ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތް ކަމުގެ މައްސަލައިގައި ވޯޓު އޮކްޓޯބަރު 29, ގައި ނުނަގައިފި ހާލަތެއްގައި އެ މަޖިލީހުގެ އެއްވެސް މަސައްކަތަކަށް އެއްބާރުލުން ނުދިނުމަށް އަންނަ ދައުރުގައި މައި އިދިކޮޅު ޕާޓީއެއްގެ ގޮތުގައި ހަރަކާތްތެރިވާނެ މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ ޕާލިމެންޓަރީ ގްރޫޕުން ނިންމައިފި އެވެ.
ނަޝީދު ވަކިކުރުމުގެ މައްސަލަ އެމްޑީޕީން މަޖިލީހަށް ހުށަހެޅީ 49 މެމްބަރުންގެ ސޮޔާ އެކު އޮކްޓޯބަރު 8, ގަ އެވެ. މައްސަލައިގެ ނޯޓިސް ނަޝީދާއި މެމްބަރުންނަށް ފޮނުވާފައިވާއިރު އަންނަ އާދިއްތަ ދުވަހަށް މައްސަލަ އެޖެންޑާ ކުރުމަށް ވަނީ ނިންމާފަ އެވެ.
އެ މައްސަލާގައި އެމްޑީޕީން ވަނީ ނަޝީދުގެ އިތުބާރު ނެތް ކަމަށް ތްރީ ލައިން ވިޕެއް ނެރެ އެ ޖަލްސާއަށް ހާޒިރުވެ ވޯޓު ދިނުމަށް އެ ޕާޓީގެ މެމްބަރުންނަށް އަންގާފަ އެވެ.
އެއަށްފަހު ކަންތައްތައް ހިނގާފާނެ ގޮތަކާ މެދު މަޝްވަރާ ކުރި ކަމަށާއި މި ނިންމުން ނިންމީ މަޖިލީހުގެ ގަވާއިދުގެ 205 ވަނަ މާއްދާގައިވާ ގޮތުގެ މަތީން ކަމަށް އެމްޑީޕީގެ ޕީޖީ ލީޑަރު މުހައްމަދު އަސްލަމް މިއަދު ބޭއްވި ނޫސްވެރިންގެ ބައްދަލުވުމެއްގައި ވިދާޅުވި އެވެ.
titledesc
މިގޮތަށް ގަވާއިދުގައި ބަޔާންކޮށްފައިވާއިރު ހިތަދޫ އުތުރު ދާއިރާގެ މެމްބަރުކަން ވެސް ކުރައްވާ އަސްލަމް ވަނީ ކުރިއަށް އޮތް ދުވަސްތަކުގައި މަޖިލީހުން ކުރަން ޖެހޭ މުހިންމު މަސައްކަތްތަކެއް ހުރި ކަމަށް ވިދާޅުވެފަ އެވެ. އެގޮތުން, ރައީސުލްޖުމްހޫރިއްޔާ ހުވާ ކުރެއްވުމުގެ ރަސްމިއްޔާތުގެ ވާހަކަ އޭނާ ފާހަގަކުރެއްވި އެވެ.
"އެއީ ރައްޔިތުންގެ މަޖިލީހުން ކުރަން ޖެހޭ ކަމެއް. އެފަދަ ޖަލްސާއެއް ވެސް އަޅުގަނޑުމެންނެއް ގަބޫލެއް ނުކުރަން 29 ގެ ފަހުން, އެ ވޯޓު ނުނަގައި ކުރިއަށްގެންދެވިދާނެ ކަމަށް," އަސްލަމް ވިދާޅުވި އެވެ.
ނަޝީދުގެ އިތުބާރު ނެތްކަމަށް ކަނޑައަޅައި މަޖިލީހުގެ ރައީސްކަމުން ވަކިކުރަން އެމްޑީޕީން މީގެ ކުރިން ވެސް ހުށަހެޅި އެވެ. އެހެން ނަމަވެސް ރިޔާސީ އިންތިހާބުގެ ފުރަތަމަ ބުރަށް ފަހު އެ މައްސަަލަ އަނބުރާ ގެންދިޔަ އެވެ.
މަޖިލީހުގެ ކޮމިިޓީތައް އޭރު އެކުލަވާނުލައި އޮތުމުގެ ސަބަބުން މައްސަލަ އެޖެންޑާ ކުރުމުގައި ހުރަސްތަކެއް ކުރިމަތިވި ކަމަށާއި ނަމަވެސް މިހާރު އެޖެންޑާ ކުރުމަށް "އިތުރު ހުރަހެއް އިތުރު ހުއްޖަތެއް ނެތް" ކަމަށް އަސްލަމް ވިދާޅުވި އެވެ. އޭނާ އިޝާރާތް ކުރެއްވީ އޭރު އާންމު ކޮމިޓީގެ މަސައްކަތްތައް ހުއްޓިފައި އޮތުމަށެވެ. ނަމަވެސް, މިފަހަރުގެ މައްސަލާގައި އާންމު ކޮމިޓީން ވަނީ ބަހުސާ ގުޅޭ ނިންމުންތައް ނިންމާފަ އެވެ.
ނަޝީދުގެ އިތުބާރު ނެތް ކަމަށް ނަގާ ވޯޓު ކާމިޔާބުވެއްޖެ ހާލަތެއްގައި ރިޔާސާތާ ދެން ހަވާލުވާނީ މަޖިލީހުގެ ނައިބު ރައީސް އަދި ގަލޮޅު އުތުރު ދާއިރާގެ މެމްބަރު އީވާ އަބްދުالله އެވެ. އެ ހާލަތުގައި އީވާގެ އިތުބާރު ނެތް ކަމުގެ މައްސަލައެއް މަޖިލީހަށް ހުށަހެޅުމާ ގުޅޭގޮތުން މިހާތަނަށް މަޝްވަރާ ކުރެވިފައި ނުވާ ކަމަށް އަސްލަމް މިއަދު ހާމަކުރެއްވި އެވެ.
