އަންނަ އަަހަރު ބާއްވާ ރައްޔިތުންގެ މަޖިލީހުގެ އިންތިހާބުގައި އެމްޑީޕީން ހުރިހާ ގޮނޑިއަކަށް ވާދަކުރަން ނިންމައިފި އެވެ.
އެމްޑީޕީގެ ޑެޕިއުޓީ ޗެއާޕާސަން އިބްރާހިމް ވަހީދު މިއަދު 'އަދަދު' އަށް ވިދާޅުވީ މިފަހަރުގެ މަޖިލިސް އިންތިހާބުގައި އެ ޕާޓީން ހުރިހާ ގޮނޑިއަކަށް ވާދަކުރާނެ ކަމަށެވެ. އެއީ މި އަހަރު މަޖިލީހަށް އިތުރުކުރާ ގޮނޑިތައް ވެސް ހިމެނޭހެން ކަމަށް އޭނާ ވިދާޅުވި އެވެ.
އެންމެ ފަހުން ބޭއްވި ރައްޔިތުންގެ މަޖިލީހުގެ އިންތިހާބުގައި އެމްޑީޕީން ފުރަތަމަ ނިންމީ ސަރުކާރު ހިންގާ ކޯލިޝަނުގެ ޕާޓީތަކަށް ބަހާލައިގެން ގޮނޑިތަކަށް ވާދަކުރުމަށެވެ. ނަމަވެސް ފަހުން އެ ނިންމުން ބަދަލުކޮށް, ނިލަންދޫ ދާއިރާއާއި މަހިބަދޫ ދާއިރާ ފިޔަވައި ހުރިހާ ގޮނޑިއަކަށް އެމްޑީޕީން ވާދަކުރި އެވެ.
2019 ވަނަ އަހަރު ބޭއްވި ރައްޔިތުންގެ މަޖިލީހުގެ އިންތިހާބު އެމްޑީޕީން ކާމިޔާބު ކުރީ މަޖިލީހުގެ ސުޕަމެޖޯރިޓީ އާއެކު އެވެ. ޖުމްލަ 87 ގޮނޑި ހިމެނޭ އެ މަޖިލީހުން އެމްޑީޕީން 65 ގޮނޑި ކާމިޔާބު ކުރި އެވެ.
އެހެންނަމަވެސް އެމްޑީޕީއަށް ނިސްބަތްވާ ބައެއް މެންބަރުން އެ ޕާޓީން ވަކިވެ, އާ ޕާޓީއެއް އުފެއްދުމާއި, އެހެން ބައެއް މެންބަރުން ޕާޓީ ބަދަލު ކުރުމާއެކު މިވަގުތު މަޖިލީހުގައި ތިއްބެވީ އެމްޑީޕީއަށް ނިސްބަތްވާ 55 މެންބަރުންނެވެ.
2024, އޭޕްރީލް މަހު ބާއްވާ ރައްޔިތުންގެ މަޖިލީހުގެ އިންތިހާބުގައި އެމްޑީޕީން ހުރިހާ ގޮނޑިއަކަށް ވާދަކުރަން ނިންމާފައި މިވަނީ މިދިޔަ ސެޕްޓެމްބަރު މަހު ބޭއްވި ރިޔާސީ އިންތިހާބުން ނާކާމިޔާބު ވެފައި ވަނިކޮށެވެ. އެހެންކަމުން އެމްޑީޕީން މަޖިލީސް އިންތިހާބުގައި ވާދަކުރާނީ އިދިކޮޅު ޕާޓީއެއްގެ ގޮތުގަ އެވެ.
ކުރިއަށް އޮތް ރައްޔިތުންގެ މަޖިލީހުގެ އިންތިހާބުގައި 87 ދާއިރާގެ ބަދަލުގައި 93 ދާއިރާ އޮންނާނެ އެވެ. އަލަށް އިތުރުވި ދާއިރާތަކުގެ ތެރޭގައި ހިމެނެނީ ހުޅުމާލެ މެދު އަދި ހުޅުމާލެ އުތުރު ދާއިރާގެ އިތުރުން ހިތާދޫ ދާއިރާ, ހުރާ ދާއިރާ, ކޮލަމާފުށި ދާއިރާ އަދި ފޭދޫ އުތުރު ދާއިރާ އެވެ.
