ރައްޔިތުންގެ މަޖިލީހުގައި މިއަދު ހެނދުނު 9:00 ގައި ބާއްވަން ތާވަލުކުރި ޖަލްސާ ފަށާ ގަޑި ޖެހުނު އިރު ތަޅުމަށް ވަޑައިނުގެން، މަޖިލީހުގެ ގޯތިތެރޭގައި ތިއްބެވި މެމްބަރުން ވެދެވަޑައިގަންނަވަން ރިޔާސަތުން ނޭދުމަކީ "ގަސްދުގައި ކޯރަމް ހަމަ ނުކުރުން" ކަމަށް އެމްޑީޕީގެ ޕާލަމެންޓްރީ ގްރޫޕްގެ ލީޑަރު މުހައްމަދު އަސްލަމް ސިފަކުރައްވައިފި އެވެ.
މަޖިލީހުގެ އިދާރާގައި މިއަދު ބޭއްވެވި މީޑިއާ ބްރީފިން ގައި އަސްލަމް ވިދާޅުވީ މަޖިލީހުގެ ޖަލްސާތައް ފަށަން އޮންނަ ގަޑިއަށް މެމްބަރުން މެމްބަރުން ވަޑައިނުގެންނެވުމުން މީގެ ކުރިން އަމަލުކުރައްވާ ގޮތާއި މިއަދު އަމަލުކުރި ގޮތް ތަފާތު ކަމަށެވެ. އޭނާ ވާހަކަ ދެއްކެވީ ޖަލްސާއަކަށް ކޯރަމް ހަމަނުވުމުން، މެމްބަރުން ވަޑައިގަންނަވާތޯ މަޖިލީހުގެ ރައީސް މުހައްމަދު ނަޝީދު މީގެ ކުރިން އިންތިޒާރުކުރައްވައި ވަގުތު ދެއްވާ ދެއްވުން އެއީ ވެސް ކުރައްވަން ޖެހިވަޑައިގަންނަވާ ކަމެއް ކަމަށް ދޭހަވާ މޭރުމަކުންނެވެ.
"އެނގިވަޑައިގަންނަވާނެ ޖަލްސާ ފެށޭ ގަޑީގައި ވަރަށް ގިނަ ދުވަސް ދުވަހު، ކޯރަމް ހަމަނުވީމާ ކޯރަމް ހަމަވަންދެން، މަޖިލީހުގެ ރިޔާސަތުން ކޮންމެވެސް ވަރަކަށް ޖާގަ ދެއްވާ. އަދި ޖަލްސާ މެދުކަނޑުއްވައިލެއްވުމަށް ފަހު ވަގުތު ކޮޅެއް ދެއްވުމަށް ފަހު ހަމަ އެ ދުވަހުގެ ކޮންމެވެސް ގަޑިއެއްގައި ޖަލްސާ ކުރިއަށް ގެންދަވާ،" އަސްލަމް ވިދާޅުވި އެވެ.
އޭނާ އެ ވިދާޅުވީ ފަހަކަށް އައިސް މަޖިލީހުގެ ކޯރަމް ހަމަނުވާ ދުވަސް ދުވަހު ރިޔާސަތުން ނަޝީދު އަމަލުކުރައްވާ ގޮތެވެ. އެހެން ނަމަވެސް އެއީ މަޖިލީހުގެ ގަވައިދުގައި އޮތް ކަމެއް ނޫނެވެ.
މިއަދުގެ ޖަލްސާގެ ރިޔާސަތު ބަލަަަހައްޓަވަން ވަޑައިގެންނެވީ ނައިބުރައީސް އީވާ އަބްދުﷲ އެެވެ. ކޯރަމް ހަަމަނުވާތީ ޖަލްސާ ބޭއްވެން ނެތްކަން އިއުލާނު ކުރެއްވީ އޭނާ އެވެ.
އަސްލަމް ވިދާޅުވީ މިއަދުގެ ޖަލްސާ އެގޮތަށް ނިންމަވައިލެއްވުމަކީ އެމްޑީޕީގެ ޕާލަމެންޓްރީ ގްރޫޕުން ކަންބޮޑުވާ ކަމެއް ކަމަށެވެ.
މަޖިލީހުގެ ހާޒިރީ ރަނގަޅުކުރުމަށް ޓަކައި މެޖޯރިޓީ ލީޑަރުގެ ހައިސިއްޔަތުން ކުރައްވާނީ ކޮން މަސައްކަތެއްތޯ "އަދަދު" އިން ސުވާލުކުރުުމުން އަސްލަމް ވިދާލުވީ ޖަލްސާއަށް ކޯރަމް ހަމަވާ ވަރަށް މިއަދު ވެސް މެމްބަރުން ވަޑައިގެންނެވި ކަމަށެވެ.
"އެހެން ނަމަވެސް އެވަގުތު ފްލޯގައި ވަޑައިގެން ނެތީ. އާންމު އުސޫލެއްގެ ގޮތުން ފްލޯގައި ބޭފުޅުން މަދުވާ ކަމުގައި ވަނީ ނަމަ، ކޯރަމް ހަމަނުވާ ކަމުގައި ވަނީ ނަމަ، މަޖިލީހުގެ އިދާރީ މޭޒުން ވެސް، މަޖިލީހުގެ ރިޔާސަތުން ބޭފުޅުން ފޮނުއްވައި، މެމްބަރުންނާ ވާހަކަދައްކަވައި މެމްބަރުން ހަމަކުރައްވާ،" އަސްލަމް ވިދާޅުވި އެވެ.
އޭނާ ވިދާޅުވީ މިއަދު އެފަދަ އެއްވެސް ކަމެއް ނުކުރައްވައި ޖަލްސާ މެދުކަނޑުއްވައިލެއްވީ ކަމަށެވެ. އަދި ބައެއް ޕާޓީތަކުގެ މެމްބަރުން ފްލޯއަށް ވަޑައިގެން ދޮރުހުޅުއްވައި ބައްލަވައިލެއްވުމަށް ފަހު ވަޑައިގެންނެވި ކަމަށާއި އެހެންވީމާ މިއަދު ކޯރަމް ހަމަނުވުމަކީ ރާވައިގެން ކުރި ކަމެއް ކަމަށް ވެސް އޭނާ ސިފަކުރެއްވި އެވެ.
