ރައްޔިތުންގެ މަޖިލީހުގެ ހަނިމާދޫ ދާއިރާގެ އެމްޑީޕީ މެމްބަރު އަބްދުލްޣަފޫރު މޫސާ (ގަޕޯ) އެ ޕާޓީ ދޫކޮށް ޕީޕީއެމް އަށް ބަދަލުވި ކަމަށް ދެކެވޭ ވާހަކަތައް އެމްޑީޕީން ދޮގުކޮށްފި އެވެ.
ނޮޅިވަރަމް ދާއިރާގެ މެމްބަރު މުހައްމަދު ނަޝީދު އަބްދުﷲ (މޮސްޓާ) އާ އެކު ހުންނަވައި ޣަފޫރު ޕާޓީ ފޯމެއްގައި ސޮއިކުރާ ފޮޓޯ މިރޭ ސޯޝަލް މީޑިއާގައި ފެތުރުނެވެ. އެއާ އެކު ދެކެވުނީ އޭނާ ޕީޕީއެމް އަށް ސޮއިކުރި ވާހަކަ އެވެ.
އެމްޑީޕީން މިރޭ އެ ވާހަކަތައް ދޮގުކުރި ފަހުން ޣަފޫރު "އަދަދު" އަށް ވިދާޅުވީ "އަޅުގަނޑު މި ހުރީ އެމްޑީޕީގައި ގަދަކޮށް" ކަމަށެވެ.
"އެހެން ޕާޓީއަކަށް ސޮއިކުރި ވާހަކައަކީ ދޮގެއް. އެއީ ބަޔަކު ފިތުނަ އުފެއްދުމަށް ފަތުރާ ވާހަކައެއް،" އޭނާ ވިދާޅުވި އެވެ.
ކުރިން ސިފައިންގޭގައި، އޭރުގެ ރައީސުލްޖުމްހޫރިއްޔާ މައުމޫން އަބްދުލްގައްޔޫމްގެ ސެކިއުރިޓީ ބެލެހެއްޓުމުގައި މަސައްކަތްކުރެއްވި ޣަފޫރު އެންމެ ފުރަތަމަ އުޅުއްވީ ޑީއާރްޕީގަ އެވެ. ނަމަވެސް ފަހުން އެމްޑީޕީ އަށް ބަދަލުވެވަވަޑައިގަތީ އެވެ.
އޭނާ ޕީޕީއެމްއާ ގުޅުނު ވާހަކަ ފެތުރުނީ އެމްޑީޕީ ބަލިކޮށް ޕީޕީއެމް/ޕީއެންސީ ކޯލިޝަނުން ރިޔާސީ އިންތިހާބު ކާމިޔާބުކުރުމާ އެކު، އެ ޕާޓީއާ ގިނަ އަދަދެއްގެ މެމްބަރުން ގުޅެން އުޅޭ ކަމަށް ވާހަކަ ދެކެވިފައިވަނިކޮށެވެ.
ޣަފޫރަކީ އެމްޑީޕީ ދެފަޅިވެ، ރައީސް މުހައްމަދު ނަޝީދާއި ބައެއް މެމްބަރުން އެ ޕާޓީ ދޫކޮށްދިޔަ ވަގުތު އެމްޑީޕީގެ ދިފާއުގައި މަޖިލީހުގައި ވަރަށް ބޮޑަށް ވާހަކަދެއްކެވި މެމްބަރެކެވެ.
އެ މެމްބަރުން ދަ ޑިމޮކްރަޓްސްގެ ނަމުގައި ޕާޓީއެއް ހަދައި މަޖިލީހުގެ މައިނޯރިޓީ ޕާޓީގެ މަގާމު ވަނީ ހޯދައިފަ އެވެ. ނަމަވެސް މަޖިލީހުގައި އަދިވެސް އޮތީ އެމްޑީޕީގެ މެޖޯރިޓީ އެވެ.
