ރާއްޖޭގެ އެކި ހިސާބުތަކަށް މިހާރު ކުރުމުން މިދާ ވިއްސާރަ އަލިވެ މޫސުން ރަނގަޅުވާން ފަށާނީ ހުކުރު ދުވަހުގެ ފަހުން ކަމަށް ރާއްޖޭގެ މޫސުމާ ބެހޭ ގައުމީ އިދާރާ އިން ބުނެފި އެވެ.
ހުޅަނގު މޫސުމުގެ ވިއްސާރައާ އެކު ރާއްޖޭގެ އެކި ހިސާބުތަކަށް މިދުވަސްވަރު ވަނީ ބޯވާރެއާއި ގަދަ ވައިގެ އަސަރުކޮށްފަ އެވެ. ހާއްސަކޮށް އުތުރުން ފެށިގެން މެދު ރާއްޖެތެރޭގެ އަތޮޅުތަކުގެ ރަށްތަކަށް މޫސުން ގޯސްވާނެ ކަމަށް ލަފާކޮށް މެޓް އޮފީހުން އަންނަނީ އެލާޓްތައްވެސް ނެރެމުންނެވެ.
މެޓް އޮފީހުގެ އޮފިޝަލަކު މިއަދު "އަދަދު" އަށް ވިދާޅުވީ ރާއްޖެއަށް މިހާރު ކުރަމުން މިދަނީ ހުޅަނގު މޫސުމުގެ ވިއްސާރަ ކަމަަށާއި މި ދުވަސްވަރު ބޯކޮށް ވާރޭވެހުމުގެ އިތުރުން ވައި ގަދަވެ، ކަނޑުަތައް ގަދަވާނެ ކަމަށެވެ. އަދި މި ހަފްތާ އެެއްކޮށް ރާއްޖޭގެ އެކި ހިސާބުތަކަށް މޫސުން ގޯސްވެ ވިއްސާރަ ކުރާނެ ކަމަށް ލަފާކުރެވޭ ކަމަށް ވިދާޅުވި އެވެ.
މި ވިއްސާރައިގެ ސަބަބުން ބައެއް ރަށްރަށުގައި ފެން ބޮޑުވެ ގޭގެއަށް ފެން ވަދެ އެކި ވަރުގެ ގެެއްލުންތައް ވަނީ ވެފަ އެވެ.
އޮފިޝަލު ވިދާޅުވި ގޮތުގައި ރާއްޖޭގެ އުތުރުގެ ރަށްތަކަށް ވިއްސާރަ އަލިވެ މޫސުން ރަނގަޅުވާން ފަށާނީ ހުކުރު ދުވަހުގެ ފަހުންނެވެ. އަދި މެދެ ރާއްޖެތެރެއާއި ދެކުނުގެ އަތޮޅުތަކަށް މޫސުން ރަނގަޅުވާނީ އަންނަ އާދީއްތަ ދުވަހުގެ ފަހުން ކަމަށާއި ވިދާޅުވި އެވެ.
މޫސުން ގޯސްވާނެ ކަމަށް ލަފާކޮށް، ހދ. އަތޮޅުން ފެށިގެން ވ. އަތޮޅަށް މިއަދުވެސް ވަނީ ވައިޓް އެލާޓް ނެރެފަ އެވެ. މެޓް އޮފީހުން ލަފާކުރާ ގޮތުގައި މިއަދު ހަވީރު 5:00 އާ ހަމަޔަށް މި ސަރަހައްދަށް ގުގުރުމާއެކު ވާރޭ ވެހޭނެ އެވެ. އަދި ވިލާގަނޑުގައި ގަޑިއަކު 40 މޭލަށް ވައިޖެހޭނެ ކަމަށް ވަނީ ލަފާކޮށްފަ އެވެ.
