ސަރުކާރު ބަދަލުވާ ކޮންމެ ފަހަރަކު ދައުލަތުގެ ހުރިހާ ކުންފުންޏެއްގެ މުވައްޒަފުން ބަދަލުވާން ނުޖެހޭ ކަމަށް ރައްޔިތުންގެ މަޖިލީހުގެ މެޖޯރިޓީ ލީޑަރު، ހިތަދޫ އުތުރު ދާއިރާގެ އެމްޑީޕީ މެމްބަރު މުހައްމަދު އަސްލަމް މިއަދު ވިދާޅުވެއްޖެ އެވެ.
ރައްޔިތުންގެ މަޖިލީހުގައި މިއަދު ކުރިއަށް ގެންދާ އެއް ބަހުސަކީ ސަަރުކާރުތަކުން އިންތިހާބުތަކަށް ނުފޫޒުފޯރުވުން ހުއްޓައިލަން ގޮވާލައި މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ ހުށަަހެޅުއްވި ގަރާރެއްގެ ބަހުސެވެ. މިދިޔަ މާޗްމަހު ހުށަހެޅި އެ ގަރާރުގެ ބަހުސް މިއަދު ކުރިއަށް ގެންދިޔަ އިރު ފެނަކަ ކޯޕަރޭޝަނުން އާންމު ވިޔަފާރިތަކަށް ދައްކަން ޖެހޭ ފައިސާ ދައްކަން ގޮވައިލާ ގަރާރެއް ވެސް މަޖިލީހުގައި އެބަ އޮތެވެ.
އިންތިހާބުތަކަށް ނުފޫޒު ފޯރުވުން ހުއްޓާލަން ގޮވާލާ ގަރާރުގެ ބަހުސްގައި ވެސް މެމްބަރުންގެ ތުހުމަތުތައް އެންމެ ބޮޑަށް އަމާޒުކުރެއްވީ ފެނަކަ ކޯޕަރޭޝަނަށެވެ. އެ ތުހުމަތުތަކަށް ރައްދު ދެއްވަމުން އަސްލަމް ވިދާޅުވީ ސަރުކާރުގެ ކުންފުނިތައް ހަރުދަނާ ކުރަންޖެހޭ ކަމަށެވެ. ކުންފުނިތައް ހަރުދަނާ ކުރެވޭނެ އެއް ގޮތެއް ކަމަކަށް އޭނާ ދެއްކެވީ ސަރުކާރުތަކާއި އެކު ކުންފުނިތައް ބަދަލުވާން ނުޖެހޭ ގޮތަށް ބޭއްވުމެވެ.
"ސަރުކާރުގެ ކުންފުނިތައް ހިންގަން ތިބެން ޖެހޭނީ ހަރުދަނާ، ކުންފުނިތައް ހިންގޭ ވަރުގެ ގާބިލު މީހުން. ކޮންމެ ސަރުކާރަކާ އެއްކޮށް ކޮންމެ ކުންފުންޏެއްގެ މަތި އެއްކޮށް ބަދަލުވާކަށް ނުވެސް ޖެހޭނެ އިނގޭތޯ،" އަސްލަމް ވިދާޅުވި އެވެ.
އެގޮތަށް ބަދަލުވާން ނުޖެހޭނީ ގާބިލުކަމަށް ބަލައިގެން ރަނގަޅު މީހުން ކުންފުނިތަކަށް ލައިގެން ކަމަށް ވެސް އޭނާ ވިދާޅުވި އެެވެ.
ރާއްޖޭގައި ކަންހިނގާ ގޮތަށް ފާޑުވިދާޅުވަމުން އަސްލަމް ފާހަގަކުރެއްވި ގޮތުގައި ރާއްޖޭގައި ކުންފުނިތަކުގެ އިތުރުން މިނިވަން މުއައްސަސާތައް ވެސް ސަރުކާރާ އެކީ ބަދަލުވާ ކަމަށެވެ.
