އިއްޔެ ބޭއްވި ރިޔާސީ އިންތިހާބީ ކާމިޔާބު ކުރެއްވި ޑރ. މުހައްމަދު މުއިއްޒަށް އަވަށްޓެރި އިންޑިއާގެ ބޮޑުވަޒީރު ނަރިންދުރަ މޮދީ މަރުހަބާ ވިދާޅުވެއްޖެ އެވެ.
އިންތިހާބީ ރައީސް މުއިއްޒުގެ މަރުހަބާ ދެންނެވުމަށް މޯދީ އެކްސްގައި ކުރެއްވި ޕޯސްޓެއްގައި ވިދާޅުވީ އިންޑިއާ އާއި ރާއްޖޭގެ ޒަމާންވީ ގުޅުން ބަދަހިކޮށް ދެމެހެއްޓުމަށާއި އިންޑިއާ ކަނޑުގެ ސަރަހައްދުގެ އެއްބާރުލުން އިތުރުކުރުމަށް އެ ގައުމުން ދެމިއޮންނާނެ ކަމުގެ ޔަގީންކަން ދެއްވާ ކަމަށެވެ.
މާލޭ ސިޓީގެ މޭޔަރަކަށް ހުންނެވި ޑރ. މުއިއްޒު ރިޔާސީ އިންތިހާބު ކާމިޔާބު ކުރެއްވިއިރު، ސެޕްޓެމްބަރު 9، ގައި ބޭއްވި ރިޔާސީ އިންތިހާބުގެ ފުރަތަމަ ބުރުގައި ވެސް މުއިއްޒު ވަނީ ބޮޑު ތަފާތަކުން ކުރި ހޯއްދަވައިފަ އެވެ. އެ ފަހަރު އެމަނިކުފާނަށް 46 ޕަސެންޓް ވޯޓު ލިބިވަޑައިގަތެވެ.
ދެ ވަނަ ބުރުގައި 243،000 އަށް ވުރެ ގިނަ މީހުން ވޯޓުލާފައިވެ އެވެ. އެއީ ވޯޓުލުމުގެ ހައްގު ލިބިގެންވާ 282,804 މީހުންގެ ތެރެއިން 86 ޕަސެންޓެވެ. މުއިއްޒު އިންތިހާބު ކާމިޔާބު ކުރެއްވީ، ވަގުތީ ނަތީޖާއިން ދައްކާ ގޮތުގައި 54 ޕަސެންޓުންނެވެ. އެއީ 127,000 އަށް ވުރެ ގިނަ ވޯޓެވެ. ރައީސް ސޯލިހުއަށް 108,000 އަށް ވުރެ ގިނަ ވޯޓު ލިބިވަޑައިގަތެވެ. އެއީ ވޯޓުލީ މީހުންގެ 46 ޕަސެންޓެވެ.
"ދިވެހީންގެރާއްޖެ" ޝިޔާރުގައި މުއިއްޒު ކުރެއްވި ރިޔާސީ ކެމްޕޭނުގައި އެންމެ ބޮޑަށް ވިއްކީ އިންޑިއާ ސިފައިން ރާއްޖޭން ބޭރުކޮށް، ދިވެހީންނަށް ރާއްޖެ ހޯދައި ދޭނެ ކަމަށެވެ. ޕީޕީއެމް/ޕީއެންސީގެ ވެރިކަމުގައި ޗައިނާ ކޮޅަށް ލެނބިފައިވާ ހާރިޖީ ސިޔާސަތެއް ގެންގުޅުނު ނަމަވެސް، މުއިއްޒު ވިދާޅުވީ އެ މަނިކުފާނުގެ ވެރިކަމެއްގައި ގެންގުޅުއްވާނީ ދިވެހިން އިސްކުރާ ސިޔާސަތު ކަމަށެވެ. ދިވެހިންގެ 'ގޯތީގެ އިންފާރު' ގެ ތެރެއަށް ނުވަންނަ ކަމުގައިވާ ނަމަ ކޮންމެ ގައުމަކާ އެކުވެސް ގާތް ގުޅުން ބާއްވަވާނެ ކަަމަށްވެސް އޭނާ ވިދާޅުވި އެވެ.
