މާލެ އާއި ހުޅުމާލެއާ ދެމެދު އޮންނަ ސިނަމާލެ ބްރިޖުގެ ހައިވޭގައި ހަރުކޮށްފައިވާ ސޯލާ ޕެނަލްތައް އެ ތަނުން ނަގާނެ ކަމަށް އިންތިހާބީ ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
މިއަދު ހަވީރު ހުޅުމާލެ ފުރަތަމަ ފިޔަވަހީގައި ދިރިއުޅޭ ރައްޔިތުންނާ ބައްދަލުކުރައްވައި، ވާހަކަ ދައްކަވަމުން އެމަނިކުފާނު ވިދާޅުވީ ޕެނަލްތަކުގެ ސަބަބުން ބްރިޖު ސަރަހައްދުން ފެންނަ ރީތި މަންޒަރު ވެސް ގެއްލިފައިވާ ކަމަށެވެ.
އިއާދަކުރަނިވި ހަކަތަ މުހިންމު ކަމަށާއި ނަމަވެސް މިހާރު އެ މަސައްކަތް ގެންގޮސްފައިވާ ގޮތަކީ އެންމެ ރަނގަޅު ގޮތް ނޫން ކަމަށް މުއިއްޒު ވިދާޅުވި އެވެ. އިންތިހާބީ ރައީސްގެ ހައިސިއްޔަތުން އެމަނިކުފާނުގެ ވިސްނެވުމަކީ ޕެނަލްތައް އެ ތަނުން ނެގުމަށް ފަހު މީހުން ދިރިއުޅޭ އެހެން ރަށަކަށް ބަދަލު ކުރުމަށެވެ.
"ރާއްޖޭގެ އެހެން ކޮންމެ ވެސް އެއް ރަށަކަށް، ނޫނީ ދެ ރަށަކަށް، އަޅުގަނޑަށް ހީވަނީ ދެ ރަށެއް ވަރު މުޅީން އިއާދަކުރަނިވި ހަކަތައަށް ބަދަލުކުރެވޭނެހެން އެ ހުރި ޕެނަލްތަކުން، އެހެންކަމުން ދެ ރަށެއް އެއްކޮށް ބަދަލުކުރުން ވާނީ އޭގެ ބޭނުން މާ ރަނގަޅަށް ކުރެވޭނެ ކަމަކަށް،" މުއިއްޒު ވިދާޅުވި އެވެ.
ވޯލްޑް ބޭންކުގެ އެހީގައި ތިމާވެއްޓާ ބެހޭ މިނިސްޓްރީން ހިންގާ އެ މަޝްރޫއުގެ ދަށުން ހައިވޭގައި ހަރުކޮށްފައިވާ ސޯލާ ޕެނަލްތައް މީގެ ކުރިން ވައިގަދަވެ ވިއްސައިގެން ގޮސް އޭގެ ތަހުގީގެއް ފެށި އެވެ.
އެ މަޝްރޫއު ނިމުމުން އަހަރަކަށް އުފައްދާ 7.3 މިލިއަން ކަރަންޓް ޔުނިޓުން ދައުލަތުން ކަރަންޓް އުފެއްދުމަށްޓަކައި ތެލަށް ކުރާ ހޭދައިން ގާތްގަނޑަކަށް 15 އާއި 20 މިލިއަން ދިވެހި ރުފިޔާ ސަލާމަތް ކުރެވޭނެ ކަމަށް މިނިސްޓްރީން ބުނެފައިވެ އެވެ.
މީގެ އިތުރުން ހުޅުމާލޭގެ ހުރިހާ މުނިސިޕަލް ހިދުމަތެއް މާލެ ސިޓީ ކައުންސިލަށް ބަދަލު ކުރުމުގެ ރިޔާސީ ވައުދުފުޅު ވެރިކަމުގެ ފުރަތަމަ 100 ދުވަހުގެ ތެރޭގައި ކުރައްވާނެ ކަމަށް މުއިއްޒު ވިދާޅުވި އެވެ.
އަދި ފުށިދިއްގަރު ފަޅު ހިއްކުމުގެ ބޮޑު މަޝްރޫއު ފުރަތަމަ ދެ މަހުގެ ތެރޭގައި ފެށުމަށް އިސްކަމެއް ދެއްވާނެ ކަމަށް އެމަނިކުފާނު ވިދާޅުވި އެވެ.
ރިޔާސީ އިންތިހާބާ ގާތްކޮށް، މި ސަރުކާރުން ދޫކޮށްފައިވާ ގޯއްޗާއި ފްލެޓްތައް އަތުނުލާނެ ކަމާއި، ދެވަނަ ބުރަށް ހުޅުވާލި ފުރުސަތުގައި ހުށަހެޅި އެޕްލިކޭޝަންތައް ބާތިލް ނުކުރާނެ ކަމުގެ ޔަގީންކަން ވެސް މުއިއްޒު ދެއްވި އެވެ.
"މި ސަރުކާރުން ކަން ކުރި ގޮތަކަށް އަޅުގަނޑުމެން އަމަލެއް ނުކުރާނަން، އެއަށްވުރެ އޯގާތެރިކޮށް އަޅުގަނޑުމެން ރައްޔިތުންނާ މެދު ކަންތައް ކުރާނީ،" މުއިއްޒު ވިދާޅުވި އެވެ.
އެމަނިކުފާނު ވިދާޅުވި ގޮތުގައި ހުޅުމާލެ ތަރައްގީ ކުރުމުގެ މަސައްކަތް ގެންދާނީ ރަނގަޅަށް ޕްލޭން ކުރެވިފައިވާ ހިތްފަސޭހަ ރަށެއް ގޮތަށެވެ. އެ ކަމަށް ޓަކައި، ބޭނުންވެފައިވާ އިތުރު ޕާކިން އިމާރާތްތަކަށް ހުޅުމާލޭގެ ހުރިހާ ފިޔަވައްސެއް ހިމެނޭ ގޮތަށް އެކި ސަރަހައްދުތަކުގައި ގާއިމުކުރައްވާނެ ކަމަށް ވެސް ވިދާޅުވި އެވެ.
