މިހާރު ރާއްޖެއަށް ކުރަމުންދާ ވިއްސާރައިގައި އިއްޔެ އާއި މިއަދު ހަތަރު ރަށެއްގައި ފެންބޮޑުވެގެން ނޭޝަނަލް ޑިޒާސްޓާ މެނޭޖްމަންޓު އޮތޯރިޓީ (އެންޑީއެމްއޭ) އަށް ރިޕޯޓުކޮށްފައިވާ ކަމަށް އެ އިދާރާއިން ބުނެފި އެވެ.
އެންޑީއެމްއޭއިން ބުނި ގޮތުގައި ހަތަރު ރަށުންވެސް ރިޕޯޓުކޮށްފައިވަނީ ބޯކޮށް ވާރޭ ވެހެމުގެ ސަބަބުން ކަމަށެވެ.
އަދި، ކުރިއަށް އޮތް ދެ ދުވަހުވެސް ރާއްޖޭގެ އެކި ސަރަހައްދުތަކަށް މޫސުން ގޯސްވާނެ ކަމަށް ލަފާކުރެވޭތީ އެކަމަށް ސަމާލުވުމަށްވެސް އެ އިދާރާއިން އިރުޝާދު ދީފައިވެ އެވެ. ހާއްސަކޮށް މެންދަމު ވާރޭވެހި ގެއަށް ފެންވަނުމުގެ ސަބަބުން ފަރުނީޗަރާއި ކަރަންޓު ސާމާނަށް ލިބިދާނެ ގެއްލުންތަކަށް ސަމާލުވުމަށް އެދިފައިވެ އެވެ.
އިއްޔެ އެންޑީއެމްއޭ އަށް ރިޕޯޓުކޮށްފައިވަނީ ޅ. ނައިފަރާއި ށ. ގޮއިދޫއިންނެވެ. ނައިފަރަށް ބޯކޮށް ވާރޭ ވެހުމުގެ ސަބަބުން މުޅި ރަށުގައިހެން ފެންބޮޑުވިއިރު ގޮއިދޫގެ ބޮޑު ބަޔެއްގައިވެސް ފެންބޮޑުވި އެވެ. މިއަދު ފެންބޮޑުވެގެން ރިޕޯޓުކޮށްފައިވަނީ އއ. ފެރިދޫއާއި ބ. މާޅޮހުންނެވެ.
އެ ހަތަރު ރަށުގެ އެއްވެސް ގެޔަކުން މީހުން ނެރެންޖެހޭ ފަދަ ހާލަތަކަށް ނުދާ ކަމަށާއި އެ ރަށްރަށުގެ ކައުންސިލާއި އެމްއެންޑީއެފުގެ އެހީތެރިކަމާއެކު ފެން ހިންދުމުގެ މަސައްކަތް ދަނީ ކުރަމުންނެވެ.
އެންޑީއެމްއޭއިން އިތުރަށް ބުނީ ވިއްސާރައިގެ އެލާޓު ނެރޭ ރަށްތަކުގެ ހާލަތު 24 ގަޑިއިރު މޮނީޓާ ކުރަމުންދާ ކަމަށާއި ފެންބޮޑުވާ ހާލަތްތަކުގައި ލަސްނުކޮށް އެ އިދާރާއަށް ރިޕޯޓުކުރުމަށް އެދޭ ކަމަށެވެ.
