ރައްޔިތުންގެ މަޖިލީހުގެ ރައީސް މުހައްމަދު ނަޝީދު މަގާމުން ވަކިކުރަން އެމްޑީޕީން ހުށަހެޅި ގަރާރު އެޖެންޑާކޮށްފައި ވަނިކޮށް މަޖިލީހުގެ މިއަދުގެ ޖަލްސާ ކެންސަލް ވުމުން އެމްޑީޕީގެ މެމްބަރުން މަޖިލީހުގެ ތަޅުގައި ނުރުހުން ފާޅުކޮށް "ހައިޖާނު" ހަދާލައިފި އެވެ.
މިއަދުގެ ޖަލްސާ ކެންސަލްކުރީ މަޖިލީހުގެ ނައިބުރައީސް އީވާ އަބްދުﷲ އާލާސްކަންފުޅާ އުޅުއްވާތީ ސަލާމުގައި ހުންނެވުމުންނެވެ. މިއަދުގެ ޖަލްސާ ފަށަން އޮތް ގަޑިއަށް މެމްބަރުން ތަޅުމަށް ވަޑައިގެންނެވުމުން އެކަން އެންގެވީ އަމީންއާންމު ފާތިމަތު ނިއުޝާ އެވެ.
ނިއުޝާ އެކަން އިއުލާނުކުރެއްވުމާއި އެކު އެމްޑީޕީގެ ބައެއް މެމްބަރުން އިދާރީ މޭޒުގެ ކައިރިއަށް ވަޑައިގެން، ނިއުޝާ އާއި ކޮންސުލް ޖެނެރަލް ފާތިމަތު ފިލްޒާއާ ދެކޮޅަށް ނުރުހުމުގެ ބަސްތައް ރައްދުކުރެއްވި އެވެ. "އަދަދު" އަށް ލިބިފައިވާ ވީޑިއޯތަކުން ފެންނަ ގޮތުގައި އެކަމުގައި އިސްކޮށް އުޅުއްވީ މަރަދޫ ދާއިރާގެ މެމްބަރު އިބްރާހީމް ޝަރީފެވެ.
އިދާރީ މޭޒުގެ ކައިރީގައި ނުރުހުން ފާޅުކުރެއްވުމަށް ފަހު ޝަރީފު ވަޑައިގެން އިށީންނެވީ ރިޔާސީ މޭޒުގަ އެވެ.
މިއަދުގެ ޖަލްސާ ނުބޭއްވުމުން، އެ ޖަލްސާ ބޭއްވޭނެ ގޮތެއް ހޯދުމަށް އެމްޑީޕީން ގެންދަނީ ކޯޓަށް ވަޑައިގަތުމަށް މަޝްވަރާ ކުރަމުންނެވެ.
މަޖިލިސް ގަވާއިދު ބުނާ ގޮތުން، ރައީސް ވަކި ކުރާ ގަރާރު އިއްވާ ޖަލްސާގެ ރިޔާސަތު ބަލަހައްޓަންޖެހޭނީ ނައިބު ރައީސް އެވެ.
ނަމަވެސް އެމްޑީޕީން ގަބޫލު ކުރަނީ، ގަވާއިދު ލިޔެފައި އޮތީ ގާނޫނު އަސާސީން ލިބިދޭ ބާރެއް ހަނިކޮށްފައި ކަމަށެވެ. އަދި ގަވާއިދުގެ ތެރެއިން، އެހެން މީހަކަށް އެ ޖަލްސާގެ ރިޔާސަތު ބެލެހެއްޓޭނެ ކަމަށް ވެސް އެމްޑީޕީން ގަބޫލު ކުރެ އެވެ.
ނަޝީދު ލީޑު ކުރައްވާ އަދި އީވާ ވެސް ނިސްބަތްވެވަޑައިގަންނަވާ ދަ ޑިމޮކްރެޓްސް އިން ބުނަނީ ނަޝީދު ވަކި ކުރުމުގެ ގަރާރު ދެ ވަނަ ފަހަރަށް ހުށަހެޅީ ގަވާއިދާ ހިލާފަށް ކަމަށެވެ. އެ ޖަލްސާ ބޭއްވިޔަނުދޭން މަސައްކަތް ކުރާނެ ކަމަށް ކުރިން ވެސް ވިދާޅުވެފައިވެ އެވެ.
އެމްޑީޕީގެ ޕާލަމެންޓަރީ ގްރޫޕުން ބުނަނީ، ނަޝީދުގެ ވަކި ކުރުމުގެ ޖަލްސާ ނުބާއްވާ މަޖިލީހުގެ އެއްވެސް މަސައްކަތެއް ކުރިއަށް ނުގެންދެވޭނެ ކަމަށާއި އޭގެ ތެރޭގައި އިންތިހާބީ ރައީސް ހުވާ ކުރުމަށް ބާއްވާ ޖަލްސާ ވެސް ހިމެނޭނެ ކަމަށެވެ. އިންތިހާބީ ރައީސް ހުވާ ކުރައްވަން ޖެހެނީ މަޖިލީހުގެ ޖަލްސާއެއްގަ އެވެ.
މަޖިލީހުގެ ގަވާއިދު ބުނާ ގޮތުން، އެ މަޖިލީހުގެ ރައީސް ވަކި ކުރުމަށް ގަރާރެއް ހުށަހަޅައިފި ނަމަ ދެން އިތުރު މަސައްކަތެއް ކުރެވޭނީ އެ ގަރާރާމެދު ގޮތެއް ނިންމުމަށްފަހެވެ.
