ހަނގުރާމަވެރި ޖަމާއަތްތަކުގެ ގޮތުގައި ރައީސުލްޖުމްހޫރިއްޔާ ކަނޑައަޅުއްވާ ޖަމާއަތްތަކާއި ސަރަހައްދުތަކުގެ ލިސްޓު ފަސް ވަނަ ފަހަރަށް މުރާޖައުކޮށްފި އެވެ.
ގައުމީ ސަލާމަތީ މަޖިލީހުގެ މަޝްވަރާގެ މަތިން ރައީސް ކަނޑައަޅަންޖެހޭ ލިސްޓުގައި މިފަހަރު ވެސް ހަނގުރާމަވެރި ސަރަހައްދުތަކުގެ ގޮތުގައި ކަނޑައަޅާފައި އޮތީ ސީރިޔާ އެކަންޏެވެ. ޓެރަރިސްޓު ޖަމާއަތްތަކުގެ ގޮތުގައި ކުރިން އޮތް 19 ޖަމާއަތުގެ ތެރެއަށް އިތުރު އެއް ޖަމާއަތް ވަނީ ހިމަނާފަ އެވެ.
މިފަހަރުގެ ލިސްޓަށް އިތުރުކޮށްފައި ވަނީ ޖަމާ އަންޝާރުއް ދައުލާ (ޖޭއޭޑީ) ނަމަކަށް ކިޔާ އިންޑޮނޭޝިއާގެ ޓެރަރިސްޓް ޖަމާއަތެކެވެ. އެއީ 2020 ގައި އދ. ގެ ސެކިއުރިޓީ ކައުންސިލުން ވެސް ޓެެރަރިސްޓް ޖަމާއަތެއްގެ ގޮތުގައި ކަނޑައަޅާފައި ޖަމާއަތެކެވެ.
ރައީސުލްޖުމްހޫރިއްޔާ ކަނޑައަޅާ ޓެރަރިސްޓު ޖަމާއަތްތައް ޓެރަރިޒަމް މަނާ ކުރުމުގެ ގާނޫނުގެ ދަށުން ކޮންމެ 12 މަހަކުން މުރާޖައު ކުރަންޖެހެ އެވެ. ލިސްޓު މުރާޖައު ކުރައްވަން ޖެހެނީ ގައުމީ ސަލާމަތީ މަޖިލީހުގެ މަޝްވަރާގެ މަތިން ރައީސުލްޖުމްހޫރިއްޔާ އެވެ.
ހަނގުރާމަވެރި ސަރަހައްދުގެ ގޮތުގައި ކަނޑައަޅާފައިވާ ސީރިޔާއަކީ ޓެރަރިސްޓު ޖަމާއަތްތަކާ ގުޅޭ ދިވެހިން މިހާރު އެންމެ ގިނައިން ހަނގުރާމައަށްދާ ގައުމު ކަމަށް މީގެ ކުރިން ފުލުހުން ވަނީ ބުނެފަ އެވެ. އަދި ދިވެހިން ގުޅޭ އައިސިސް އަދި ނުސްރާ ފަދަ ޖަމާއަތްތައް ވެސް ލިސްޓުގައި ވަނީ ހިމަނާފަ އެވެ.
ރައީސް ކަނޑައެޅުއްވި ހަނގުރާމަވެރި ޖަމާއަތްތަކުގެ ލިސްޓު
- އިސްލާމިކް ސްޓޭޓް (އައިސިލް/އައިއެސްއައިއެސް/އައިސިސް)
- އަލް ގައިދާ
- ޖަބްހަތުއް ނުސްރާ (ޖަބްހަތުއް ފަތަހް އަލް ޝާމް ނުވަތަ ނުސްރާ ފްރޮންޓް)
- ލަޝްކަރޭ ތައިބާ
- އަލް ގައިދާ އިން ދި އެރަބިއަން ޕެނިންސިއުލާ
- އަލް ގައިދާ އިން ދި އިސްލާމިކް މަގްރިބް
- އަބޫ ސައްޔާފް ގްރޫޕް
- ބޮކޮ ހަރަމް/ ބޯކޯ ހަރަމް
- އަލް ޝަބާބް
- އަލް ގައިދާ އިން ދި އިންޑިއަން ސަބްކޮންޓިނެންޓް
- ތެހްރިކޭ ޠާލިބާން ޕާކިސްތާން (ޓީ.ޓީ.ޕީ)
- ހަރަކާތުލް ޖިހާދު އަލް އިސްލާމީ
- ޖައިޝޭ މުހައްމަދު
- އިސްލާމިކް ސްޓޭޓް އިން އިރާގް އެންޑް ލާވަންޓް – ހުރާސަން ޕްރޮވިންސް (ވިލާޔާ ހުރާސަން)
- ނޭޝަނަލް ތައުހީދް ޖަމާއަތް
- ޖަމާއަތު މިއްލަތޭ އިބްރާހީމް
- ވިލާޔަތް އަލް ސޭލާނީ
- ހައިއަތު ތަހްރީރު އަލް ޝާމް
- ހުއްރާސް އައް ދީން
- ޖަމާ އަންޝާރުއް ދައުލާ (ޖޭއޭޑީ)
