ރިޔާސީ އިންތިހާބުގެ ދެވަނަ ބުރުގެ ވޯޓުލުން ކުރިއަށް ދަނިކޮށް ވޯޓު ކަރުދާސް ދެއްކުމާއި ވޯޓު ކަރުދާހުގެ ފޮޓޯ ނެގި ކަމަށް ތުހުމަތުކުރެވޭ ހަތަރު މީހުން ފުލުހުން ބެލުމުގެ ދަށަށް ގެނެސްފި އެވެ.
ވޯޓު ކަރުދާހުގެ ފޮޓޯ ނެގުމާއި، ވޯޓު ކަރުދާސް ދެއްކުމަކީ މަނާ ކަމެކެވެ.
ފުލުހުން މައުލޫމާތު ދޭ ގޮތުގައި ވޯޓު ކަރުދާހުގެ ފޮޓޯ ނެގިކަމަށް ތުހުމަތު ކުރެވުނީ ފުވައްމުލައް ސިޓީގައި ވޯޓުލާން ދިޔަ މީހަކަށެވެ. ނަމަވެސް, ފުލުހުންގެ ބެލުމުގެ ދަށަށް އެމީހާ ގެންގޮސް މައުލޫމާތު ސާފުކުރުމަށްފަހު ފަހުން ވަނީ ދޫކޮށްލާފަ އެވެ.
ވޯޓުލުމަށް ފަހު ވޯޓު ކަރުދާސް ދައްކައިގެން ހައްޔަރުކޮށްފައިވަނީ ގދ. ވާދޫގައި ވޯޓުލާން ދިޔަ މީހެކެވެ. އެރަށުން ވާހަކަ ދެއްްކި މީހަކު "އަދަދު" ނޫހަށް ބުނި ގޮތުގައި އޭނާ އަދިވެސް ހުރީ ފުލުހުންގެ ބެލުމުގެ ދަށުގަ އެވެ.
އޭގެ އިތުރުން ދެ މީހުން ފުލުހުންގެ ބެލުމުގެ ދަށަށް ގެނެސްފައިވާއިރު އެ މީހުންނާ ގުޅޭ މައުލޫމާތެއް ފުލުހުން ހިއްސާކޮށްފައި ނުވެ އެވެ.
ރިޔާސީ އިންތިހާބުގެ ދެވަނަބުރުގެ ވޯޓުލުން މިއަދު ކުރިއަށްދާއިރު މި ބުރުގައި 282،803 މީހަކަށް ވޯޓު ލުމުގެ ހައްގު ލިބެ އެވެ. މީގެ ތެރޭގައި އަލަށް ވޯޓު ލުމުގެ ފުރުސަތު ލިބޭ 403 ޒުވާނުން ހިމެނެ އެވެ.
