މާދަމާ ކެންޑިޑޭޓު ނަންބަރު ތިނަކަށް ވޯޓު ނުދެވިއްޖެނަމަ ދެން އިތުރު ފުރުސަތެއް ނުލިބޭނެ ކަމަށާއި އެކަމުގެ ސަބަބުން ކުރިއަށް ފަސް އަހަރު ރޯން ޖެހިދާނެ ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
ރިޔާސީ އިންތިހާބުގެ ދެވަނަ ބުރުގެ ކެމްޕޭނު ނިންމުމުގެ ހަރަކާތުގައި ރައީސް ވިދާޅުވީ މާދަމާގެ ވޯޓަކީ ރާއްޖޭގެ ހުރިހާ ރައްޔިތުންގެ މުސްތަގުބަލާ ގުޅިފައިވާ ނިންމުމެއް ކަމަށާއި އެ ނިންމުން ނިންމާއިރު، ފާއިތުވި 10 އަހަރުގެ ތެރޭގައި އައި ދެ ސަރުކާރުގެ ތަފާތު އަޅާކިޔައިލުމުން ނިންމަންވީ ގޮތް ވަރަށް ބޮޑަށް ސާފު ވާނެ ކަމަށެވެ.
ރިޔާއީ އިންތިހާބުގެ ކެމްޕެއިން ނިންމަން އެމްޑީޕީން މކިއަދު ކުރިއަށް ގެންދިޔަ ހިނގައިލިުން ނިންމައިލަނީ. ފޮޓޯ: މުހައްމަދު ޝާބިން/އަދަދު
"އަޅުގަނޑުމެން މި ނިންމުން ނިންމަން ނުކުމެ ތިބޭއިރުގައި ފުންކޮށް ވިސްނަންޖެހޭ ވަރަށް ބައިވަރު ކަންކަން އެބަހުރި، ވޭތުވެދިޔަ 10 އަހަރު ބައި ކޮށްލާފައި އަޅުގަނޑުމެން ސިކުނޑިއަށް ގެނައުމުން އެކަންތައްތައް އަޅުގަނޑުމެންނަށް އިހުސާސް ކުރެވޭނެ،" ރައީސް ވިދާޅުވި އެވެ.
ރައީސް ވިދާޅުވީ އެމްޑީޕީގެ މިސަރުކާރު އައުމުގެ ކުރިން ދިވެހި ރައްޔިތުން އަނިޔާވެރިކަމާއި ނާމާންކަމާއި ބިރުވެރިކަމުގެ ތެރޭގައި ފަސް އަހަރު ހޭދަ ކޮށްފައިވާ ކަމަށެވެ. ނަމަވެސް މި ސަރުކާރު އައުމަށްފަހު މިއަދާ ހަމައަށް ވެސް ދިވެހިން ދެކެމުން މިދަނީ އަމާން އުފާވެރި ދުވަސްތަކެއް ކަމަށް ރައީސް ވިދާޅުވި އެވެ.
"އަޅުގަނޑުމެން ފަސް އަހަރު ހޭދަކޮށްފިން ބިރުވެރިކަމާއި ނާމާންކަމާއި ހަލަބޮލިކަމުގެ ތެރޭގައި، އެއީ 2013 އިން 2018 އާ ހަމައަށް، އަޅުގަނޑުމެން 2018 އިން ފެށިގެން މިއަދާ ހިސާބަށް މިއައީ ހަމަޖެހުމާއި އުފަލާއި އެއްބައިވަންތަކަމާަ އެކީގައި،" ރާއްޖޭގެ ތަރައްގީއަށްޓަކައި މީގެ ކުރިން ކޮށްފައި ނުވާ ވަރުގެ މަސައްކަތްތަކެއް މި ދައުރުގައި ކޮށްދީފައިވާކަން ހަނދާން ކޮށްދެއްވަމުން ރައީސް ވިދާޅުވި އެވެ.
ފާއިތުވި 20 ދުވަހުގެ ތެރޭގައި އެކި ދާއިރާތަކުގައި މަސައްކަތް ކުރާ އެކި ފަންތީގެ އެކި ގިންތީގެ މީހުންނާ ބައްދަލުކޮށް އެމީހުންގެ ކަންބޮޑުވުންތައް ފާޅުކުރި ކަމަށް ވެސް ރައީސް ވިދާޅުވި އެވެ. އެމަނިކުފާނު ވިދާޅުވީ އެމީހުންގެ ފާހަގަ ކުރި ކަންބޮޑުވުންތަކަށް ހައްލު ހޯދައިދިނުމުގެ މަސައްކަތް މިހާރު މިހާރަށް ވެސް ފަށާފައި ވާކަމަށް އެމަނިކުފާނު ވިދާޅުވި އެވެ.
ރައީސް ވިދާޅުވި ގޮތުގައި ރާއްޖޭގެ ތައުލީމީ ދާއިރާއާއި ސިއްހީ ދާއިރާގެ އިތުރުން މަސްވެރިންނާއި ފަތުރުވެރިކަމުގެ ދާއިރާއާއި ކަސްޓަމްސްއާއި އެމްޕީއެލް އަދި މަޖޫރީންނާ ވެސް އެމަނިކުފާނު ވަނީ ބައްދަލުކުރައްވައިފަ އެެވެ.
އޭގެއިތުރުން އިމިގުރޭޝަންގެ މުވައްޒަފުންނާއި އެއާޕޯޓުގައި މަސައްކަތް ކުރާ މީހުންފެ އިތުރުން ފަންނާނުންނާއި ޓެކްސީ ޑުރައިވަރުންގެ އިތުރުން ދަތުރު ފަތުރުގެ ހިދުމަތް ފޯރުކޮށްދޭ މީހުންނާއި ކުޅިވަރު ކުޅޭ މީހުންނާ ވެސް ބައްދަލު ކޮށްފައި ވާކަމަށް ރައީސް ވިދާޅުވި އެވެ.
"މިއަދު އަޅުގަނޑު މިތަނަށް އައިސް މިހުރީ މި ހުރިހާ ކަންތައްތަކެއްގެ އިހުސާސްއާ އެކުގައި އެ ހުރިހާ ބޭފުޅުންގެ ކަންބޮޑުވުންތައް އަޑު އަހައިގެން، މި ވޭތުވެދިޔަ 20 ދުވަހުގެ ތެރޭގައި ހަމަގައިމު ވެސް މިހާރުން މިހާރަށް ގެނެވޭނެ އިސްލާހުތަކާއި ހެޔޮ ބަދަލުތައް އެ ހުރިހާ ދާއިރާތަކަކަށް އިރާދަކުރެއްވިއްޔާ އަޅުގަނޑު ގެނެސްދޭނަން،"
އަދި ދާއިމީ ހައްލުތައް ގެނެސްދޭންޖެހޭ ކަންތައްތަކަށް ހައްލު ހޯދައިދިނުމަށްޓަކައި ކަނޑައަޅަންޖަހޭ ސިޔާސަތުތައް ކަނޑައެޅުމުގެ މަސައްކަތް މިހާރު ވެސް ފަށާފައި ވާކަމަށް ރައީސް ވިދާޅުވި އެވެ.
