މިވަގުތު ކުރައްވަމުން ގެންދަވާ މަސައްކަތަކީ އިދިކޮޅު ޕާޓީއެއްގެ ގޮތުގައި އެމްޑީޕީ ވަރުގަދަކުރުން ކަމަށް ރައީސް އިބްރާހީމް މުހައްމަދު ސޯލިހު މިއަދު ވިދާޅުވެއްޖެ އެވެ.
ރިޔާސީ އިންތިހާބަށް ފަހު ފުރަތަމަ ފަހަރަށް ރައީސް އޮފީހުގައި ބޭއްވި މީޑިއާ ބްރީފިންއެއްގައި ނޫސްވެރިއަކު ކުރި ސުވާލަކަށް ޖަވާބު ދެއްވަމުން ރައީސް ވިދާޅުވީ ރާއްޖޭގެ ޑިމޮކްރަސީ ހަރުދަނާކޮށް ފައްކާ ކުރުމަށްޓަކައި ވަރުގަދަ އިދިކޮޅުޕާޓީއެއް އޮންނަން ޖެހޭ ކަމަށެވެ. ސަރުކާރު ޖަވާބުދާރީ ކުރުވޭ ވަރުގެ ޕާޓީއެއް އޮންނަން ޖެހޭ ކަަމަށް ވެސް އެމަނިކުފާނު ވިދާޅި އެވެ.
"އެމްޑީޕީއަކީ އެކަން ކުރެވޭނެ ޕާޓީއެއް ކަމަަށް އަޅުގަނޑު ދެކެނީ. އެހެންވީމާ [ޕާޓީގައި] އަަޅުގަނޑު ހުންނަ މަގާމެއް ނޫން މިވަގުތު މުހިންމީ. ސަރުކާރު ޖަވާބުދާރީ ކުރުވުމަށް ޓަކައި، ރައްޔިތުންނަށް ހިދުމަތް ކުރުމަށް ޓަކައި، އެމްޑީޕީ ވަރުގަދަކޮށް ބޭއްވުމަށް ޓަކައި ކުރަން ޖެހޭ މަސައްކަތް އަޅުގަނޑު ކުރަމުން މިގެންދަނީ،" ރައީސް ވިދާޅުވި އެވެ.
އެމަނިކުފާނު ވިދާޅުވި ގޮތުގައި އެގޮތުން މިހާރު ކުރައްވަމުން ގެންދަވާ މަސައްކަތަކީ ކުރިއަށް އޮތް ރައްޔިތުންގެ މަޖިލީހުގެ އިންތިހާބަށް ތައްޔާރުވުމެވެ.
އިންތިހާބުގެ ކުރިން ރައީސް ވިދާޅުވެފައި ވަނީ ދެ ވަނަ ދައުރަކަށް އިންތިހާބުވެވަޑައިގެންފި ނަމަ އެ ދައުރު ނިންމަވާފައި ރިޓަޔާ ކުރައްވާނެ ކަމަށެވެ. އެހެންނަމަވެސް ދެވަނަ ދައުރަށް އިންތިހާބު ނުވުމުން، ރައީސް ދެން ސިޔާސީ މަސައްކަތުގައި ފެނިގެންދާނީ އިދިކޮޅު ޕާޓީ މެދުވެރިކޮށް، ސަރުކާރު ޒިންމާދާރު ކުރުވުމުގެ މަސައްކަތުގެ ތެރެއިން ކަމަށް ރައީސް ވިދާޅުވި އެވެ.
