ގއ. ކޮލަމާފުއްޓާއި ދ. ކުޑަހުވަދޫގައި ހުންނަ އެމްޑީޕީ ދެ އޮފީހަކަށް ދިން ގެއްލުންތައް އެ ޕާޓީގެ އިދާރާއިން ކުށްވެރިކޮށް ބަޔާނެއް ނެރެފި އެވެ.
އެ ދެ ހާދިސާގެ އިތުރުން، ރިޔާސީ އިންތިހާބުގެ ދެވަނަ ބުރުގެ ވޯޓު ލުން ކުރިއަށް ދަނިކޮށް ރައްޔިތުންގެ މަޖިލީހުގެ މަރަދޫ ދާއިރާގެ މެމްބަރު އިބްރާހިމް ޝަރީފާއި ފޭދޫ ދާއިރާގެ މެމްބަރު މުހައްމަދު ނިހާދާއި އެ ދާއިރާގެ އެމްޑީޕީ މެމްބަރުންތަކަކަށް ދިން ހަމަލާ ވެސް އެ ބަޔާނުގައި ކުށްވެރިކޮށްފައިވެ އެވެ.
ބައެއް ރަށްރަށުގައި ހުރި އެމްޑީޕީގެ ރިޔާސީ ކެންޑިޑޭޓު ރައީސް އިބްރާހިމް މުހައްމަދު ސޯލިހުގެ ކެމްޕެއިން ބިލްބޯޑުތައް ވެސް ހަލާކުކޮށްފައިވާ ކަމުގެ މައުލޫމާތު ލިބިފައިވާ ކަމަށާއި އެ އަމަލުތައް ވެސް ކުށްވެރިކުރާ ކަމަށް ބަޔާނުގައިވެ އެވެ.
މި މައްސަލަތައް ފުލުހުން އަވަހަށް ތަހުގީގުކޮށް، އެ ކަންކަމުގައި ބައިވެރިވި މީހުންނަށް ފިޔަވަޅު އެޅުމަށް އެމްޑީޕީން ގޮވާލާފައިވެ އެވެ.
"އިންތިހާބަށްފަހު އިދިކޮޅު ޕީޕީއެމް ޕީއެންސީއަށް ތާއީދުކުރާ ފަރާތްތަކުން ކާމިޔާބީ ފާހަގަކުރުމުގެ ތެރޭގައި މިފަދަ އަމަލުތައް ހިންގުމަކީ ޑިމޮކްރެޓިކް އުސޫލަތަކާ ބީރަށްޓެހި ވަރަށް ނާތަހުޒީބު ދަށުދަރަޖައިގެ އަމަލުތަކެއް،" އެމްޑީޕީގެ ބަޔާނުގައިވެ އެވެ.
ރިޔާސީ އިންތިހާބު އިދިކޮޅު ޕީއެންސީގެ ރިޔާސީ ކެންޑިޑޭޓު ޑރ. މުހައްމަދު މުއިއްޒު ކާމިޔާބު ކުރެއްވީ ވޯޓުލީ މީހުންގެ 54 ޕަސެންޓު ވޯޓުންނެވެ. ރައީސް ސޯލިހަށް ލިބިވަޑައިގަތީ 46 ޕަސެންޓް ވޯޓެވެ.
ރިޔާސީ އިންތިހާބުގެ ފުރަތަމަ ބުރުގައި ވެސް އެންމެ ގިނަ ވޯޓު ހޯއްދެވީ މުއިއްޒެވެ. ފުރަތަމަ ބުރު މުއިއްޒު ވަނީ 46 ޕަސެންޓް ވޯޓު ހޯއްދަވައިފަ އެވެ. އެ ބުރު ރައީސް ސޯލިހަށް ލިބިވަޑައިގަތީ 39 ޕަސެންޓެވެ.
މިއީ އިންތިހާބުގެ ފުރަތަމަ ބުރު އެންމެ ގިނަ ވޯޓު ހޯއްދެވުމަށް ފަހު، ދެ ވަނަ ބުރު ވެސް ގިނަ ވޯޓު ހޯއްދަވައިގެން ރިޔާސީ ކެންޑިޑޭޓަކު އިންތިހާބު ކާމިޔާބު ކުރި ފުރަތަމަ ފަހަރެވެ.
ރިޔާސީ އިންތިހާބަށް ފަހު އިއްޔެ ވަގުތެއްގައި އިންތިހާބީ ރައީސް މުއިއްޒާއި، ރައީސް ސޯލިހާ ބައްދަލު ކުރެއްވި އެވެ. އެ ބައްދަލުވުމުގައި ވެރިކަން ބަދަލު ކުރުމުގެ މަރުހަލާ ވީހާވެސް އޮމާންކޮށް ގެންދިއުމަށް ޓަކައި މަޝްވަރާ ކުރެއްވި އެވެ.
ވެރިކަން ބަދަލު ކުރުމުގެ އިންތިގާލީ މަރުހަލާ ކުރިއަށް ގެންދިއުމަށް ޓަކައި، އިންތިހާބީ ރައީސްގެ ފަރާތްޕުޅުން އެކުލަވާލާ ޓްރާންސިޝަން ކޮމިޓީތަކުގެ ޑިރެކްޓަރު ޖެނެރަލްގެ މަގާމަށް ޕީއެންސީގެ ރައީސް އަބްދުލްރަހީމް އަބްދުﷲ ހަމަޖައްސަވައިގެން އެ މަސައްކަތް ކުރިއަށް އެބަ ދެ އެވެ.
