އިންތިހާބުތަކަށް ސަރުކާރުތަކުން ނުފޫޒު ފޯރުވާ ކަމަށް ތުހުމަތު ކުރައްވައި، އިންތިހާބުތައް މިނިވަން ކުރަން ގޮވާލައި ރައްޔިތުންގެ މަޖިލީހުގެ މާފަންނު އުތުރު ދާއިރާގެ ދަ ޑިމޮކްރެޓްސް މެމްބަރު އިމްތިޔާޒް ފަހުމީ ގަރާރެއް ހުށަހެޅުއްވީ މިދިޔަ ރިޔާސީ އިންތިހާބުގެ މާކުރިންނެވެ. ނަމަވެސް މަޖިލީހުގައި މިއަދު ބޭއްވި ޖަލްސާގައި އެންމެ ދިގުކޮށް ބަހުސްކުރީ މާޗް 13، ގައި ހުށަހެޅުއްވި އެ ގަރާރަށެވެ.
އެ ބިލުގެ ބަހުސްގައި ބިނާކުރަނިވި ވާހަކައެއް މަދު މެމްބަރަކު ދެއްކެވި ނަމަވެސް ޖުމްލަ ގޮތެއްގައި އޮތީ ރާއްޖޭގެ ބޮޑު ދެ ޕާޓީން އެއް ބަޔަކު އަނެއް ބައެއްގެ ކުށް ދައްކައި، "ގުދޯގުދޯ" ގޮވުމެވެ.
މަޖިލީހުގެ މެޖޯރިޓީ ޕާޓީ އަދި މިހާރު އޮތް ސަރުކާރު ހިންގާ ޕާޓީ އެމްޑީޕީގެ ޕާލަމެންޓްރީ ގްރޫޕްގެ ލީޑަރު އަދި ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް ފުރަތަމަ ވެސް ހަޖޫ ޖެއްސެވީ އިންތިހާބުތަކަށް ނުފޫޒު ފޯރުވުން ވާދަވެރިން މާނަކުރާ ގޮތަށެވެ.
ނުފޫޒު ފޯރުވުމަކީ ރައްޔިތުންނަށް ޓަކައި ސަރުކާރުން ހިންގާ އެކިއެކި މަަޝްރޫއުތައް ކަމަށް ސިފަކުރާ ކަމަށް އޭނާ ތުހުމަތުކުރެއްވި އެވެ. އެފަދަ ބައެއް މަޝްރޫއުތަކާއި ސިޔާސަތުތައް އެެއީ އިންތިހާބަށް ނުފޫޒުފޯރުންތޯ ނުވަތަ ނޫންތޯ ސުވާލު އުފެއްދިދާނެ ކަމަށް ވެސް އޭނާ ވިދާޅުވި އެވެ.
"މިސާލަކަށް ސަރުކާރުން، ތައުލީމީ ދާއިރާގައި މަސައްކަތްކުރާ މުވައްޒަފުންގެ މުސާރަ ބޮޑުކުރީމާ އެެއީ އިންތިހާބަށް ނުފޫޒުފޯރުންތޯ ނުވަތަ ނޫންތޯ ސުވާލު އުފެއްދިދާނެ،" އޭނާ ވިދާޅުވި އެވެ.
އަސްލަމް މިމޭރުމުން ވާހަކަ ދެއްކެވި އިރު، އިންތިހާބުތައް ކައިރިވުމުން ފެށި މަޝްރޫއުތަކަކީ އިންތިހާބަށް ނުފޫޒު ފޯރުވުން ކަމަށް އެމްޑީޕީ އިިދިކޮޅުގައި އޮތް އިރު އެޕާޓީން ވެސް ތުހުމަތުކުރި އެވެ.
އެއަށް ފަހު އޭނާގެ ތުހުމަތު ކުރީގެ ރައީސް އަބްދުﷲ ޔާމީނުގެ ސަރުކާރަށް އަނބުރައިލައްވައި ވިދާޅުވީ މިހާރު ދަރަނި ބޮޑުވެފައިވާ ފެނަކަ ކޯޕަރޭޝަންގެ ދަރަނީގެ ބޮޑު ބަޔަކީ އެ ސަރުކާރުގެ ދުވަސްވަރުގެ ދަރަނި ކަމަށެވެ. ހަވާލާ ދެއްވީ އޮޑިޓް ރިޕޯޓަކަށެވެ.
