ގޮނޑިކޮޅުގައި އިށީނަވައި ގަވައިދާ ހިލާފުވެވަޑައިގެންނެވިކަން ފާހަގަކޮށް ޑިމޮކްރެޓުން ވަނީ މިކަންކަމުގައި ޖިނާއީ ކުށެއް އެކުލެވޭ ނަމަ އެކަން ބަލައިދިނުމަށް ކަމާބެހޭ މުއައްސަސާތަކަށް ގޮވާލާފަ އެވެ.
މަޖިލީހުގެ ރައީސް ނަޝީދު އަދި ނައިބު ރައީސް އީވާ ނިސްބަތްވެވަޑައިގަންނަވާ ދަ ޑިމޮކްރެޓްސް އިން ބުނީ އެކަމަނާ މިއަދުގެ ޖަލްސާއަށް ވަޑައިނުގެންނެވި ސަލާން ވިދާޅުވީ ޑެންގޫ ހުމަށް ޕޮޒިޓިވްވެފައިވާތީ ކަމަށެވެ. މިދިޔަ ހަފުތާގެ ބުދަ ދުވަހު ބޭއްވި ޖަލްސާއަށް ވެސް އީވާ ވަޑައެއްނުގަންނަވަ އެވެ.
މިއަދުގެ ޖަލްސާ ކެންސަލް ކުރުމުން، އެހެން މީހަކު ރިޔާސަތު ބަލަހައްޓާ ގޮތަށް ހަމަޖައްސައިގެން ނަމަވެސް ޖަލްސާ ކުރިއަށް ގެންދިޔުމަށް އެމްޑީޕީން މަޖިލީހުގެ އިދާރާއަށް ހުށަހެޅި އެވެ. ނަމަވެސް މަޖިލީހުގެ އަމީންއާންމު ފާތިމަތު ނިއުޝާ އެކަމަށް އެއްބަސްވެވަޑައިނުގެންނެވި ކަމަށް އެމްޑީޕީން ބުނެ އެވެ.
