ރައްޔިތުންގެ މަޖިލީހުގެ ދާއިމީ ކޮމިޓީތަކުގައި ސިޔާސީ ޕާޓީތަކުގެ މެމްބަރުން ތަމްސީލުކުރާނެ ނިސްބަތް ކަނޑައަޅައި، ކޮމިޓީތަކަށް އައްޔަންކުރި މެމްބަރުންގެ ނަންތަކާއެކު މަޖިލީހުން މިއަދު ފާސްކޮށްފި އެވެ.
މަޖިލީހުން މިއަދު ފާސްކުރި ކަރުދާހުގައިވާ ގޮތުން ކޮމިޓީތަކުގެ މެޖޯރިޓީ ދިނީ މަޖިލީހުގެ ވެސް މެޖޯރިޓީ އޮންނަ އެމްޑީޕީއަށެެވެ.
ކޮމިޓީތަކުގައި ޕާަޓީތައް ތަމްސީލުކުރާ ނިސްބަތް
- އެމްޑީޕީ: 64 ޕަސެންޓް
- ދަ ޑިމޮކްރެޓްސް: 15 ޕަސެންޓް
- ޕީޕީއެމް: ހަ ޕަސެންޓް
- ޕީއެންސީ: ތިން ޕަސެންޓް
- އެމްއެންޕީ: ތިން ޕަަސެންޓް
- އެމްޑީއޭ: ދެ ޕަސެންޓް
- ޖޭޕީ: ދެ ޕަަސެންޓް
- ވަކި ޕާޓީއަކަށް ނިސްބަތްނުވާ: ތިން ޕަސެންޓް
މަޖިލީހުގެ ދާއިމީ ކޮމިޓީތަކަށް މި ނިސްބަތުން މެމްބަރުން ބެހި އިރު ބައެއް ކޮމިޓީތަކުގައި ހުރިހާ ޕާޓީތަކެއްގެ މެމްބަރުންނެއް ނުތިއްބަވާނެ އެވެ. އެފަދަ އެއް ކޮމިޓީ އަކީ ސްޓޭޓް އޯންޑް އެންޓަޕްރައިޒް ކޮމިޓީ އެވެ. އެ ކޮމިޓީގައި އެމްޑީއޭއާއި ޖޭޕީގެ މެމްބަރުން ނުތިއްބަވާ އިރު ވަކިޕާޓީއަކަށް ނިސްބަތްނުވާ މެމްބަރަކު ވެސް ނުހިމެނެ އެވެ.
ލާމަރުކަޒީ ކޮމިޓީގައި ވެސް ޖޭޕީ އާއި އެމްޑީއޭގެ މެމްބަރުން ތަމްސީލު ނުކުރައްވާ އިރު އެ ކޮމިޓީގައި ވަކި ޕާޓީއަކަށް ނިސްބަތްނުވާ މެމްބަރަކު އެހެން ނަމަވެސް އިންނަވާނެ އެވެ. ހާރިޖީ ގުޅުންތަކުގެ ކޮމިޓީ އާއި ލާމަރުކަޒީ ކޮމިޓީ ގެ އެކުލެވުން ވެސް އޮތީ އެގޮތަށެވެ.
މިނިވަން މުއައްްސަަސާތަކުގެ ކޮމިޓީގައި އެމްޑީއޭއާއި ޖޭޕީގެ އިތުރުން ޕީޕީއެމްގެ މެމްބަރަކު ވެސް މިއަދު ފާސްކުރި ކަރުދާހުގައިވާ ގޮތުން ނުތިއްބަވާނެ އެވެ. އިޖުތިމާއީ ކޮމިޓީ ވެސް އޮތީ އެގޮތަށެވެ.
މިއަދު ފާސްކުރި ކަރުދާހުގައިވާ ގޮތުން ގައުމީ ތަރައްގީއާއި ތަރިކައިގެ ކޮމިޓީގައި ތިއްބަވާނީ ހަމަ އެކަނި އެމްޑީޕީއާއި ދަ ޑިމޮކްރެޓްސްގެ މެމްބަރުންނެވެ.