ހެންވޭރު އުތުރު ދާއިރާގެ މެމްބަރު ހުސައިން ޝަމީމު (އަނދުން ހުސައިން) ވެސް ތުހުމަތު ކުރެއްވީ އިންތިހާބަށް ނުފޫޒު ފޯރުވުން ކަމަށް ވާދަވެރިން ސިފަކުރަނީ ރައްޔިތުންނަށް ޓަކައި ހިންގި މަޝްރޫއުތަކާއި ކަނޑައެޅި ސިޔާސަތުތައް ކަމަށެވެ.
"އެއް ސަރުކާރަކަށް ވުރެ އަނެއް ސަރުކާރު ރަނގަަޅުވާން ޖެހޭ"
ކުރީގެ ރައީސް އަބްދުﷲ ޔާމީނުގެ ސަރުކާރުގައި ޑިފެންސް މިނިސްޓަރުކަން ކުރެއްވި، މަޑުއްވަރި ދާއިރާގެ ޕީއެންސީ މެމްބަރު އާދަމް ޝަރީފު ތުހުމަތުކުރެއްވީ މާލޭ މީހުންނަށް ގޯތި ދޭން މިސަރަރުކާރުން ހިންގި މަޝްރޫއަކީ އިންތިހާބަށް ނުފޫޒު ފޯރުވަން ކުރި ކަމެއް ކަމަށެވެ.
"އިންތިހާބުގެ ތެރޭގައި، ކެމްޕެއިންކުރަމުން ދަނިކޮށް، ދެން ކަނޑުއަޑިން ގޯތިދޭ ގޮތަށް ނިންމައި އިއުލާނުކުރާ އިރު އެއަށް ކިޔާނީ ކަރަޕްޝަން، އެއަށް ކިޔާނީ ނުފޫޒު،" އާދަމް ޝަރީފު ވިދާޅުވި އެވެ.
އޭނާ މި މޭރުމުން ވާހަކަ ދެއްކެވި އިރު ކުރީގެ ރައީސް އަބްދުﷲ ޔާމީނުގެ ސަރުކާރުން 2018 ވަނަ އަހަރު، އެ ފަހަރުގެ އިންތިހާބާ ކައިރިވެފައި ވަނިކޮށް، "ހިޔާ އެކޮމްޕޮލިޝްޑް"ގެ ނަމުގައި ބޯހިޔާވަހިކަމުގެ މަޝްރޫއެއް އިއުލާނުކުރި އެވެ. އެއީ ވެސް ގޯއްޗާއި ފްލެޓް ދިނުމުގެ މަޝްރޫއެކެވެ.
ޔާމީނު ސަރުކާރުގެ އެފަދަ ބައެއް ސިޔާސަތުތަކުގެ ވާހަކަ އެމްޑީޕީ މެމްބަރުން ދައްކަވާތީ އާދަމް ޝަރީފު އެކަމަށް ވެސް ރައްދު ދެއްވި އެވެ. އޭނާ ވިދާޅުވީ ކުރިން ކުރި ގޮތޭ ކިޔައިގެން ވާހަކަ ދެއްކީމާ ކަމަކު ނުދާ ކަމަށާއި ރަައްޔިތުން ބޭނުން ވަނީ އެއް ސަރުކާރަށް ވުރެ އަނެއް ސަރުކާރު ރަނގަަޅުވާން ކަމަށެވެ.
"ރައްޔިތުން ބޭނުން ވަނީ އެއް ސަރުކާރަށް ވުރެެ އަނެއް ސަރުކާރެއް ރަނގަޅުވާން. އަޅުގަނޑުމެންގެ މިއަންނަ ސަރުކާރުގައި ވެސް އަނެއްކާ ވެސް އެކަން ކުރީމާ ، އިއްޒަތްތެރި ރައީސް ރައްޔިތުން ބޭނުންވާ ގޮތަކަށް، ރައްޔިތުން ބޭނުންވާ ތަހުޒީބެއް، އެކަހަލަ ވެރިކަމެއްނޫން ފެންނާނީ،" އޭނާ ވިދާޅުވި އެވެ.
އިންތިހާބުތަކަށް ސަރުކާރުން ނުފޫޒު ފޯރުވިޔަސް ސަރުކާރުން ބޭނުންވާ ނަތީޖާއެއް ނުނެރެވޭނެ ކަމަށް ވެސް މިއަދު ބައެއް މެމްބަރުން ވިދާޅުވި އެވެ. އެމޭރުމުން ވާހަކަ ދެއްކެވި މެމްބަރުން މިސާލަކަށް ދެއްކެވީ މިހާރުގެ ސަރުކާރެވެ.
