ސަރުކާރުގެ ވިޔަފާރި ކުންފުނި، އެސްޓީއޯއިން ބޭހާއި ގުޅޭ ސަޕްލައިސް ފޯރުކޮށްދިނުމަށް ހާއްސަ އެއްބަސްވުމެއްގައި އިންޑިއާގެ ކުންފުންޏަކާ އެކު ސޮއިކުރަން އުޅޭ ކަމަށް ބުނެ އިންތިހާބީ ރައީސް ޑރ. މުހައްމަދު މުއިއްޒު އިއްޔެ ކުރެއްވި ތުހުމަތު ހެލްތު މިނިސްޓްރީން ވެސް މިއަދު ދޮގުކޮށްފި އެވެ.
އިންތިގާލީ ތަރުޖަމާނު، މުހައްމަދު ފިރުޒުލް އިއްޔެ ކުރިއަށް ގެންދިޔަ ނޫސްވެރިންގެ ބައްދަލުވުމުގައި ވާހަކަ ދައްކަވަމުން ވިދާޅުވީ އެ ކުންފުންޏަކީ އިންޑިއާގެ ޓެމިލްނާޑޫއަށް ނިސްބަތްވާ ކުންފުންޏެއް ކަމަށާއި އެ ކުންފުންޏާ އެކު އެއްބަސްވުމެއް ނުހެދުމަށް ޑރ. މުއިއްޒު އެދިވަޑައިގަންނަވާ ކަމަށެވެ.
އެކަމާ ގުޅޭގޮތުން މިއަދު ހެލްތު މިނިސްޓަރީގެ މީޑިއާ ޑިރެކްޓަރު، އައިޝަތު ޝަތުފާ ވިދާޅުވީ އެފަދަ އެއްބަސްވުމެއް ނެތް ކަމަށާއި ބޮޑަށް ލަފާކުރެވެނީ އެއީ އާންމު އުސޫލުން ބޭސް އެތެރެ ކުރުމަށް ރެއިޒް ކުރާ ޕާޗޭސް އޯޑަރުގެ ވާހަކަ ކަމަށެވެ.
"ކޮންމެ ހަމަކުން ޕީއޯ ރެއިސް ކުރާނެ ބޭސް ގެންނަން، ހަމައެކަނި އިންތިގާލީ މަރުހަލާގައެއް ނޫން، އަބަދުވެސް ކޮންމެ ހަ މަހަކުން ކުރާ ކަމެއް،" ޝަތުފާ ވިދާޅުވި އެވެ.
އަންނަ ޖެނުއަރީ މަހު ރާއްޖެއަށް ބޭސް އެތެރެ ކުރުމަށް ރެއިޒް ކުރާ ޕާޗޭސިން އޯޑަރުގެ މަސައްކަތް ނޫނީ އެބާވަތުގެ އެހެން އެއްވެސް މަސައްކަތެއް ކުރިއަށް ނުދާ ކަމަށް ވެސް އޭނާ ވިދާޅުވި އެވެ.
"މިނިސްޓަރީން އެކަހަލަ އެއްވެސް އިތުރު އެގްރީމެންޓެއްގައި ސޮއި ކުރުމަށް މަސައްކަތް ކޮށްފައެއް ނުވާނެ،" ޝަތުފާ ވިދާޅުވި އެވެ.
ހެލްތު މިނިސްޓަރީގެ އިތުރުން އެސްޓީއޯއިން ވެސް އެކަން ދޮގުކޮށްފައި ވީނަމަވެސް އިންތިގާލީ ތަރުޖަމާނު، ފިރުޒުލް މިއަދު ވެސް ވަނީ އެއީ ސައްހަ މައުލޫމާތެއް ކަމަށް ވިދާޅުވެ އިއްޔެގެ ވާހަކަ ތަކުރާރު ކުރައްވައިފަ އެވެ.
އެކަމާ ގުޅޭގޮތުން "އަދަދު" އިން ސުވާލު ކުރުމުން ފިރުޒުލް ވިދާޅުވީ އެ މައުލޫމާތު ލިބިފައި ވަނީ އިންތިގާލީ މަރުހަލާގެ ތެރެއިން އެކި މިނިސްޓަރީތަކާއި އޮފީސްތަކަށް ޓީމުތައް ޒިޔާރަތް ކުރުމުގެ ތެރެއިން ކަމަށެވެ.
"އެހެން ހުންނަ އެއްބަސްވުމެއްގައި އެއް މުއައްސަސާއަށްވުރެ ގިނަ މުއައްސަސާތަކުން ބައިވެރިވެފައި ވާނީ، އެހެންވީމާ އެކި މުއައްސަސާތަކުގެ ތެރެއިން [އިންތިގާލީ އޮފީހުގެ ޓީމުތައް ގޮސް] ކުރެވިފައި ހުރި މަސައްކަތުގެ ތެރެއިން ލިބިފައި އޮތް މައުލޫމާތެއް އެއީ،" ފިރުޒުލް ވިދާޅުވި އެވެ.
އޭނާ ވިދާޅުވީ މީގެ ކުރިން ވެސް އެ އޮފީހަށް ބައެއް ކަންކަން ފާހަގަ ކުރެވިގެން އެވާހަކަ ދެއްކީމާ ސަރުކާރުން ދޮގު ކުރާ ކަމަށެވެ. ނަމަވެސް, އެއްބަސްވުމުގެ ވާހަކައަކީ ހަގީގަތެއް ކަމަށް ފިރުޒުލް ވިދާޅުވި އެވެ.
ބޭސް ގެންނަން އެއްބަސްވުމެއްގައި ސޮއިކުރަން އުޅޭ މައްސަލަ ހުއްޓާލުމަށް އިންތިހާބީ ރައީސްގެ އޮފީހުގެ ފަރާތުން އިލްތިމާސް ކުރިއިރު، ނިމުނު ހަފުތާގެ ތެރޭގައި އެ އޮފީހުން ވަނީ، ފަރުވާއަށް ބޭނުންވާ ވަރަށް ސިއްހީ ފަރުވާދޭ ސާމާނުގެ ސްޓޮކް އާކޮށްފައި ނުވާ މައްސަލައިގައި ވެސް ކަންބޮޑުވުން ފާޅުކޮށްފަ އެވެ.
އޭރު އެ އޮފީހުން ބުނީ އެފަދަ ސާމާނުގެ ސްޓޮކު އަހަރަކު ދެ ފަހަރު އޯޑަރު ކުރަން ޖެހުނު ނަމަވެސް، މި އަހަރުގެ މިހާތަނަށް އެކަން އެގޮތަށް ކޮށްފައި ނުވާތީ، އަންނަ މަހުގެ މެދެއްހައި ހިސާބުގައި ބައެއް ސިއްހީ ހިދުމަތްތައް ދިނުން ހުއްޓާލަން ޖެހިދާނެ ކަމަށެވެ.
