ޓްރީޓޮޕް ހޮސްޕިޓަލުން ބ.އޭދަފުށީގައި ކޮންޓެކްޓް ސެންޓަރެއް ހުޅުވައިފި އެވެ.
ޓްރީ ޓޮޕް ހޮސްޕިޓަލުގެ (ޓީޓީއެޗް) ކޮންޓެކްޓް ސެންޓަރުގެ ހިދުމަތް ފުޅާކުރުމުގެ ގޮތުން އޭދަފުށީގައި ގާއިމުކުރި މި ކޮންޓެކްޓް ސެންޓަރު ހުޅުވީ އިއްޔެ އެވެ.
ޓްރީޓޮޕް ހޮސްޕިޓަލުން މައުލޫމާތު ދޭގޮތުގައި މުޅިން އަލަށް ހުޅުވި މި ކޮންޓެކްޓް ސެންޓަރުގެ މަގުސަދަކީ އެ ހޮސްޕިޓަލާއި ޓީޓީއެޗް މާލޭ ކްލިނިކްގެ ހިދުމަތްތަކަށް އަވަސް އަދި ފަސޭހަ ގޮތެއްގައި އެޕޮއިންޓްމަންޓާއި ބުކިން ހެއްދުމަށް މަގުފަހި ކޮށްދިނުމެވެ.
އަދި މި ކޮންޓެކްޓް ސެންޓަރު ޓީމު ފުޅާކުރުމަކީ ހޮސްޕިޓަލްގެ ކެޕޭސިޓީ އިތުރުކުރުމާއި، ހިދުމަތް ލިބޭނެ މަގު ފަސޭހަކޮށްދިނުމާއި، ހިދުމަތް ހޯދާ ފަރާތްތަކުގެ ތަޖުރިބާ އިތުރަށް ރަނގަޅުކުރުމަށް އެކުލަވާލާފައިވާ ސްޓްރެޓްޖިކް ޕްލޭންގެ ބައެއް ކަމަށް އެ ހޮސްޕިޓަލުން ބުންޏެވެ.
މީގެ އިތުރުން އެ ހޮސްޕިޓަލުގެ ހިދުމަތްތަކަށް އޮންނަ ޑިމާންޑް އަހަރުން އަހަރަށް އިތުރުވަމުންދާ ކަމަށާއި އެހެންކަމުން އޯޕީޑީ އާއި އައިޕީޑީގެ ހިދުމަތްތައް ލިބިގަންނަ މީހުންގެ އަދަދު އިތުރުވެފައިވާއިރު، ހޮސްޕިޓަލަށް ގުޅުއްވައިގެން ފޯނުގައި މަޑުކުރައްވަންޖެހޭ ވަގުތު މަދުކުރުމަކީ މި ކޮންޓެކްޓް ސެންޓަރުގެ އެންމެ ބޮޑު އެއް މަގުސަދު ކަމަށް ބުންޏެވެ.
ޓްރީޓޮޕް ހޮސްޕިޓަލަކީ ދިވެހި މުވައްޒަފުންނާއި ރާއްޖެއިން ބޭރުގެ މުވައްޒަފުންނަށް ޕްރޮފެޝަނަލް ޑިވެލޮޕްމަންޓް އަދި ވަޒީފާގެ ފަހި ފުރުސަތުތައް ފުޅާކުރުމަށް މަގުފަހިކޮށްދޭ ކުންފުންޏެކެވެ.
އަދި އަލަށް ހުޅުވި މި ކޮންޓެކްޓް ސެންޓަރުގެ ޓީމްގެ ހުރިހާ އާ މުވައްޒަފުންނަށް ޓްރީ ޓޮޕް ހޮސްޕިޓަލުން ހާއްސަ ތަމްރީންތަކެއް ވަނީ ހިންގާފައި ވެ އެވެ. މިއީ އެ ސެންޓަރުން ފޯރުކޮށްދޭޭ ހިދުމަތްތަކުގެ ފެންވަރު ރަނގަޅު ގޮތެއްގައި ދިނުމަށް ހިންގި ތަމްރީނުތަކެއް ކަމަށް އެ ހޮސްޕިޓަލުން ބުންޏެވެ.
