މިހާރު ކުރިއަށްދާ ރިޔާސީ އިންތިހާބުގެ ދެ ވަނަ ބުރުގެ ނަތީޖާ "އަދަދު" ނޫހުގެ ނިންމުން ޕޭޖުން ލައިވްކޮށް މިފަހަރު ވެސް ފެންނާނެ އެވެ.
ރިޔާސީ އިންހާބުގެ ފުރަތަމަ ބުރު ބޭއްވިތާ 20 ދުވަސް ފަހުން ބާއްވާ ދެ ވަނަ ބުރުގައި ވާދަކުރައްވަނީ އެންމެ ގިނަ ވޯޓު ހޯއްދެވި ޕީޕީއެމް/ޕީއެންސީގެ ކެންޑިޑޭޓު ޑރ. މުހައްމަދު މުއިއްޒާއި ދެވަނައަށް އެންމެ ގިނައިން ވޯޓު ހޯއްދެވި އެމްޑީޕީގެ ކެންޑިޑޭޓު ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހެވެ. މި ބުރުގައި 282،803 ވޯޓު ލުމުގެ ހައްގު ލިބެ އެވެ.
ވޯޓު ލުމާ ބެހޭ މުހިންމު މައުލޫމާތު
- ވޯޓު ލާން ފަށާ ގަޑިއަކީ ހެނދުނު 8:00 ގައި
- ވޯޓު ފޮށިތައް ބަންދުކުރަނީ ހަވީރު 5:00 ގައި
- ވޯޓު ފާހަގަ ޖަހާނީ ކަށި އިނގިލީގައި
- އައިޑީކާޑާއި ޕާސްޕޯޓު ނުވަތަ ލައިސެންސް ބޭނުންކޮށްގެން ވޯޓު ލެވޭނެ
މި ފަހަރުގެ ނިންމުން ޕޭޖުން ވެސް ވޯޓުގެ ނަތީޖާ އަދާހަމަ ކުރަމުންދާ ވަރަކަށް ނަތީޖާ ވަގުތުން ބަލައިލުމުގެ ފުރުސަތު އަދަދުގެ ކިޔުންތެރިންނަށް ލިބިގެން ދާނެ އެވެ. އަދި އިންތިހާބުގެ ފުރަތަމަ ބުރުގެ ނަތީޖާ އާއި ވަކިވަކި ފޮށިތަކުގެ ނަތީޖާ އާއި ރަށްރަށުގެ ނަތީޖާ އާއި އަތޮޅުތަކުގެ ނަތީޖާ ވެސް، ރިފްރެޝް ނުކުރިޔަސް ލައިވްކޮށް އަޕްޑޭޓު ވާނެ އެވެ.
ވޯޓުލުން ކުރިއަށްދާ ވަގުތުތަކުގައި ރާއްޖޭގެ އެކި ކަންކޮޅުތަކުގައި ވޯޓު ލުމުގެ ކަންކަން ކުރިއަށްދާ ވަގުތު ހިނގަމުންދާ މުހިންމު ކަންކަމުގެ މައުލޫމާތާއި ހަބަރުތައް އަދަދު ނޫހުގެ ނިންމުން 2023 ޕޭޖުންނާއި، ލައިވް ބްލޮގާއި، ސޯޝަލް މީޑީއާ އެކައުންޓުތަކުން ގެނެސްދެވޭނެ އެވެ.
އޭގެ އިތުރުން، ރިޔާސީ އިންތިހާބުގެ ނަތީޖާ ކަށަވަރު ވަގުތުން ފެށިގެން އެކި މައުލޫގެ ރިޕޯޓުތައް ވެސް ނޫހުގައި ޝާއިއު ކުރާނެ އެވެ.
