ވެރިކަމުގެ ދައުރު ނިމުމުން ރާއްޖެ ދޫކުރައްވައި ވަޑައިނުގަންނަވާނެ ކަމަށާއި ޖަވާބުދާރީ ނުވެވޭ ވަރުގެ ކަމެއް ވެރިކަމުގައި ކުރައްވާފައި ނުވާނެ ކަމަށް ރައީސް އިބްރާހީމް މުހައްމަދު ސޯލިހު މިއަދު ވިދާޅުވެއްޖެ އެވެ.
ރިޔާސީ އިންތިހާބަށް ފަހު ފުރަތަމަ ފަހަރަށް ރައީސް އޮފީހުގައި ބޭއްވި މީޑިއާ ބްރީފިންއެއްގައި ނޫސްވެރިއަކު ކުރި ސުވާލަކަށް ޖަވާބު ދެއްވަމުން ރައީސް ވިދާޅުވީ އެމަނިިކުފާނާ ދޭތެރޭގައި "މައްސަލައެއް ޖެއްސޭ ވަރު"ގެ ކަމެއް ކުރައްވާފައި ނުވާނެ ކަމަށެވެ. އެއްވެސް ކަމަކާ މެދު ޖަވާބުދާރީ ވެވަޑައިގަންނަވަން ޖެހިވަޑައިގަންނަވާ ހާލަތެއްގައި އެކަމަށް ތައްޔާރަށް ހުންނެވި ކަަމަށް ވެސް އެމަނިކުފާނު ވިދާޅުވި އެވެ.
" އަޅުގަނޑު ރާއްޖެ ދޫކޮށް ދާން ޖެހޭ އެއްވެސް ސަބަބެއް ނެތް. އަޅުގަނޑު ދިރިއުޅޭނީ ރާއްޖޭގައި އިރާދަކުރެއްވިއްޔާ. އަޅުގަނޑު ދިރިއުޅޭނީ އަޅުގަނޑުގެ އުފަން ރަށުގައާއި މާލޭގައި،" ރައީސް ވިދާޅުވި އެވެ.
ރައީސް ވިދާޅުވި ގޮތުގައި ރާއްޖޭން ބޭރަށް އެމަނިކުފާނު ވެސް ދަތުރުކުރައްވާނީ އެހެން މީހުން ވެސް ރާއްޖޭން ބޭރަށް ދަތުރުކުރާ ބީދައިން ބައެއް ފަހަރު އެވެ. ރާއްޖެ ދޫކުރައްވައި އެހެން ތަނެއްގައި ދިރިއުޅުއްވަން ވަޑައިގެންނެވުމަކީ އެއްގޮތަކަށް ވެސް ކުރައްވާނެ ކަމެއް ނޫން ކަމަށް ވެސް އެމަނިކުފާނު ވިދާޅުވި އެވެ.
ރިޔާސީ އިންތިހާބުގެ ކެމްޕެއިނުގެ ތެރޭގައި އިދިކޮޅުން ދެއްކި އެއް ވާހަކަ އަކީ އިންތިހާބުން ނާކާމިޔާބު ވެވަޑައިގެންފި ނަމަ ރައީސް ސޯލިހާއި ސަރުކާރުގެ އިސް އެެހެން ބޭފުޅުން ރާއްޖެ ދޫކުރައްވައި ފިއްލަވަން މަސައްކަތް ކުރާނެ ކަމަށްް ބުނެ ދެއްކި ވާހަކަ އެކެވެ. އެގޮތަށް އެކަން ވިޔަނުދީ ދައުރު ބަދަލުވުމާ އެކު އެ ބޭފުޅުންގެ ޕާސްޕޯޓް ހިފަަހައްޓަން ވެސް ބައެއް ފަރާތްތަކުން އޭރު ގޮވައިލި އެވެ.
މިދިޔަ ހޮނިހިރު ދުވަހު ބޭއްވި ރިޔާސީ އިންތިހާބު ކާމިޔާބުކުރެއްވީ ޕީއެންސީގެ ކެންޑިޑޭޓް، މާލޭގެ މޭޔަރު ޑރ.މުހައްމަދު މުއިއްޒެވެ. އެމަނިކުފާނަށް 54 ޕަސެންޓް ވޯޓު ލިބިވަޑައިގެންނެވި އިރު ސޯލިހަށް ލިބިވަޑައިގެންނެވީ 46 ޕަަސެންޓް ވޯޓެވެ.
