މި އަހަރުގެ ބަޖެޓަށް އިތުރުކުރަން ހުށަހަޅާފައިވާ ސަޕްލިމެންޓަރީ ބަޖެޓުގައި އިންތިހާބީ ރައީސް ޑރ. މުހައްމަދު މުއިއްޒުގެ ފުރަތަމަ 100 ދުވަހުގެ ޕްލޭނަށް ބޭނުންވާ 200 މިލިއަން ރުފިޔާ ހިމަނައިފި ކަމަށް އިއްޔެ ރިޕޯޓުކުރި އެވެ.
ފިނޭންސް މިނިސްޓްރީން ބުދަ ދުވަހު ރައްޔިތުންގެ މަޖިލީހަށް ފޮނުވީ 6.5 ބިލިއަން ރުފިޔާ މި އަހަރުގެ ބަޖެޓަށް އިތުރުކުރާށެވެ. މި ފައިސާއާ އެކީ މި އަހަރުގެ ޖުމްލަ ބަޖެޓު 49.2 ބިލިއަން ރުފިޔާއަށް އަރަ އެވެ.
ސަޕްލިމެންޓަރީ ބަޖެޓަށް އިންތިހާބީ ރައީސް ހުށަހަޅުއްވަން ބޭނުންވެލައްވާ ބަދަލުތައް ހުށަހެޅުމުގެ ފުރުސަތު މި ސަރުކާރުން ފަހިކޮށްދީފައިވާ ކަމަށް ޑިރެކްޓާ ޖެނެރަލް އޮފް ޓްރާންސިޝަން އަބްދުއްރަހީމް އަބްދުﷲ ވިދާޅުވި އެވެ.
ވެރިކަމާ ހަވާލުވާ ޕީޕީއެމް/ޕީއެންސީ ސަރުކާރުން ބަޖެޓަށް ބޭނުންވާ ބަދަލުތައް ގެނައުމުގެ މަސައްކަތް ކުރަމުން ގެންދަނީ އެކަމަށް ހާއްސަވެގެން ހޮވާފައިވާ ކޮމިޓީއަކުންނެވެ. އެމަނިކުފާނުގެ ފުރަތަމަ 100 ދުވަހުގެ އަމާޒުތައް ހާސިލުކުރުމަށް ބޭނުންވާ 200 މިލިއަން ރުފިޔާ ސަޕްލިމެންޓަރީ ބަޖެޓުގައި ހިމަނަން ހުށަހެޅި އެވެ.
"ޓްރާންސިޝަން ކޮމިޓީން އެދިފައިވާ ގޮތަށް 200 މިލިއަން ރުފިޔާ އިތުރުކޮށް ސަޕްލިމެންޓަރީ ބަޖެޓު ހުށަހަޅާފައިވާނީ," ފިނޭންސްގެ އިސް އޮފިޝަލަކު އިއްޔެ "އަދަދު" ނޫހަށް ވިދާޅުވި އެވެ.
ނަމަވެސް, މި 200 މިލިއަން ރުފިޔާ ހަރަދު ކުރުމަށް ނިންމާފައިވާ ތަފުސީލުތަކެއް އަދި ހާމަކޮށްފައި ނުވެ އެވެ. އެ މައުލޫމާތު މިހާތަނަށް ލިބިފައި ނުވެ އެވެ.
އޭގެ އިތުރުން, މުއިއްޒުގެ މެނިފެސްޓޯގައި ހިމެނޭ ކަންކަމަށް ބޭނުންވާ ފައިސާ ހަމަޖައްސަން ބޭނުންވާ ބަދަލުތައް ހުށަހެޅުމުގެ މަސައްކަތް ވެސް އިންތިހާބީ ރައީސްގެ އޮފީހުން ދަނީ ކުރަމުންނެވެ.
ސަޕްލިމެންޓަރީ ބަޖެޓު ހުށަހަޅަނީ ކީއްވެ؟
މިއަހަރަށް ފާސްކުރި ބަޖެޓަށް ވުރެ އިތުރަށް ހަ ބިލިއަން ރުފިޔާ ހަރަދުކުރަން މަޖުުބޫރުވީ މިއަހަރަށް ކަނޑައަޅާފައިވާ ފިއުލް ސަބްސިޑީއަށް ވުރެ އިތުރަށް ހަރަދުކުރަން ޖެހުމާއި, އާސަންދައިގެ ބަޖެޓު ހުސްވުމުގެ އިތުރުން ސްޓޫޑެންޓް ލޯނާއި ހިލޭ ޑިގްރީގެ ސްކީމަށް ހަރަދުތައް އިތުރުވުމުގެ ސަބަބުން ކަމަށް ވެސް "އަދަދު" ނޫހަށް ވަނީ މައުލޫމާތު ލިބިފަ އެވެ.
ފިނޭންސް މިނިސްޓްރީން އެންމެ ފަހުން އާންމުކުރި "ވީކްލީ ފިސްކަލް ޑިވެލޮޕްމަންޓް" ރިޕޯޓުން އެނގޭ ގޮތުގައި އާސަންދައަށް ބަޖެޓު ކުރި ވަރަށް 487.6 މިލިއަން ރުފިޔާ ހަރަދު ކޮށްފައި ވާއިރު ސަބްސިޑީއަށް އިތުރަށް 732.4 މިލިއަން ހަރަދު ކޮށްފި އެވެ.
އޭގެ އިތުރުން, އިންވެސްޓްމަންޓު ހޭދަ (އިންވެސްޓްމަންޓް އައުޓްލޭސް) ގެ ގޮތުގައި ބަޖެޓު ކުރި ވަރަށްވުރެ 379 މިލިއަން ރުފިޔާ ވަނީ ހަރަދުކޮށްފަ އެވެ. އޭގެ އިތުރުން, ސަރުކާރު ކުންފުނިތަކަށް ދޫކުރާ ލޯނު ނުވަތަ ޑޮމެސްޓިކް ލެންޑިންގެ ގޮތުގައި ބަޖެޓު ކުރި ވަރަށް ވުރެ 478 މިލިއަން ރުފިޔާ ވަނީ އިތުރަށް ހޭދަކޮށްފަ އެވެ.
ސެޕްޓެމްބަރު 28, ގައި އާންމުކުރި މި ރިޕޯޓުގައިވާ ގޮތުން އެހާތަނަށް ބަޖެޓުން 35.8 ބިލިއަން ރުފިޔާ ވަނީ ހަރަދުކޮށްފަ އެވެ. އެއީ މިއަހަރަށް ފާސްކުރި ބަޖެޓުގެ 83.6 ޕަސެންޓެވެ. އޭގެ ފަހުން ބަޖެޓު ހަރަދުތައް އެނގޭނެ ރިޕޯޓެއް ފިނޭންސުން ހާމަކޮށްފައި ނުވެ އެވެ.
