މިދިޔަ ފަސް އަހަރުދުވަހުގެ ތެރޭގައި ރާއްޖެއަށް ހަމަޖެހުން ގެނެސްދެވިއްޖެކަމަށާއި މާދަމާ ބާއްވާ ރިޔާސީ އިންތިހާބުގެ ދެވަނަ ބުރުގައި ރައްޔިތުން ގޮތެއް ނިންމަން ޖެހެނީ މި ހަމަޖެހުން ދެމެހެއްޓުމާ މެދުގަައި ކަމަށް ރައީސް އިބްރާހީމް މުހައްމަދު ސޯލިހު މިއަދު ވިދާޅުވެއްޖެ އެވެ.
ރިޔާސީ އިންތިހާބުގެ ދެވަނަ ބުރުގައި ރައީސް ސޯލިހާ ވާދަކުރައްވަނީ ޕީއެންސީގެ ރިޔާސީ ކެންޑިޑޭޓް، މާލާގެ މޭޔަރު ޑރ.މުހައްމަދު މިއިއްޒެވެ. މާދަމާ ބާއްވާ އިންތިހާބަށް ކެމްޕެއިންކުރުމުގެ ވަގުތު ނިމެން ދެގަޑިއިރަށް ވެފައި ވަނިކޮށް އާއްމުކުރެއްވި ވީޑިއޯ މެސެޖްގައި ރައީސް ވިދާޅުވީ އެމަނިކުފާނުގެ ވެރިކަމުގެ ފަސް އަހަރުދުވަހުގެ ތެރޭގައި ކުރެއްވުނު އެންމެ މުހިއްމު ކަމަކީ ރާއްޖެއަށް ހަމަޖެހުންނ ގެނައުން ކަމަށެވެ.
"އަަޅުގަނޑުމެން ނިންމަން ޖެހިފައި މިއޮތީ މިރާއްޖެ އަނެއްކާ ވެސް އެނބުރި ހަމަނުޖެހުމާ ބިރުވެރިކަމުގެ ތެރެއަށް ދާނީތޯ ނޫނިއްޔާ އަަޅުގަނޑުމެން އެތައް ބަައެއްގެ ގުރުބާނީން މި ގެނެވުނު އިސްލާހީ ބަދަލުތަކުގެ ތެރޭގައި ޒުވާނުންނަށް މި ރާއްޖެ ފޯރުކޮށްދޭނީތޯ ނިންމަން އޮތް ނިންމުމެއް،" ރައީސް ވިދާޅުވި އެވެ.
ރައީސް ސޯލިހު އެދިވަޑައިގެންނެވީ ރާއްޖެއަށް ގެނެވިފައި އޮތް ހަމަޖެހުމާ އެކީގައި ކުރިއަށް ދިއުމަށް ޓަކައި މާދަމާ އެމަނިކުފާނަށް ވޯޓު ދިނުމަށެވެ.
މިދިޔަ ފަސް އަހަރު ދުވަހު ކުރެވުނު މަސައްކަތްތަކަށް އަލިއަަޅުވައިލަައްވަމުން ރައީސް ވިދާޅުވީ 2018 ވަނަ އަހަރު ރައްޔިތުން ނިންމި ނިންމުމާ އެއްގޮތަށް މުޅި ރާއްޖެއަށް ބޮޑެތި ހެޔޮ ބަދަލުތައް ގެނެވިއްޖެ ކަމަށެވެ. އެފަދަ އެއް ކަމަކީ އެމަނިކުފާނު ވިދާޅުވި ގޮތުގައި ރާއްޖޭގައި އެހައިތަނަށް އޮތް ބިރުވެރިކަން ނައްތައިލުމެވެ.
ކުޑަރަށެއް ބޮޑުރަށެއް ތަފާތުކުރުމެއް ނެތި އަސާސީ ހިދުމަތްތައް ފޯރުކޮށްދިނުމުގައި ބޮޑެތި ކާމިޔާބީތައް ހޯދިއްޖެ ކަމަށް ވެސް އެމަނިކުފާނު ވިދާޅުވި އެވެ.
